ປະຊາຊົນຕັ້ງແຕ່ເຂດເອເຊຍຕາເວັນອອກ ໄປຮອດພາກຕາເວັນຕົກຂອງ ສະຫະລັດ ໄດ້ມີໂອກາດໄດ້ເຫັນເຫດການທີ່ບໍ່ສູ້ມີຂຶ້ນ ເວລາດວງຈັນໂຄຈອນໄປບັງໜ່ວຍຕາເວັນ ເກືອບເຕັມດວງ ແລະສ້າງວົງແຫວນແສງໄຟຂຶ້ນໃນທ້ອງຟ້າ.
ຜູ້ຄົນສາມາດເຫັນຮູບວົງແຫວນຂອງພະອາທິດໄດ້ຢ່າງຊັດແຈ້ງ ໃນຫຼາຍເຂດຂອງເອເຊຍໃນເຊົ້າວັນຈັນມື້ນີ້ ແລະໃນຕອນບ່າຍຂອງວັນອາທິດຢູ່ໃນສະຫະລັດ ເວລາດວງຈັນເຄື່ອນໄປຢູ່ລະຫວ່າງກາງໂລກກັບດວງຕາເວັນ ໂດຍບັງພະອາທິດໄວ້ເກືອບໝົດ ພາໃຫ້ເຫັນວົງແຫວນທີ່ແຈ້ງສະຫວ່າງ ອ້ອມດວງຕາເວັນທີ່ມືດຢູ່ທາງກາງນັ້ນ.
ພວກທີ່ລໍຖ້າເບິ່ງປາກົດການນີ້ ຈໍານວນເປັນຮ້ອຍໆຫຼືເປັນພັນໆຄົນພາກັນໄປຊຸມນຸມກັນຢູ່ໃນກາງທົ່ງ ແລະຢູ່ໃນຫໍເບິ່ງດວງດາວແຫ່ງຕ່າງໆໃນທົ່ວໂລກ. ຫຼາຍຄົນພາກັນໃຊ້ແວ່ນຕາພິເສດສໍາລັບເບິ່ງສຸລິຍະຄາດ ເພື່ອປ້ອງກັນຕາຂອງເຂົາເຈົ້າ ໃນລະຫວ່າງຊົມກົບກິນຕາເວັນນັ້ນ.
ທີ່ຍີ່ປຸ່ນ ໂທລະພາບໄດ້ຖ່າຍທອດສົດ ປາກົດການສຸລິຍະຄາດເກືອບເຕັມດວງນີ້.
ດວງເດືອນບົດບັງໜ່ວຍຕາເວັນ ປະມານ 95 ເປີເຊັນ ເວລາເກີດສຸລິຍະ ຄາດທີ່ເປັນວົງແຫວນແບບນີ້. ເທື່ອຫຼ້າສຸດທີ່ກົບກິນຕາເວັນເກືອບເຕັມດວງແບບນີ້ເກີດຂຶ້ນ ໃນສະຫະລັດ ແມ່ນ 18 ປີກ່ອນ.