ທ່ານ Mohammed Morsi ຜູ້ນໍາພັກສາສະໜາອິສລາມຂອງອີຈິບ ໄດ້ປະກາດໄຊຊະນະໃນການເລືອກຕັ້ງປະທານາທິບໍດີຄັ້ງທໍາອິດຂອງປະເທດ ໃນຍຸກຫຼັງຈາກການລຸກຮືຂຶ້ນຂອງປະຊາຊົນຕໍ່ຕ້ານລັດຖະບານ ແຕ່ຄູ່ແຂ່ງຂອງທ່ານ ຄືທ່ານ Ahmed Shafiq ໄດ້ໂຕ້ແຍ້ງຕໍ່ຄໍາປະກາດຂອງທ່ານ ໃນຂະນະທີ່ພວກທະຫານທີ່ປົກຄອງປະເທດຂະຫຍາຍອໍານາດຄວບຄຸມຂອງພວກເຂົາຕໍ່ປະທານາທິບໍດີຄົນຕໍ່ໄປ.
ພັກພະລາດອນພາບມຸສລິມຂອງທ່ານ Morsi ກ່າວວ່າ ຜົນຂອງການເລືອກຕັ້ງທີ່ບໍ່ເປັນທາງການ ສະແດງໃຫ້ເຫັນວ່າ ທ່ານ Morsi ໄດ້ຮັບສຽງສະໜັບສະໜຸນປະມານ 52 ເປີເຊັນຂອງຄະແນນສຽງທັງໝົດໃນການເລືອກຕັ້ງຮອບສຸດທ້າຍ ເປັນເວລາ 2 ມື້ ທີ່ຍຸດຕິລົງໃນວັນອາທິດວານນີ້ ສົມທຽບໃສ່ກັບ 48 ເປີເຊັນສໍາລັບທ່ານ Shafiq ຊຶ່ງເປັນນາຍົກລັດຖະມົນຕີຄົນສຸດທ້າຍ ທີ່ຮັບໃຊ້ໃນຄະນະລັດຖະບານຂອງປະທານາທິບໍດີໂຮສນີ ມູບາຣັກ ທີ່ໄດ້ຖືກຂັບໄລ່
ອອກຈາກອໍານາດໄປນັ້ນ. ພັກພະລາດອນພາບໄດ້ອ້າງເອົາໄຊຊະນະຂອງຕົນ ໂດຍອິງໃສ່ຜົນຂອງການນັບບັດເລືອກຕັ້ງໂດຍບັນດາຜູ້ຕາງໜ້າຂອງພັກພະລາດອນພາບຢູ່ໜ່ວຍປ່ອນບັດເກືອບໝົດທຸກບ່ອນໃນທົ່ວປະເທດນັ້ນ.
ໃນຄໍາປາໄສທີ່ສໍານັກງານໃຫຍ່ຫາສຽງເລືອກຕັ້ງຂອງທ່ານໃນວັນອາທິດວານນີ້ ທ່ານ Morsi ກ່າວວ່າ ທ່ານຈະຮັບໃຊ້ໃນຖານະເປັນຜູ້ນໍາຂອງປະຊາຊົນອີຈິບທັງໝົດ ຮວມທັງພວກມຸສລິມແລະຄຣິສຕຽນ ແລະໃຫ້ຄໍາໝັ້ນສັນຍາວ່າ ຈະບໍ່ຊອກຫາທາງແກ້ແຄ້ນໃດໆກັບພວກທີ່ຄັດຄ້ານພັກພະລາດອນພາບມຸສລິມນັ້ນ ຊຶ່ງທ່ານ Morsi ກ່າວດັ່ງນີ້:
“ພວກເຮົາຊອກຫາສະຖຽນລະພາບ ຄວາມຮັກແພງ ແລະຄວາມສໍາພັນສັນພີ່ສັນນ້ອງ
ຫຼືພະລາດອນພາບສໍາລັບປະເທດອີຈິບ ທີ່ມີອະລິຍະທໍາ ຫົວຊາດນິຍົມ ເປັນປະຊາທິ
ປະໄຕ ປົກຄອງໂດຍລັດຖະທໍາມະນູນ ແລະທັນສະໄໝ. ພວກເຮົາທັງໝົດມີຄວາມກະຕື
ລືລົ້ນຕໍ່ການຮັກຫອມຊຶ່ງກັນແລະກັນ.”
ທ່ານ Mahmud Barakeh ຜູ້ຊ່ອຍວຽກທ່ານ Shafiq ສະແດງຄວາມແປກໃຈຕໍ່ຄໍາປະກາດ
ຂອງພັກພະລາດອນພາບນັ້ນ ໂດຍກ່າວຫາພັກດັ່ງກ່າວວ່າ ລັກຂະໂມຍເອົາຂັ້ນຕອນການ
ເລືອກຕັ້ງໄປ ໂດຍບໍ່ຍອມລໍຖ້າຟັງຜົນຂອງການເລືອກຕັ້ງ ຢ່າງເປັນທາງການຂອງຄະນະກໍາ
ມະການກໍາກັບການເລືອກຕັ້ງ ຊຶ່ງກໍານົດຈະປະກາດໃຫ້ຮູ້ໃນວັນພະຫັດສັບປະດານີ້. ທ່ານ
Barakeh ຍັງກ່າວເຊ່ນກັນວ່າ ໂຕເລກຢ່າງບໍ່ເປັນທາງການຂອງໜ່ວຍໂຄສະນາຫາສຽງ
ເລືອກຕັ້ງຂອງທ່ານ Shafiq ນັ້ນ ບອກວ່າ ອະດີດນາຍົກລັດຖະມົນຕີທ່ານນີ້ ມີຄະແນນນໍາໜ້າ.
ໃນການເຄື່ອນໄຫວທີ່ລົດອໍານາດຂອງຜູ້ຊະນະໃນການເລືອກຕັ້ງລົງນັ້ນ ພວກນາຍພົນທະ
ຫານທີ່ປົກຄອງປະເທດໃນປັດຈຸບັນ ໄດ້ປະກາດໃຊ້ກົດໝາຍລັດຖະທໍາມະນູນຊົ່ວຄາວສະບັບ
ໃໝ່ ຫຼັງຈາກໜ່ວຍປ່ອນບັດເລືອກຕັ້ງທັງໝົດອັດລົງໃນວັນອາທິດວານນີ້. ສະພາທະຫານທີ່
ໄດ້ປົກຄອງປະເທດມາ ນັບແຕ່ທ່ານມູບາຣັກໄດ້ຖືກປົດອອກຈາກຕໍາແໜ່ງໃນເດືອນມີນາ ປີ
2011 ເປັນຕົ້ນມານັ້ນ ໄດ້ໃຫ້ຄໍາໜັ້ນສັນຍາວ່າ ຈະມອບໝາຍອໍານາດໃຫ້ປະທານາທິບໍດີທີ່ຖືກ
ເລືອກຕັ້ງໃໝ່ ໃນວັນທີ 1 ກໍລະກົດ ເດືອນໜ້ານີ້.