ນັກການທູດສູງສຸດສະຫະລັດ ຄົນນຶ່ງ ປະຈຳຢູໂຣບ ກ່າວວ່າ
ປະຊາຊົນຢູ່ໃນເຂດສ່ວນໃຫຍ່ຂອງພາກຕາເວັນອອກຢູເຄຣນ
ທີ່ປະສົບກັບໄພສົງຄາມແລະເຂດ Crimea ກຳລັງດຳລົງຊີວິດ
ຢູ່ພາຍໃຕ້ “ສະພາບການ ທີ່ໜ້າຢ້ານກົວ” ຍ້ອນການຫລັ່ງໄຫຼ
ຄັ້ງໃໝ່ຂອງອາວຸດສົງຄາມຈາກຣັດເຊຍເຂົ້າໄປໃນຂົງເຂດດັ່ງ
ກ່າວ.
ລັດຖະມົນຕີຊ່ອຍວ່າການກະຊວງຕ່າງປະເທດສະຫະລັດ ທ່ານ
ນາງ Victoria Nuland ໄດ້ລາຍງານ ໃນວັນອັງຄານວານນີ້ ຕໍ່
ຄະນະກຳມະການຄວາມສຳພັນ ກັບຕ່າງປະເທດ ຂອງສະພາສູງ
ວ່າ ບັນດາລົດຖັງ ລົດຫຸ້ມເກາະ ແລະປືນໃຫຍ່ຂອງຣັດເຊຍ ໄດ້
ຫລັ່ງໄຫລຂ້າມຊາຍແດນ ຫວ່າງບໍ່ເທົ່າໃດມື້ທີ່ຜ່ານມານີ້.
ທ່ານນາງ ກ່າວວ່າ “ຣັດເຊຍ ແລະພວກຫຸ່ນກະບົດ ແບ່ງແຍກດິນແດນ ໄດ້ກໍ່ ຄວາມຮຸນ
ແຮງ ແລະປຸ້ນສະດົມຢ່າງໂຫດຮ້າຍຈົນບໍ່ສາມາດທີ່ຈະອະທິບາຍໄດ້. ນີ້ເປັນການສ້າງ
ຄວາມຂັດແຍ້ງ ທີ່ຄວບຄຸມໂດຍ ວັງ Kremlin ທີ່ໄດ້ຮັບແຮງ ຂັດດັນໂດຍລົດຖັງຣັດເຊຍ
ແລະອາວຸດໜັກຕ່າງໆ ພ້ອມທັງໄດ້ຮັບເງິນສະໜັບສະໜຸນ ຈາກເງິນພາສີຊາວຣັດເຊຍ.”
ນອກນັ້ນ ທ່ານນາງ Nuland ຍັງໄດ້ກ່າວຕໍ່ຄະນະກຳມະການວ່າ ລັດຖະບານ ທ່ານ
Obama ຍັງບໍ່ທັນໄດ້ຕັດສິນໃຈເທື່ອວ່າ ຈະສົ່ງອາວຸດສຳຫລັບໃຊ້ປ້ອງກັນໂຕ ໄປໃຫ້
ລັດຖະບານ Kyiv ຫລືບໍ່ ໃນການສູ້ລົບຕ້ານ ພວກແບ່ງແຍກດິນແດນທີ່ໜູນຫລັງໂດຍ
ຣັດເຊຍ ໃກ້ກັບຊາຍແດນຣັດເຊຍນັ້ນ. ທ່ານນາງກ່າວອີກວ່າ ການເຈລະຈາກ່ຽວກັບ
ການໃຫ້ຄວາມຊ່ວຍເຫລືອດັ່ງກ່າວ ຍັງດຳເນີນຢູ່ ໃນຂະນະທີ່ບັນດາເຈົ້າໜ້າທີ່ລັດຖະ
ບານທ່ານໂອບາມາ ຕິດຕາເບິ່ງການຢຸດຍິງ ທີ່ໄດ້ບັນລຸກັນໃນວັນທີ 15 ເດືອນກຸມພາ
ຜ່ານມາ.
ໃນເຫດການອີກດ້ານນຶ່ງນັ້ນ ເອກອັກຄະລັດຖະທູດເຢຍຣະມັນ ປະຈຳສະຫະລັດ ທ່ານ
Peter Wittig ກ່າວໃນວັນຈັນທີ່ຜ່ານມານີ້ວ່າ ປະທານາທິບໍດີ Barack Obama ໄດ້
ຕັດສິນໃຈທີ່ຈະບໍ່ສົ່ງອາວຸດຮ້າຍແຮງໄປໃຫ້ Kyiv ໃນເວລານີ້ເທື່ອ ຫລັງຈາກໄດ້ເຈລະ
ຈາຫາລືຫວ່າງມໍ່ໆມານີ້ກັບນາຍົກລັດຖະມົນຕີ ເຢຍຣະມັນ ທ່ານນາງ Angela Merkel.
