ທ່ານຄໍາໃບ ດໍາລັດ ເຈົ້າແຂວງໆຄໍາມ່ວນ ໄດ້ຖະແຫລງຢືນຢັນວ່າໂຄງການເຂື່ອນນໍ້າເທີນ 2 ໄດ້ສ້າງຜົນປະໂຍດໃຫ້ກັບປະຊາຊົນໃນແຂວງຄໍາມ່ວນ ແລະແຂວງໄກ້ຄຽງຢ່າງຫລວງ ຫລາຍໂດຍສະເພາະແມ່ນປະຊາຊົນ 6,000 ກວ່າຄົນທີ່ຖືກຍ້າຍຈາກ 16 ບ້ານໃນເຂດເມືອງນາກາຍແລະເມືອງຍົມມະລາດທີ່ໄດ້ຮັບຜົນກະທົບຈາກ ການກໍ່ສ້າງເຂື່ອນນໍ້າເທີນ 2 ນັ້ນມາເຖິງປັດຈຸບັນນີ້ກໍປາກົດວ່າມີຊີວິດການເປັນຢູ່ທີ່ດີຂຶ້ນຈາກເມື່ອກ່ອນໃນທຸກໆດ້ານ. ທັງນີ້ ໂດຍບໍ່ວ່າຈະເປັນການມີເຮືອນຢູ່ຢ່າງຖາວອນໃນເຂດຈັດສັນໃໝ່ ການມີນໍ້າທີ່ສະອາດ ການມີໄຟຟ້າໃຊ້ຢ່າງທົ່ວເຖິງ. ສ່ວນເດັກນ້ອຍໃນໄວຮຽນກໍໄດ້ເຂົ້າຮຽນຢ່າງຄົບຖ້ວນ ແລະຍາມເຈັບປ່ວຍກໍມີໂຮງໝໍ ທີ່ພ້ອມຈະໃຫ້ການຮັກສາປິ່ນປົວຕະຫລອດເວລາ. ສ່ວນປະຊາ ຊົນທີ່ຢູ່ເຂດຮອບອ່າງນໍ້າກໍຍັງໄດ້ຜົນປະໂຫຍດຈາກການຫາປາ ແລະປະຊາຊົນທີ່ຢູ່ເຂດຕອນລຸ່ມຂອງຕົວເຂື່ອນ ກໍຍັງໄດ້ໃຊ້ນໍ້າເພື່ອປະໂຫຍດໃນດ້ານກະສິກໍາອີກດ້ວຍ.
ແຕ່ຢ່າງໃດກໍຕາມ ເນື່ອງຈາກວ່າປະຊາຊົນ 6,000 ກວ່າຄົນຫລື 1,282 ຄອບຄົວທີ່ຖືກຍົກຍ້າຍອອກຈາກເຂດກໍ່ສ້າງເຂື່ອນນໍ້າເທີນ 2 ຕ່າງໄດ້ຮັບການຈັດສັນທີ່ດິນທໍາກິນພຽງແຕ່ 0.6 ເຮັກຕ້າ ຕໍ່ຄອບຄົວເທົ່ານັ້ນ ຈຶ່ງເຮັດໃຫ້ເກີດບັນຫາທີ່ດິນທໍາກິນບໍ່ພຽງພໍສໍາລັບຄອບຄົວຂະໜາດໃຫຍ່.
