ອະດີດປະທານາທິບໍດີອີຈິບ ທ່ານ Hosni Mubarak ໄດ້ພົ້ນຜິດ
ໃນທຸກຂໍ້ຫາ ໃນການພົວພັນຂອງທ່ານ ກັບການສັງຫານພວກປະ
ທ້ວງ ລະຫວ່າງການລຸກຮືຂຶ້ນໃນເມື່ອ 2011 ທີ່ຂັບໄລ່ທ່ານອອກ
ຈາກອຳນາດນັ້ນ.
ຜູ້ພິພາກສາອີຈິບຄົນນຶ່ງໄດ້ຖະແຫລງຢ່າງຍືດຍາວຕໍ່ສານທີ່ແໜ້ນ
ໄປດ້ວຍຜູ້ຄົນ ກ່ອນທີ່ຈະປະກາດວ່າ ຂໍ້ຫາຕ່າງໆຕໍ່ອະດີີດຜູ້ນຳທີ່
ຖືກຂັບໄລ່ອອກຈາກອຳນາດນັ້ນ ໄດ້ຖືກຍົກເລີກທັງໝົດ.
ສຽງຕົບມືໄດ້ດັງກ້ອງຂຶ້ນໃນສານເວລາຄຳພິພາກສາໄດ້ມີການປະ
ກາດໃຫ້ຊາບ. ລູກຊາຍຂອງທ່ານ Mubarak ແລະເປັນຈຳເລີຍ
ຮ່ວມ ໄດ້ຈູບທ່ານທີ່ໜ້າຜາກ ໃນຂະນະທີ່ທ່ານ ຟັງການປະກາດຄຳພິພາກສາ ຈາກຕຽງ ຫາມທີ່ຕັ້ງຂຶ້ນນັ້ນ.
ໃນການຖະແຫລງ ຢ່າງຍືດຍາວນັ້ນ ຜູ້ພິພາກສາທ່ານນີ້ ຮຽກຮ້ອງໃຫ້ພວກນັກຂ່າວ ຈົ່ງ ຢ່າໄດ້ໃຫ້ຄວາມເຫັນຫລືໃຫ້ການວິເຄາະໃດໆກ່ຽວກັບຄະດີນີ້ຈົນກວ່າພວກເຂົາເຈົ້າໄດ້ ອ່ານເອກກະສານທີ່ໃຫ້ການອະທິບາຍກ່ຽວກັບຄຳພິພາກສາ ທີ່ຍາວ 1430 ໜ້າ.
ລັດຖະມົນຕີກະຊວງພາຍໃນ ແລະເຈົ້າໜ້າທີ່ຮັກສາຄວາມສະຫງົບຂັ້ນອະວຸໂສອີກ 6 ຄົນ ຂອງທ່ານ Mubarak ທີ່ຖືກກ່າວຫາວ່າ ສັ່ງໃຫ້ສັງຫານພວກປະທ້ວງ ຫລາຍຮ້ອຍຄົນນັ້ນ ກໍພົ້ນຜິດເຊັ່ນດຽວກັນ. ທ່ານ Mubarak ແລະບຸກຄົນເຫຼົ່ານີ້ໄດ້ຖືກກ່າວຫາວ່າ ສັ່ງໃຫ້ສັງ ຫານພວກປະທ້ວງຫຼາຍຮ້ອຍຄົນ.
ອະດີດຜູ້ນຳອາຍຸ 86 ປີທ່ານນີ້ ຍັງພົ້ນຜິດໃນຂໍ້ຫາສໍ້ລາດບັງຫຼວງທີ່ທ່ານເອງໄດ້ຖືກຟ້ອງ ພ້ອມກັບລູກຊາຍທັງສອງຄືທ້າວ Alaa ແລະ Gamal. ແຕ່ແນວໃດກໍຕາມທ່ານພວມຮັບ ໃຊ້ໂທດເປັນເວລາ 3 ປີ ໃນຂໍ້ຫາຍັກຍອກເງິນທີ່ມີຂຶ້ນຕ່າງຫາກນັ້ນ.
ປະທານາທິບໍດີທີ່ໄດ້ນຳພາປະເທດອີຈິບມາເປັນເວລາເກືອບ 3 ທົດສະວັດນັ້ນໄດ້ຖືກຕັດ ສິນລົງໂທດໃຫ້ຈຳຄຸກຕະຫຼອດຊີວິດໃນປີ 2012 ທີ່ພົວພັນກັບການສັງຫານພວກປະທ້ວງ. ຄຳພິພາກສາໃນມື້ນີ້ໄດ້ຕ່າວປີ້ນການຂໍອຸທອນຕໍ່ສານສູງເມື່ອນຶ່ງປີກ່ອນແລະການດຳເນີນ ຄະດີຄືນໃໝ່ທີ່ໄດ້ເລີ້ມມານັ້ນ. ນັບແຕ່ນັ້ນມາ ທ່ານກໍໄດ້ຖືກກັກບໍລິເວນ ທີ່ໂຮງໝໍທະຫານ ແຫ່ງນຶ່ງ.
ນັບແຕ່ທ່ານໄດ້ເຂົ້າຄຸກມາ ອິຈິບແມ່ນໄດ້ທຳການເລືອກຕັ້ງແບບປະຊາທິປະໄຕ ແຕ່ພວກ ທະຫານໄດ້ຊ່ອຍ ໃນການໂຄ່ນລົ້ມ ປະທານາທິບໍດີ ທີ່ຖືກເລືອກຂຶ້ນມາ ທ່ານ Moham-
med Morsi ເວລາທ່ານຊຸກຍູ້ ໃຫ້ມີການຮັບເອົາລັດຖະທຳມະນູນສະບັບໃໝ່ທີ່ຊາວອີຈິບ ຈຳນວນຫຼວງຫຼາຍເຫັນວ່າ ມີການເອນອຽງໄປສູ່ສາສະໜາອິສລາມນັ້ນ.
ທ່ານ Abdel Fattah al-Sisi ຊຶ່ງເປັນອະດີດຫົວໜ້າສືບລັບ ຂອງທ່ານ Mubarak ໃນ ປັດຈຸບັນນີ້ ແມ່ນປະທານາທິບໍດີຂອງອີີຈິບ.
