ອີຈິບໄດ້ເນລະເທດ ນັກຂ່າວຄົນນຶ່ງຂອງສື່ຂ່າວ Al Jazeera
ກັບຄືນບ້ານເກີດ ຄືອອສເຕຣເລຍ ໃນວັນອາທິດວານນີ້ ໂດຍ
ປ່ອຍໂຕຜູ້ກ່ຽວຈາກການຄຸມຂັງ ດົນກວ່າປີນຶ່ງມາແລ້ວ ຫຼັງຈາກ
ທີ່ໄດ້ຖືກຕັດສິນວ່າ ມີຄວາມຜິດໃນຂໍ້ຫາໃຫ້ການຊ່ອຍເຫຼືອ ພັກ
ພະລາດອນພາບມຸສລິມ ຫຼື Muslim Brotherhood ທີ່ໄດ້ຖືກ
ທາງການຫ້າມເຄື່ອນໄຫວນັ້ນ.
ທ່ານ Peter Greste ເດີນທາງອອກຈາກນະຄອນຫລວງ
Cairo ນຳຖ້ຽວບິນໄປຍັງປະເທດເກາະ Cyprus ແລ້ວບິນຕໍ່ໄປ
ຍັງອອສເຕຣເລຍ ຫຼັງຈາກບັນດາເຈົ້າໜ້າທີ່ອີຈິບ ກ່າວວ່າ ປະທາ
ນາທິບໍດີ Abdel Fattah el-Sissi ໄດ້ອະນຸມັດການເນລະເທດ
ຜູ້ກ່ຽວ.
ນັກຂ່າວດັ່ງກ່າວ ຖືກຈຳຄຸກມາໄດ້ 400 ມື້ແລ້ວ. ໃນປີກາຍນີ້ ຜູ້ກ່ຽວຖືກຕັດສິນລົງໂທດ
ຈຳຄຸກເປັນເວລາ 7 ປີ ໃນຂໍ້ຫາຕ່າງໆ ທີ່ກ່ຽວພັນກັບການກໍ່ການຮ້າຍ. ໃນຂະນະທີ່ ທ່ານ
Greste ໄດ້ຮັບອິດສະຫລະພາບນັ້ນ ເຈົ້າໜ້າທີ່ຮັກສາຄວາມສະຫງົບອີຈິບຄົນນຶ່ງ ກ່າວ
ວ່າ ນັກຂ່າວຂອງສື່ຂ່າວ Al Jazeera ຄົນທີສອງ ຊຶ່ງເປັນຊາວການາດາເຊື້ອສາຍອີຈິບ
ທ່ານ Mohammed Fahmy ທີ່ໄດ້ຖືກຈັບໂຕໄປ ພ້ອມກັນກັບທ່ານ Greste ໃນເດືອນ
ທັນວາ ປີ 2013 ນັ້ນ ອາດຈະຖືກເນລະເທດກັບໄປການາດາ ພາຍໃນບໍ່ເທົ່າໃດມື້ ຂ້າງ
ໜ້ານີ້. ຜູ້ກ່ຽວ ແມ່ນຍັງພວມຮັບໃຊ້ໂທດຈຳຄຸກ 7 ປີເຊັ່ນກັນ.
ແຕ່ຫາກວ່າ ບໍ່ມີຂ່າວຄາວກ່ຽວກັບຊະຕາກຳຂອງ ທ່ານ Mohammed Baher ຊາວອີຈິບ
ຜູ້ທີ່ໄດ້ຖືກຕັດສິນໂທດຈຳຄຸກ 10 ປີ ໃນຖານ ມີກະສອບລູກປືນ ທີ່ຖືກຍິງໄປແລ້ວ
ໃນຄອບຄອງ ພ້ອມກັບຂໍ້ຫາອື່ນໆ.
ບັນດາເຈົ້າໜ້າທີ່ອີຈິບ ໄດ້ກ່າວຫາພວກຄົນທັງສາມວ່າ ສະໜອງເວທີໃຫ້ແກ່ ພັກພາລາ
ດອນພາບມຸສລິມ ຂອງອະດີດປະທານາທິບໍດີ Mohammed Morsi ຊຶ່ງເວລານີ້ ໄດ້ຖືກ
ປະກາດວ່າເປັນອົງກອນກໍ່ການຮ້າຍ. ແຕ່ເຈົ້າໜ້າທີ່ ບໍ່ໄດ້ສະໜອງຫຼັກຖານທີ່ຈະແຈ້ງ.
ນັກ ຂ່າວທັງສາມ ແລະ ບັນດາຜູ້ສະໜັບສະໜຸນ ຢືນຢັນວ່າ ພວກເຂົາເຈົ້າ ພາກັນປະຕິບັດ ໜ້າທີ່ຂອງຕົນເທົ່ານັ້ນ ໃນລະຫວ່າງເວລາ ທີ່ຄວາມຮຸນແຮງລະເບີດຂຶ້ນ.
