ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ເອກົວດໍ ສິ້ນສຸດການອອກ ຟຣີ-ວີຊາ ໃຫ້ແກ່ປະຊາຊົນສັນຊາດຈີນ


ແຟ້ມຮູບ-ຜູ້ຍົກຍ້າຍຖິ່ນຖານຊາວຈີນ ພາກັນລຽນແຖງຂຶ້ນເຮືອໄປເມືອງ ລາຈາສ ບລັງກາສ, ລຸນຫຼັງຍ່າງຂ້າມບໍລິເວນ ດາຣຽນ ເກບ ໃນເມືອງ ບາໂຈ ຊິກິວໂຕ (Bajo Chiquito), ປະເທດປານາມາ, ວັນທີ 7 ພຶດສະພາ 2023.
ແຟ້ມຮູບ-ຜູ້ຍົກຍ້າຍຖິ່ນຖານຊາວຈີນ ພາກັນລຽນແຖງຂຶ້ນເຮືອໄປເມືອງ ລາຈາສ ບລັງກາສ, ລຸນຫຼັງຍ່າງຂ້າມບໍລິເວນ ດາຣຽນ ເກບ ໃນເມືອງ ບາໂຈ ຊິກິວໂຕ (Bajo Chiquito), ປະເທດປານາມາ, ວັນທີ 7 ພຶດສະພາ 2023.

ປະເທດເອກົວດໍ ກ່າວວ່າ ຕົນຈະໂຈະການໃຫ້ເຂົ້າປະເທດແບບບໍ່ມີວີຊາສໍາລັບພົນລະເມືອງຈີນ, ເຊິ່ງຈະເລີ້ມແຕ່ວັນທີ 1 ກໍລະກົດ ເປັນຕົ້ນໄປ, ໂດຍອ້າງເຖິງ “ຄວາມກັງວົນ” ກ່ຽວກັບການເພີ້ມຂຶ້ນໃນການຍົກຍ້າຍຖິ່ນຖານທີ່ບໍ່ປົກກະຕິ.

ໃນເມື່ອບໍ່ເທົ່າໃດປີທີ່ຜ່ານມານີ້, ເອກົວດໍ ເປັນຈຸດເລີ້ມຕົ້ນຂອງພົນລະເມືອງຈີນຫຼາຍພັນຄົນ ຜູ້ທີ່ໄດ້ຕັດສິນໃຈເດີນທາງໄລຍະຍາວ ແລະບໍ່ປອດໄພທີ່ສຸດ ຜ່ານປະເທດໃນເຂດອາເມຣິກາໃຕ້, ອາເມຣິກາກາງ ແລະ ເມັກຊິໂກ ເຂົ້າໄປບໍລິເວນຊາຍແດນທາງພາກໃຕ້ຂອງ ສະຫະລັດ.

ບາງຄົນທີ່ໄດ້ຍົກຍ້າຍເຂົ້າໄປໃນ ສະຫະລັດ ແລ້ວ ກ່າວວ່າ ການຕັດສິນໃຈຂອງເອກົວດໍ ແລະການແກ້ໄຂບັນຫາເພີ້ມຂຶ້ນຂອງ ວໍຊິງຕັນ ແລະ ປັກກິ່ງ ເພື່ອຍຸຕິການໄຫຼເຂົ້າຂອງພວກຍົກຍ້າຍຖິ່ນຖານແບບຜິດກົດຫມາຍນັ້ນ ເປັນສັນຍານທີ່ສະແດງໃຫ້ເຫັນວ່າ ປະຕູອາດຈະປິດລົງແລ້ວ ສໍາລັບຜູ້ທີ່ສະແຫວງຫາ “zouxian” ຫຼື “ຍ່າງຕາມເສັ້ນທາງ” ເນື່ອງຈາກ​ການ​ເດີນ​ທາງ​ໄດ້​ຖືກ​ອະ​ທິ​ບາຍ​ວ່າ ເປັນທີ່ນິຍົມກັນຫຼາຍໃນໝູ່ປະຊາຊົນ​ຊາວ​ຈີນ​.

