ພວກປະທ້ວງໃນອີຈິບຍັງສືບຕໍ່ຮຽກຮ້ອງ ໃຫ້ປະທານາທີບໍດີ
Hosni Mubarak ລາອອກຈາກຕໍາແໜ່ງ ເຖິງແມ່ນຜູ້ນໍາ
ພາປະເທດທີ່ກໍາລັງ ປະເຊີນກັບບັນຫາໜັກ ໄດ້ປະກາດ
ອອກມາແລ້ວກໍຕາມວ່າ ທ່ານຈະບໍ່ສະໝັກເປັນປະທານາ
ທິບໍດີຕື່ມອີກໃນການເລືອກຕັ້ງເດືອນກັນຍາປີນີ້.
ພວກປະທ້ວງຈໍານວນຫລາຍຮ້ອຍຄົນ ຍັງທໍາການປະທ້ວງຢູ່ຕໍ່ມາໃນວັນພຸດມື້ນີ້ ທີ່ຈັດຕຸລັດ Tahrir ໃນກຸງໄຄໂຣ ບ່ອນທີ່ພວກປະທ້ວງປະມານ 250 ພັນຄົນ ໄດ້ໂຮມຊຸມ
ນຸມກັນໃນມື້ກ່ອນ ທວງໃຫ້ທ່ານ Mubarak ລາອອກຈາກຕໍາແໜ່ງໂດຍທັນທີ.
ປະຊາຊົນອີກຫລາຍຮ້ອຍຄົນໄດ້ພາກັນທໍາການປະທ້ວງເຊ່ນກັນໃນນະຄອນຫລວງ ໃນວັນພຸດມື້ນີ້ ເພື່ອສະແດງການສະໜັບສະໜຸນຕໍ່ທ່ານ Mubarak.
ທະຫານອີຈິບອອກຖະແຫລງການສະບັບນຶ່ງໃນວັນພຸດມື້ນີ້ ຮຽກຮ້ອງໃຫ້ພວກປະທ້ວງໃຫ້ພາກັນກັບຄືນໄປດໍາລົງຊີວິດປົກກະຕິຂອງເຂົາເຈົ້າຕໍ່ໄປ ໂດຍກ່າວວ່າ ທາງການໄດ້ຮັບຮູ້ສານຂອງເຂົາເຈົ້າແລ້ວ.
ທ່ານ Mubarak ໄດ້ຖະແຫລງທາງໂທລະພາບແຫ່ງຊາດໃນຄືນວັນອັງຄານວານນີ້ວ່າ ທ່ານໄດ້ໃຊ້ຊີວິດຂອງທ່ານຮັບໃຊ້ອີຈິບແລະປະຊາຊົນຂອງອີຈິບ ຢ່າງອິດເມື່ອຍລ້າມາຕະຫລອດຊີວິດ ແຕ່ບໍ່ໄດ້ໃຫ້ຮ່ອງຮອຍໃດໆວ່າ ທ່ານວາງແຜນຈະລາອອກຈາກຕໍາແໜ່ງ ຫລືໜີຈາກປະເທດໄປ ແຕ່ກ່າວວ່າ ທ່ານຈະປະຕິບັດງານ ແຕ່ນີ້ຕໍ່ໄປຈົນໝົດສະໄໝການດໍາລົງຕໍາແໜ່ງຂອງທ່ານ ເພື່ອໂອນອໍານາດຢ່າງສັນຕິນັ້ນ.
ຄໍາປະກາດຂອງຜູ້ນໍາອີຈິບໄດ້ກະຕຸ້ນໃຫ້ເກີດຄວາມໂກດແຄ້ນຂຶ້ນມາໂດຍທັນທີ ຈາກຊາວອີຈິບຫລາຍແສນຄົນທີ່ໄດ້ພາກັນທໍາການປະທ້ວງຕາມຖະໜົນຫົນທາງສາຍຕ່າງໆຢ່າງສັນຕິໃນທົ່ວປະເທດນັ້ນ.
ໃນເວລາບໍ່ດົນຫລັງຈາກທ່ານ Mubarak ກ່າວປາໄສ ໄດ້ເກີດການປະທະກັນລະຫວ່າງພວກປະທ້ວງແລະພວກສະໜັບສະໜຸນລັດຖະບານໃນເມືອງທ່າກໍາປັ່ນ Alexandria ໃນພາກເໜືອຂອງປະເທດ ຊຶ່ງໄດ້ເຮັດໃຫ້ຜູ້ຄົນຢ່າງນ້ອຍ 12 ຄົນໄດ້ຮັບບາດເຈັບ. ພວກທີ່ເຫັນເຫດການ ລາຍງານເຊ່ນກັນວ່າ ມີຄວາມວຸ້ນວາຍເກີດຂຶ້ນໃນທໍານອງດຽວກັນໃນເຂດຄອງ Suez ແລະຫົວເມືອງອຶ່ນໆ ທາງທິດຕາເວັນອອກຂອງກຸງໄຄໂຣ.
