ລິ້ງ ສຳຫລັບເຂົ້າຫາ

ຊາວອີຈິບ ລໍຖ້າຟັງ ຜົນການເລືອກຕັ້ງ ສະພາແຫ່ງຊາດ (ເບິ່ງວີດີໂອແລະສະໄລດ໌)


ເມືອງ Fayoum ຊຶ່ງເປັນເມືອງທີ່ຕັ້ງຢູ່ທາງທິດໃຕ້ຂອງນະຄອນຫຼວງໄຄໂຣ ແລະເປັນປ້ອມທີ່ໝັ້ນຂອງພວກນິຍົມ ແນວທາງເດີມອິສລາມ ເວລານີ້ປາກົດວ່າ ພວມປາຖະໜາຢາກໃຫ້ມີການແກ້ໄຂໂຕຈິງ ຕໍ່ບັນຫາຂອງປະເທດ (30 ພະຈິກ 2011)

ບັນດາຜູ້ມີສິດປ່ອນບັດຊາວອີຈິບ ພວມລໍຖ້າຟັງ ຜົນການເລືອກຕັ້ງສະພາແຫ່ງຊາດທີ່ສຳຄັນ
ເທື່ອທຳອິດທີ່ຈະມີການເປີດເຜີຍໃຫ້ຊາບໃນວັນພະຫັດມື້ນີ້ ນຶ່ງມື້ຊັກຊ້າກວ່າທີ່ໄດ້ມີການວາງ
ແຜນໄວ້ໃນຂັ້ນຕົ້ນນັ້ນ.

ພັກອິດສະຫຼະພາບແລະຄວາມຍຸຕິທຳ ຊຶ່ງເປັນພັກການເມືອງຂອງກຸ່ມພະລາດອນພາບມຸສ
ລິມທີ່ມີອິດທິພົນຂອງອີຈິບກ່າວວ່າ ພັກຂອງຕົນມີຄະແນນສຽງນຳໜ້າ ລຸນຫຼັງທີ່ໄດ້ມີການ
ປ່ອນບັດແບບສັນຕິໃນມື້ວັນຈັນແລະວັນອັງຄານຜ່ານມາ. ແຕ່ພັກດັ່ງກ່າວພວມປະເຊີນກັບ
ການແຂ່ງຂັນໃໝ່ຈາກພັກ al-Nur ຊຶ່ງເປັນກຸ່ມນິຍົມແນວທາງເດີມຈັດທີ່ສະມາຊິກເດີນຕາມ
ແນວທາງຂອງນິກາຍ Salafi ທີ່ເຄັ່ງຄັດຂອງສາສະໜາອິສລາມຕະຫຼອດທັງເປັນຜູ້ໃຫ້ການ
ສະໜັບ ສະໜຸນຕໍ່ພັກການເມືອງນ້ອຍອື່ນໆ.

ພັກອິດສະຫຼະພາບແລະຄວາມຍຸຕິທຳ ໄດ້ທ້າທາຍຕໍ່ພວກທະຫານອີຈິບທີ່ປົກຄອງປະເທດ
ຢູ່ໃນເວລານີ້ໂດຍກ່າວອ້າງວ່າ ການໄປປ່ອນບັດເປັນຈຳນວນຫຼວງຫຼາຍແມ່ນໃຫ້ຄວາມສຳ
ຄັນຕໍ່ການຮຽກຮ້ອງຕ້ອງການຂອງມະຫາຊົນ ທີ່ຢາກໃຫ້ມີການປົກຄອງແບບພົນລະເຮືອນ. ຄະນະພວກຜູ້ນຳທະຫານໄດ້ກ່າວ ຊົມເຊີຍຮອບທຳອິດຂອງການເລືອກຕັ້ງວ່າ ປະສົບກັບ
ຄວາມສຳເລັດ.

ເລຂາທິການໃຫຍ່ຂອງອົງການສະຫະປະຊາຊາດທ່ານ Ban Ki-moon ໄດ້ສະແດງຄວາມ ຍິນດີຕໍ່ປະຊາຊົນຊາວອີຈິບຕໍ່ອັນທີ່ທ່ານເອີ້ນວ່າ ການປະກອບສ່ວນຢ່າງກະຕືລືລົ້ນເຂົ້າຮ່ວມ
ໃນການເລືອກຕັ້ງ.

ລັດຖະມົນຕີການຕ່າງປະເທດສະຫະລັດທ່ານນາງ Hillary Clinton ກໍໄດ້ສະແດງຄວາມ
ປິຕິຍິນດີກັບປະຊາຊົນຊາວອີຈິບ ໃນການເລີ່ມຕົ້ນຂັ້ນຕອນການປ່ອນບັດ ທີ່ສະຫງົບແລະ
ສຳເລັດຜົນ. ທ່ານນາງເວົ້າວ່າ ຊາວອີຈິບແມ່ນພາກພູມໃຈທີ່ ໄດ້ເລີ່ມຕົ້ນໃນຂັ້ນຕອນການ
ເລືອກເອົາ ຄະນະຜູ້ນຳໃໝ່ຂອງພວກເຂົາເຈົ້າ. ທ່ານນາງເວົ້າວ່າ ຊາວອະເມຣິກັນຈະສືບຕໍ່ ໃຫ້ການສະໜັບສະໜຸນຕໍ່ຊາວອີຈິບ ໃນຂະນະທີ່ພວກເຂົາເຈົ້າກ້າວໄປສູ່ການມີລັດຖະບານ ພົນລະເຮືອນທີ່ໄດ້ຖືກເລືອກ ຢ່າງເປັນປະຊາທິປະໄຕ ທີ່ໃຫ້ການເຄົາລົບນັບຖືແກ່ສິດທິມະ
ນຸດສາກົນ ແລະຈະສະໜອງຕອບຕໍ່ຄວາມໄຝ່ຝັນຂອງພວກເຂົາເຈົ້າຢ່າງມີກຽດສັກສີ ມີອິດ
ສະຫຼະພາບ ແລະມີຊີວິດການເປັນຢູ່ທີ່ດີຂຶ້ນ.

ການເລືອກຕັ້ງຄັ້ງປະວັດສາດທີ່ວ່ານີ້ຈະເປັນຜູ້ກຳນົດວ່າ ອີຈິບຈະເຄື່ອນໄຫວໄປຈາກເສັ້ນ
ທາງການປົກຄອງແບບຜະເດັດການ ທີ່ບໍ່ມີສາສະໜາເຂົ້າມາກ່ຽວຂ້ອງ ເປັນເວລາຫຼາຍໆ
ທົດສະວັດນັ້ນຫຼືບໍ່ ແລະຫັນໄປສູ່ທິດທາງທີ່ແຕກຕ່າງຊຶ່ງບາງທີອາດຈະເປັນເສັ້ນທາງຂອງ ສາສະໜາອິສລາມກໍເປັນໄດ້.

XS
SM
MD
LG