ກອງທັບອີຈິບໄດ້ຂໍຂະມາໂທດກ່ຽວກັບການເສຍຊີວິດຂອງພວກປະທ້ວງຢ່າງນ້ອຍ 35 ຄົນ
ໃນການປະທະກັນຫຼາຍໆຄັ້ງກັບຕຳຫຼວດໃນອາທິດນີ້.
ຖະແຫລງການຂໍຂະມາໂທດໄດ້ມີຂຶ້ນໃນຂະນະທີ່ການຢຸດປະທະກັນຊົ່ວຄາວທີ່ສາມາດແຕກ
ຫັກລົງໄດ້ທຸກນາທີ ໃນບໍລິເວນຈະຕຸລັດ Tahrir ຍັງໄດ້ຮັບການເຄົາລົບຢູ່ຕໍ່ມາ ຊຶ່ງເຂດດັ່ງ
ກ່າວນີ້ແມ່ນເປັນຈຸດເດືອດ ໃນການປະທະກັນຢ່າງຮຸນແຮງລະຫວ່າງຕຳຫຼວດແລະພວກປະ
ທ້ວງທີ່ຮຽກຮ້ອງ ໃຫ້ທະຫານທີ່ປົກຄອງປະເທດຢູ່ໃນເວລານີ້ລາອອກໃນທັນທີ.
ພວກທະຫານໄດ້ໃຊ້ທ່ອນເຫຼັກ ແລະໜາມໝາກຈັບ ແຍກພວກປະທ້ວງແລະຕຳຫຼວດອອກ
ຈາກກັນໃນຖະໜົນສາຍນຶ່ງ ທີ່ໄດ້ເກີດການປະທະກັນຢ່າງດຸເດືອດ. ຂະນະດຽວກັນຖະແຫຼງ ການຂອງພວກຜູ້ນຳທະຫານທີ່ປົກຄອງປະເທດໃຫ້ຄຳໝັ້ນສັນຍາວ່າ ຈະນໍາເອົາໂຕພວກທີ່
ຮັບຜິດຊອບໃນການເສຍຊີວິດເຫຼົ່ານີ້ ມາລົງໂທດໃຫ້ໄດ້.
ການປະທະກັນເທື່ອລ່າສຸດ ເກີດຂຶ້ນໃນຕອນເຊົ້າຂອງວັນພະຫັດມື້ນີ້ ຢູ່ທາງກໍ້າຕາເວັນອອກ
ຂອງກຸງໄຄໂຣທີ່ເມືອງ Ismailia ຊຶ່ງຕັ້ງຢູ່ຕາມແຄມຄອງຊູເອສ. ພວກປະທ້ວງບາງຄົນໄດ້
ແກວ່ງລະເບີດໄຟເຂົ້າໃສ່ທະຫານ ທີ່ເຄື່ອນກຳລັງໄປຕາມຫົນທາງສາຍຕ່າງໆ ດ້ວຍລົດຫຸ້ມ
ເກາະແລະລົດຖັງ ທ່າມກາງສຽງປືນທີ່ດັງຂຶ້ນຢ່າງບໍ່ຂາດໄລຍະນັ້ນ.
ພວກປະທ້ວງບາງຄົນໄດ້ກ່າວຫາທະຫານວ່າ ໄດ້ໃຊ້ຄວາມຮຸນແຮງຕື່ມຂຶ້ນໂດຍທີ່ບໍ່ມີການ
ທ້າທາຍໃດໆທັງໝົດ.
ທີ່ຫົວເມືອງແຄມທະເລ Alexandria ໃນຕອນແລງຂອງມື້ວັນພຸດວານນີ້ ພວກປະທ້ວງໄດ້
ພາກັນວາງເຄື່ອງກີດຂວາງແລະແກວ່ງກ້ອນຫີນເຂົ້າໃສ່ຕຳຫຼວດ ແລະອີກຈຳນວນນຶ່ງໄດ້ພາ
ກັນຈັບມືຕິດຕໍ່ກັນຢູ່ຕໍ່ໜ້າຕຶກໂຮງການຂອງພວກທະຫານແລະຮ້ອງຄຳຂວັນວ່າ “ອິດສະຫຼະ
ພາບ”.
ໃນມື້ວານນີ້ ຂ້າຫຼວງໃຫຍ່ໃນດ້ານສິດທິມະນຸດ ຂອງອົງການສະຫະປະຊາຊາດ ທ່ານນາງ
Navi Pillay ໄດ້ຮຽກຮ້ອງໃຫ້ເຈົ້າໜ້າທີ່ອີຈິບຢຸດເຊົາໃນອັນທີ່ທ່ານນາງເອີ້ນວ່າ ການໃຊ້ກຳ
ລັງເກີນຂອບເຂດຢ່າງຈະແຈ້ງຕໍ່ພວກປະທ້ວງແລະເອີ້ນຮູບພາບກ່ຽວກັບການທຸບຕີຢ່າງໂຫດ
ຮ້າຍຕໍ່ພວກປະທ້ວງນັ້ນວ່າ ເຮັດໃຫ້ຕົກໃຈເປັນທີ່ສຸດ.
View El-tahrir Square in a larger map