ແຟ້ມຮູບ-ຜູ້ຍົກຍ້າຍຖິ່ນຖານຊາວຈີນ ພາກັນລໍຖ້າຂັ້ນຕອນການດໍາເນີນງານທາງເອກະສານ ລຸນຫຼັງຂ້າມເຂດຊາຍແດນເຂົ້າເມັກຊິໂກ, ວັນທີ 8 ພຶດສະພາ 2024, ໃກ້ກັບເມືອງຈາກຸມບາ ຮັອດ ສປຣິງ (Jacumba Hot Springs), ລັດຄາລິຟໍເນຍ.
ແຟ້ມຮູບ-ຜູ້ຍົກຍ້າຍຖິ່ນຖານຊາວຈີນ ພາກັນລໍຖ້າຂັ້ນຕອນການດໍາເນີນງານທາງເອກະສານ ລຸນຫຼັງຂ້າມເຂດຊາຍແດນເຂົ້າເມັກຊິໂກ, ວັນທີ 8 ພຶດສະພາ 2024, ໃກ້ກັບເມືອງຈາກຸມບາ ຮັອດ ສປຣິງ (Jacumba Hot Springs), ລັດຄາລິຟໍເນຍ.

ທ້າວຫວັງ ຊົງເວີ່ຍ (Wang Zhongwei), ປະຊາຊົນຊາວຈີນ ອາຍຸ 33 ປີ ຈາກແຂວງອັນຮຸຍ (Anhui), ເຂົ້າມາ ສະຫະລັດ ຕາມ “ເສັ້ນທາງຍ່າງ” ຈາກປະເທດ ເອກົວດໍ ໃນເດືອນພຶດສະພາ ປີ 2023. ລາວກ່າວວ່າ ລຸນຫຼັງການປະກາດຂອງລັດຖະບານເອກົວດໍ, ເຊິ່ງເປັນ “ການສົນທະນາລະຫວ່າງ ຄົນເຂົ້າເມືອງທີ່ຜິດກົດໝາຍ ຂອງຈີນ ຟົດເດືອດຂຶ້ນ,” ແລະນີ້ ມັນຈະມີຜົນກະທົບຢ່າງຫຼວງຫຼາຍ ເນື່ອງຈາກວ່າ ຫຼາຍກວ່າ 80 ເປີເຊັນຂອງປະຊາຊົນເຫຼົ່ານັ້ນ ແມ່ນພາກັນເດີນທາງມາໂດຍຜ່ານ ເອກົວດໍ.”

ອີງຕາມ​ສະຖິຕິຂໍ້ມູນ​ຂອງ​ດ່ານ​ພາສີ ​ແລະ​ດ່ານ​ຊາຍ​ແດນ​ຂອງ​ສະຫະລັດ, ​ການ​ພົບຄົນ​ຈີນ​ຢູ່​ຕາມຂົງເຂດ​ຊາຍ​ແດນ​ທາງພາກ​ຕາ​ເວັນ​ຕົກ​ສຽງ​ໃຕ້​ຂອງ​ສະຫະລັດ ​ມີຈໍານວນ​ເພີ້ມ​ຂຶ້ນ​ເປັນ​ປະຫວັດການ ທີ່ມີປະມານ 6,000 ຄົນ​ໃນ ​ເດືອນ​ທັນວາ ​ປີ 2023. ໃນບໍ່ເທົ່າໃດເດືອນມານີ້ ພົບວ່າ ຈໍານວນຜູ້ຍົກຍ້າຍຖິ່ນຖານເຫຼົ່ານັ້ນເລີ້ມຫຼຸດລົງມາແລ້ວ, ເຊິ່ງຫຼຸດລົງມາເປັນຈໍານວນຫຼາຍກວ່າ 3,600 ຄົນໃນເດືອນ ພຶດສະພາ ແລ້ວນີ້.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

ສົດ ລາຍການວິທະຍຸ-ໂທລະພາບ ພາກພາສາລາວ

XS
SM
MD
LG