ນອກຈາກນີ້ ກໍຍັງປະກົດວ່າໃນບາງໝູ່ບ້ານຈັດສັນໃໝ່ນັ້ນ ຍັງຕ້ອງຜະເຊີນກັບບັນຫາຂາດ
ແຄນນໍ້າສໍາລັບການປູກພືດອີກດ້ວຍ ດັ່ງທີ່ປະຊາຊົນລາວຜູ້ນຶ່ງໃນບ້ານຈັດສັນໃໝ່ແຫ່ງນຶ່ງ
ໄດ້ໃຫ້ການອະທິບາຍເຖິງສະພາບການທີ່ເກີດຂຶ້ນດັ່ງກ່າວນີ້ວ່າ:
“ພື້ນທີ່ 0.6 ເຮັກຕ້າທີ່ເພີ່ນ ມອບໃຫ້ ນັ້ນຫລະ ນໍ້າປະປາບໍ່ທັນເຂົ້າມາແລ້ວພວກເຮົາກໍຍັງຜະຫລິດບໍ່ໄດ້ຍ້ອນບໍ່ມີນໍ້າ ຈຶ່ງຢາກໃຫ້ເພິ່ນຊ່ອຍບ່ອນວ່າ ນຶ່ງກະແມ່ນວ່າຢາກໃຫ້ເພີ່ມເນື້ອທີ່ປູກຝັງ ເພາະວ່າດິນ 0.6 ເຮັກຕ້ານັ້ນ ຜູ້ທີ່ຄອບຄົວນ້ອຍ ກະແມ່ນກຸ້ມກິນ ຄືຄອບຄົວຂອງປ້ານີ້ມີ 11 ຄົນ ກະແມ່ນບໍ່ກຸ້ມກິນ ຈຶ່ງຢາກໃຫ້ເພິ່ນເພີ່ມທີ່ດິນທໍາກິນໃຫ້ນັ້ນແຫລະ”
ຊຶ່ງຕໍ່ກໍລະນີບັນຫາດັ່ງກ່າວນີ້ ທ່ານຄໍາໃບ ກໍໄດ້ຢືນຢັນວ່າອໍານາດປົກຄອງແຂວງຄໍາມ່ວນນັ້ນ
ບໍ່ໄດ້ນິ່ງນອນໃຈແຕ່ຢ່າງໃດ, ຫາກແຕ່ໄດ້ຈັດຕຽມທີ່ດິນໄວ້ສໍາລັບຈັດສັນເພີ່ມຕື່ມໃຫ້ແກ່ປະຊາ
ຊົນເຫລົ່ານີ້ແລ້ວ ກໍຄືການຈັດສັນພື້ນທີ່ 3 ເຮັກຕ້າ ສຳລັບປູກຕົ້ນໄມ້ ກັບອີກ 5 ເຮັກຕາ
ສຳລັບລ້ຽງສັດ ໃຫ້ແຕ່ລະຄອບຄົວ ລວມທັງຍັງຈະຂະຫຍາຍພື້ນທີ່ ທີ່ຮອງຮັບນໍ້າຈາກຄອງ
ຊົນລະປະທານໃຫ້ໄດ້ອີກກວ່າ 7,000 ເຮັກຕ້າອີກດ້ວຍ ຊຶ່ງກໍຈະເຮັດໃຫ້ປະຊາຊົນໃນເຂດ
ຈັດສັນ ທັງ 1,282 ຄອບຄົວດັ່ງກ່າວມີທີ່ດິນທໍາກິນລວມກັນ ກວ້າງກວ່າ 24,000 ເຮັກ ຕ້າ.
ໂຄງການເຂື່ອນນໍ້າເທີນ 2 ໄດ້ເລີ່ມຜະຫລິດກະແສໄຟຟ້າ ສົ່ງຂາຍໃຫ້ການໄຟຟ້າຝ່າຍຜະ
ຫລິດແຫ່ງປະເທດໄທ (EGAT) ນັບຕັ້ງແຕ່ເດືອນມີນາປີນີ້ເປັນຕົ້ນມາ ໂດຍມີສັນຍາ 25
ປີ ຊຶ່ງກໍຈະເຮັດໃຫ້ລັດຖະບານລາວມີລາຍຮັບຈາກຄ່າສໍາປະທານແລະພາສີອາກອນຕ່າງໆ
ລວມກັນເຖິງ 2,000 ລ້ານໂດລາ ທີ່ທາງການລາວໄດ້ປະກາດວ່າ ຈະນໍາໄປໃຊ້ເປັນງົບປະ
ມານສໍາລັບດໍາເນີນໂຄງການພັດທະນາຕ່າງໆ ເພື່ອແກ້ໄຂບັນຫາທຸກຈົນຂອງປະຊາຊົນລາວ
ເປັນສໍາຄັນ.
