ສະຫະລັດກ່າວວ່າ ລັດຖະບານອີຈິບຕ້ອງດໍາເນີນການ
ຫຼາຍໄປກວ່ານີ້ອີກ ເພື່ອຕອບ ສະໜອງຄວາມຮຽກຮ້ອງ
ຕ້ອງການຂອງພວກກຸ່ມຝ່າຍຄ້ານນັ້ນ ແລະຮຽກຮ້ອງໃຫ້
Cairo ຍົກເລີກກົດໝາຍສຸກເສີນ ທີ່ອະນຸຍາດໃຫ້ມີການ
ຈັບກຸມແລະກັກຂັງໄວ້ ໂດຍປາດສະຈາກຂໍ້ຫາໃດໆນັ້ນ
ແລະປ່ອຍໃຫ້ມີການປະກອບສ່ວນໂດຍຫລາຍພັກຝ່າຍ
ກ່ວາເກົ່າ ໃນການໂອ້ລົມສົນທະນາກ່ຽວກັບການໂອນ
ອໍານາດນັ້ນ.
ທໍານຽບຂາວກ່າວວ່າ ຮອງປະທານາທິບໍດີສະຫະລັດ ທ່ານ Joe Biden ໄດ້ໂອ້ລົມກັບ
ຄູ່ຕໍາແໜ່ງຂອງທ່ານຈາກຝ່າຍອີຈິບໃນວັນອັງຄານວານນີ້ ແລະໄດ້ເນ້ນໜັກວ່າ ລັດຖະ
ບານອີຈິບ ຈະຕ້ອງຢຸດເຊົາການຕົບຕີ, ຮາວີກັ່ນແກ້ງ ແລະຈັບກຸມພວກປະທ້ວງ
ແລະພວກທີ່ລາຍງານຂ່າວ ກ່ຽວກັບການປະທ້ວງຂອງມະຫາຊົນນັ້ນ.
ເລຂາທິການໃຫຍ່ອົງການສະຫະປະຊາຊາດ ທ່ານ Ban ki-moon ກ່າວໃນວັນອັງຄານ
ວານນີ້ ທີ່ນະຄອນ New York ວ່າ ຊາວອີຈິບທັງຫຼາຍ ແມ່ນມີຄວາມເຫລືອອົກເຫລືອໃຈ
ຢ່າງທີ່ສຸດແລ້ວ ແລະຮຽກຮ້ອງເອົາການປະຕິຮູບຢ່າງໃຫຍ່ແລະກ້າຫານ ທີ່ຄວນຈະໄດ້
ຮັບການປະຕິບັດຕາມໂດຍໄວເທົ່າໃດ ກໍຍິ່ງດີເທົ່ານັ້ນ. ທ່ານ Ban ki-moon ຍັງກ່າວ
ອີກວ່າ ທຸກພັກຝ່າຍຈະຕ້ອງຫລີກລ່ຽງຈາກການກໍ່ຄວາມຮຸນແຮງ ແລະທ່ານໄດ້ກ່າວຢໍ້າ
ອີກ ເຖິງຄໍາຮຽກຮ້ອງຂອງທ່ານ ທີ່ວ່າໃຫ້ມີການໂອນອໍານາດຢ່າງສັນຕິ ແລະຢ່າງເປັນ
ລະບຽບຮຽບຮ້ອຍນັ້ນ.
