ປະຊາຊົນຫລາຍໝື່ນຄົນພາກັນໄປໂຮມຊຸມນຸມຢູ່ໃນໃຈກາງກຸງໄຄໂຣ ໃນວັນອັງຄານມື້ນີ້ ບ່ອນທີ່ພວກປະທ້ວງໄດ້ຮຽກຮ້ອງໃຫ້ປະຊາຊົນ 1 ລ້ານຄົນເຂົ້າຮ່ວມເດີນຂະບວນ ກົດດັນຄໍາຮຽກຮ້ອງໃຫ້ປະທານາທິບໍດີ Hosni Mubarak ສະລະອໍານາດນັ້ນ.
ພວກກໍາລັງກອງທັບຍັງຄົງປະຈໍາການຢູ່ໃນທົ່ວນະຄອນຫລວງ ແຕ່ບໍ່ໄດ້ເຂົ້າແຊກແຊງກັບພວກທີ່ໄປໂຮມຊຸມນຸມເພື່ອທໍາການປະທ້ວງດັ່ງກ່າວ. ທາງກອງທັບໄດ້ປະກາດກ່ອນໜ້ານີ້ວ່າ ຕົນຮັບຮູ້ຄໍາຮຽກຮ້ອງທີ່ຖືກຕ້ອງຊອບທໍາຕ່າງໆຂອງປະຊາຊົນອີຈິບ ແລະໃຫ້ຄໍາໝັ້ນສັນຍາ ວ່າຈະບໍ່ຍິງປືນໃສ່ພວກປະທ້ວງ.ໄດ້ມີການວາງແຜນສໍາລັບການປະທ້ວງຂະໜານໃຫຍ່ແຫ່ງທີສອງອີກໃນວັນອັງຄານມື້ນີ້ ທີ່ເມືອງທ່າເຮືອ Alexandria ໃນພາກເໜືອຂອງປະເທດ.
ການບໍລິການລົດໄຟແຫ່ງຊາດໄດ້ຖືກລົບລ້າງໄປເປັນມື້ທີສອງ ແລະພວກຖະໜົນຫົນທາງສາຍຕ່າງໆທີ່ເນ່ງໃສ່ກຸງໄຄໂຣ ໄດ້ຖືກຕັນໄວ້ໃນການສືບຕໍ່ອັນທີ່ບາງຄົນຖືວ່າ ເປັນຄວາມພະຍາຍາມຂອງທາງການເພື່ອປ້ອງກັນບໍ່ໃຫ້ຊາວບ້ານຊາວເມືອງໃນເຂດຊົນນະບົດ ເຂົ້າໄປຮ່ວມໃນການປະທ້ວງຢູ່ໃນເຂດຕົວເມືອງນັ້ນ.
ຮອງປະທານາທິບໍດີທີ່ຫາກໍຖືກແຕ່ງຕັ້ງໃໝ່ຂອງອີຈິບ ກ່າວວ່າ ທ່ານ Mubarak ໄດ້ຂໍຮ້ອງໃຫ້ທ່ານເລີ້ມທໍາການໂອ້ລົມສົນທະນາໃນທັນທີກັບກໍາລັງດ້ານການເມືອງທຸກພັກຝ່າຍ ກ່ຽວກັບການປະຕິຮູບດ້ານລັດ ຖະທໍາມະນູນແລະນິຕິບັນຍັດນັ້ນ. ທ່ານ Omar Suleiman ຊຶ່ງເປັນ ເພື່ອນທ່ີໃກ້ຊິດແລະໄວ້ໃຈໄດ້ຂອງທ່ານ Mubarak ມາເປັນເວລາດົນນານ ບໍ່ໄດ້ເວົ້າວ່າ ການປ່ຽນແປງເຫລົ່ານີ້ຈະມີຫຍັງແດ່ ຫລືວ່າລັດຖະບານຈະຕິດຕໍ່ພົວພັນກັບກຸ່ມໃດແດ່.
ໜັງສືພິມ The Wall Street Journal ລາຍງານວ່າ ບັນດາພັກຝ່າຍຄ້ານກ່າວວ່າ ພວກເຂົາເຈົ້າຈະບໍ່ທໍາການເຈລະຈາໃດໆ ຕາບໃດທີ່ທ່ານ Mubarak ຍັງຄອງອໍານາດຢູ່ຕໍ່ໄປ.