ທ່ານ Obama ​​ຮຽກຮ້ອງໃຫ້ ທ່ານ Morsi ຕອບ​ສະໜອງ​ ຕໍ່​ພວກ​ປະ​ທ້ວງ (ວິດິໂອ/ສະໄລດ໌)

ປະທານາທິບໍດີ​ສະຫະລັດ ທ່ານ Barack Obama ​ໄດ້​ຮຽກຮ້ອງ
ໃຫ້ຜູ້​ນໍາ​ຂອງ​ອີ​ຈິບທ່ານ Mohamed Morsi ສະແດງ​ໃຫ້​ເຫັນ​ວ່າ
ທ່ານຮັບຮູ້​ແລະ​ຈະ​ຕອບ​ສະໜອງ​ ຕໍ່ຄວາມ​ເປັນ​ຫ່ວງ​ຕ່າງໆຂອງ
​ພວກ​ປະ​ທ້ວງ.

​ຊາວ​ໂລກໄດ້​ເຫັນ​ການ​ປະ​ທ້ວງ​ຂອງ​ມະຫາຊົນແບບ​ຕໍ່ເນື່ອງກັນ
​ມາເປັນ​ເວລາຫຼາຍ​ໆມື້​ແລ້ວ​ໃນອີ​ຈິບ ທີ່ມີປະຊາຊົນ​ຈໍານວນ​ຫຼວງ
ຫຼາຍໆ​ຄົນ​ທີ່​ຕໍ່ຕ້ານ​ກັບ​ທ່ານ Morsi ນັ້ນ​ ຮຽກຮ້ອງໃຫ້ທ່ານລາ​
ອອກ​ຈາກ​ອໍານາດ. ຄວາມ​ຮຸນ​ແຮງ​ໄດ້​ລະ​ເບີດຂຶ້ນ​ໃນ​ບາງ​ເຂດ
ທີ່​ພາ​ໃຫ້​ມີ​ຢ່າງ​ນ້ອຍ 16 ຄົນ​ເສຍຊີວິດ.


ທໍານຽບຂາວກ່າວ​ວ່າ ທ່ານ Obama ​ໄດ້​ສະ​ແດງ​ຄວາມ​ເປັນ​ຫ່ວງ​ຂອງ​ທ່ານ ຕໍ່​ທ່ານ Morsi ​ໃນ​ການ​ໂອ້​ລົມ​ສົນທະນາ​ກັນທາງ​ໂທລະສັບ​ໃນ​ວັນ​ຈັນ​ວານ​ນີ້ ​ຊຶ່ງ​ທ່ານ​ໂອ​ບາ​ມາ ໄດ້​ກ່າວ​ວ່າ ສະ​ຫະລັດ​ສະໜັບສະໜູນ​ຂັ້ນ​ຕອນປະຊາທິປະ​ໄຕ ​ໃນ​ອີຈິບ ​ແລະບໍ່​ສະໜັບ ສະໜູນ​ພັກ​ນຶ່ງ​ພັກ​ດຽວ ​ຫຼື​ກຸ່​ມ​ໃດນຶ່ງ​ທັງ​ສິ້ນ.

ທ່ານ Obama ຍັງ​ໄດ້​ກ່າວ​ວ່າ ທ່ານ​ມີ​ຄວາມ​ວິຕົກ​ຢ່າງ​ສູງ ກ່ຽວ​ກັບ​ຄວາມ​ຮຸນ​ແຮງ​ດັ່ງກ່າວນີ້ ​ໂດຍສະ​ເພາະ​ໃນ​ເລື່ອງ​ການ​ໂຈ​ມຕີ​ທາງ​ເພດ ຕໍ່​ພວກ​ແມ່ຍິງ​ນັ້ນ.

ຂະນະ ​ດຽວ​ກັນ ຫ້ອງ​ການ​ຂອງປະທານາທິບໍດີ Morsi ​ກໍໄດ້ປະຕິ​ເສດ ​ບໍ່​ຍອມຮັບ​ເອົາ​ ຄໍາ​ຂາດຈາກ​ກອງທັບໃນ​ວັນ​ຈັນ​ວານ​ນີ້ ທີ່​ບອກໃຫ້​ທາງ​ປະທານາທິບໍດີ​ແລະບັນດາ​ຜູ້​ນໍາ​ ​ຝ່າຍ​ຄ້ານ ຫາ​ທາງແກ້​ໄຂຄວາມ​ແຕກ​ຕ່າງກັນ​ ພາຍ​ໃນ 48 ຊົ່ວ​ໂມງ ​ແລະ​ໃຫ້​ຕົກລົງກັນ ​ໃຫ້ໄດ້ກ່ຽວ​ກັບ​ເສັ້ນທາງກ້າວ​ເດີນ​ໄປ​ຂ້າງ​ໜ້າ.