ອີຈິບເລີ້ມທໍາການດໍາເນີນຄະດີອະດີດປະທານາທິບໍດີ ໂຮສນີ ມູບາຣັກ ທີ່ໄດ້ໄປມີໜ້າຢູ່
ໃນສານໃນວັນພຸດມື້ນີ້ ຊຶ່ງເປັນເວລາເກືອບ 6 ເດືອນຫລັງຈາກທ່ານຖືກໂຄ່ນລົ້ມໃນ
ການປະຕິວັດຂອງມະຫາຊົນເປັນເວລາ 18 ມື້ ທີ່ຮຽກຮ້ອງໃຫ້ມີການປະຕິຮູບໄປສູ່ລະ
ບອບປະຊາທິປະໄຕນັ້ນ.
ທ່ານມູບາຣັກ ໄດ້ປະຕິເສດຢ່າງເດັດຂາດຕໍ່ຂໍ້ກ່າວຫາທັງໝົດຕໍ່ທ່ານໃນການດໍາເນີນຄະ
ດີທີ່ກຸງໄຄໂຣ ຊຶ່ງໃນລະຫວ່າງການດໍາເນີນຄະດີນັ້ນ ທ່ານໄດ້ນັ່ງອີງເທີ້ງຢູ່ເທິງຕຽງໂຮງ
ໝໍຢູໃນຄອກໃຫຍ່ໆອັນນຶ່ງທີ່ໄດ້ສ້າງ ຂຶ້ນຢູ່ທາງໜ້າສານສໍາລັບໃຫ້ພວກຈໍາເລີຍທັງໝົດ
ເຂົ້າໄປຢູໃນນັ້ນ.
ອະດີດຜູ້ນໍາອີຈິບຖືກກ່າວຫາວ່າ ອອກຄໍາສັ່ງໃຫ້ເຂັ່ນຂ້າພວກປະທ້ວງຕໍ່ຕ້ານລັດຖະບານ
ໃນລະຫວ່າງການປະຕິວັດ ທີ່ໄດ້ປົດທ່ານອອກຈາກຕໍາແໜ່ງ. ປະຊາຊົນຈໍານວນເກືອບ
900 ຄົນໄດ້ເສຍຊີວິດໄປໃນລະຫວ່າງການລຸກຮືຂຶ້ນຕໍ່ຕ້ານລັດຖະບານຄັ້ງນັ້ນ.
ທ່ານມູບາຣັກປະເຊີນກັບການລົງໂທດປະຫານຊີວິດ ຖ້າຖືກສານຕັດສິນວ່າມີຄວາມຜິດແທ້.
ນອກນັ້ນທ່ານຍັງຖືກກ່າວຫາຖານທໍາການສໍ້ລາດບັງຫລວງ ໃຊ້ອໍານາດເກີນຂອບເຂດ
ແລະໃຊ້ຈ່າຍເງິນຫລວງຢ່າງຟຸມເຟືອຍ.
ລູກຊາຍຂອງທ່ານ 2 ຄົນ ຄືທ້າວ Alaa ແລະທ້າວ Gamal ທີ່ຖືກດໍາເນີນຄະດີໃນ
ວັນພຸດມື້ນີ້ເຊ່ນກັນ ຢືນຢູ່ຄຽງຂ້າງທ່ານມູບາຣັກ ແລະໄດ້ເວົ້າລົມກັບທ່ານໃນລະຫວ່າງ
ການພິຈາລະນາຄະດີ. ພວກລູກຊາຍທັງສອງໄດ້ປະຕິເສດຕໍ່ຂໍ້ກ່າວຫາຕໍ່ເຂົາເຈົ້າທຸກຢ່າງ.
ພວກຝູງຊົນພາກັນໂຮມຊຸມນຸມ ຢູ່ຂ້າງນອກສານ ແລະພາກັນເບິ່ງການດໍາເນີນຄະດີໃນຈໍ
ໂທລະພາບຂະໜາດໃຫຍ່. ມີຕໍາຫລວດຫລາຍຮ້ອຍຄົນຢືນຍາມຢູ່ທາງນອກສານ ບ່ອນທີ່
ໃນຕອນນຶ່ງພວກສະໜັບສະໜຸນແລະພວກຄັດຄ້ານທ່ານມູບາຣັກ ໄດ້ແກວ່ງກ້ອນຫີນໃສ່
ກັນ.
ພວກຈໍາເລີຍອື່ນໆທີ່ຖືກດໍາເນີຄະດີໃນວັນພຸດມື້ນີ້ ແມ່ນຮວມທັງອະດີດລັດຖະມົນຕີກະຊວງ
ພາຍໃນຂອງລັດຖະບານທ່ານມູບາຣັກ ຜູ້ບັນຊາການຕໍາຫລວດ 6 ທ່ານ ແລະນັກທຸລະກິດ
ທ່ີມີຊື່ສຽງຄົນນຶ່ງທີ່ຖືກດໍາເນີນຄະດີລັບຫລັງນັ້ນ. ທ່ານມູບາຣັກໄດ້ຖືກກັກບໍລິເວນໃຫ້ຢູ່ໃນ
ບ້ານເຮືອນ ທີ່ສະຖານທີ່ຕາກອາກາດ Sham el-Sheikh ແຄມທະເລແດງ ພ້ອມກັບ
ຄອບຄົວຂອງທ່ານ ມາຕັ້ງແຕ່ຖືກໂຄ່ນລົ້ມ.
ອໍານາດຕຸລາການຂອງອີຈິບໄດ້ຍ້າຍບ່ອນດໍາເນີນຄະດີມາຍັງໂຮງຮຽນນາຍຮ້ອຍຕໍາຫລວດ
ໃນກຸງໄຄໂຣ ຍ້ອນເຫດຜົນດ້ານຄວາມປອດໄພ.
ເບິ່ງວີດີໂອ ການດໍາເນີນຄະດີໃນສານ ເປັນພາສາອາຣັບ
