ລິ້ງ ສຳຫລັບເຂົ້າຫາ

ວັນສຸກ, ໑໒ ເມສາ ໒໐໒໔

ໂຮງ​ງານ​ຜະ​ລິດ​ໄຂ່​ ປິດ​ຊົ່ວ​ຄາວ ຫຼັງ​ຈາກ​ຖືກກວດ​ພົບ​ໄຂ້​ຫວັດ​ນົກ H5N1


ຫຼອດ​ທົດ​ລອງ​ຕິດ​ເຄື່ອງ​ໝາຍ "ໄຂ້​ຫວັດ​ນົກ" ຫຼື "Bird Flu" ແລະ ໄຂ້ ທີ່ອອກມາເປັນບວກ, ວັນທີ 14 ມັງ​ກອນ, 2023.
ຫຼອດ​ທົດ​ລອງ​ຕິດ​ເຄື່ອງ​ໝາຍ "ໄຂ້​ຫວັດ​ນົກ" ຫຼື "Bird Flu" ແລະ ໄຂ້ ທີ່ອອກມາເປັນບວກ, ວັນທີ 14 ມັງ​ກອນ, 2023.

ຜູ້​ຜະ​ລິດ​ໄຂ່​ສົດ​ແຫ່ງ​ນຶ່ງ​ໃນ ສະ​ຫະ​ລັດ ໄດ້​ປິດ​ໂຮງ​ງານ​ລົງ​ຊົ່ວ​ຄາວ​ໃນ​ລັດ ເທັກ​ຊັ​ສ ທີ່​ຕັ້ງ​ຢູ່​ພາກ​ຕາ​ເວັນ​ຕົກ​ສຽງ​ໃຕ້ ຫຼັງ​ຈາກໄຂ້​ຫວັດ​ນົກ​ສາຍ​ພັນ H5N1 ຖືກກວດ​ພົບ​ໃນ​ໄກ່.

ບໍ​ລິ​ສັດ Cal-Maine Foods ໄດ້​ອ​ອກ​ຖະ​ແຫຼງ​ການ​ສະ​ບັບ​ນຶ່ງ ​ໃນ​ວັນ​ອັງ​ຄານ​ວານນີ້​ວ່າ ເຂົາ​ເຈົ້າ​ໄດ້​ທຳ​ລາຍ​ໄກ່​ແມ່​ໄຂ່​ ປະ​ມານນຶ່ງ​ລ້ານ​ຫົກ​ແສນ​ໂຕ ແລະ ໄກ່​ແມ່​ໜຸ່ມ 337,000 ໂຕ, ເທົ່າ​ກັບ 3.6 ເປີ​ເຊັນ​ຂອງ​ຝູງ​ໄກ່​ຂອງ​ເຂົາ​ເຈົ້າ​ທັງ​ໝົດ​, ຫລັງ​ຈາກ​ໄວ​ຣັ​ສ​ດັ່ງ​ກ່າວ ​ຖືກ​ກວດ​ພົບ​ຢູ່​ໂຮງ​ງານ​ນັ້ນ.

ບໍ​ລິ​ສັດ​ດັ່ງ​ກ່າວ​ເວົ້າ​ວ່າ ​ເຂົາ​ເຈົ້າ​ກຳ​ລັງ​ເຮັດ​ວຽກ​ກັບ​ບັນ​ດາ​ເຈົ້າ​ໜ້າ​ທີ່​ລັດ​ຖະ​ບານ​ໃນ​ທຸກ​ລະ​ດັບ ແລະ ກຸ່ມ​ອຸດ​ສາ​ຫະ​ກຳ​ອື່ນໆ​ເພື່ອ “ຫຼຸດ​ຜ່ອນ​ຄວາມ​ສ່ຽງ​ຂອງ​ການ​ລະ​ບາດ​ໃນ​ອະ​ນາ​ຄົດ.” ບໍ​ລິ​ສັດ​ໄດ້​ກ່າວ​ວ່າ​ມັນ​ບໍ່​ມີ​ຄວາມ​ສ່ຽງ​ທີ່​ກ່ຽວ​ຂ້ອງ​ກັບ​ໄຂ້​ຫວັດ​ໃນ​ໄຂ່, ແລະ ບໍ່​ມີ​ໄຂ່​ໜ່ວຍ​ໃດ​ຖືກ​ຮຽກ​ເກັບ​ຄືນ.

ການ​ປະ​ກາດ​ຂອງວັນ​ອັງ​ຄານ​ວານນີ້​ ໄດ້​ມີ​ຂຶ້ນ​ນຶ່ງວັນຫຼັງ​ຈາກ​ບັນ​ດາ​ເຈົ້າ​ໜ້າ​ທີ່​ສາ​ທາ​ລະ​ນະ​ສຸ​ກ​ຂອງ​ລັດ ເທັກ​ຊັ​ສ ໄດ້​ປະ​ກາດ​ວ່າ ​ຄົນ​ຜູ້​ນຶ່ງ​ທີ່​ເຮັດ​ວຽກ​ຢູ່​ຟາມ​ນົມ​ກັບ​ງົວ​ທີ່​ຕິດ​ໄຂ້​ວັດ​ນົກ​ຖືກກວດ​ພົບ​ເປັນ​ຜົນ​ບວກ​ສຳ​ລັບ​ໄວ​ຣັ​ສ​ນັ້ນ. ສູນ​ກາງ​ເພື່ອ​ການ​ຄວບ​ຄຸມ​ພະ​ຍາດ ສະ​ຫະ​ລັດ ໄດ້​ກ່າວ​ວ່າ ນີ້​ແມ່ນ​ກໍ​ລະ​ນີ​ທຳ​ອິດ​ທີ່​ຄົນ​ໄດ້​ຕິດ​ໄຂ້​ຫວັດ​ຈາກ​ງົວ​ນົມ.

ຄົນ​ນຶ່ງ​ໃນ​ລັດ ໂຄ​ໂລ​ຣາ​ໂດ ທາງ​ພາກ​ຕາ​ເວັນ​ຕົກ​ຂອງ​ປະ​ເທດ​ຖືກກວດ​ພົບ​ເປັນ​ຜົນ​ບວກ​ສຳ​ລັບ​ໄຂ້​ຫວັດ​ນົກ​ໃນ​ປີ 2022 ຫຼັງ​ຈາກ​ລາວ​ໄດ້​ສຳ​ຜັດ​ໂດຍ​ກົງ​ກັບ​ສັດ​ປີກ ແລະ ການຄັດ​ເລືອກ​ນົກຕ່າງໆອອກ.

ກະ​ຊວງ​ກະ​ສິ​ກຳ​ຂອງ ສະ​ຫະ​ລັດ ໄດ້​ປະ​ກາດ​ການ​ລະ​ບາດ​ຂອງ​ໄຂ້​ຫວັດ​ນົກ​ໃນ​ງົວ​ນົມ 11 ຝູງ​ຢູ່​ທົ່ວ​ລັດ ເທັກ​ຊັ​ສ, ແຄນ​ຊັ​ສ, ມິ​ຊິ​ແກນ ແລະ ນິວ ເມັກ​ຊິ​ໂກ.

ອ່ານ​ຂ່າວນີ້​ເປັນ​ພາ​ສາ​ອັງ​ກິດ

ຟໍຣັມສະແດງຄວາມຄິດເຫັນ

XS
SM
MD
LG