ນັບຕັ້ງແຕ່ການຮຸກຮານ ເຂົ້າໄປໃນແຫຼມ Crimea ເປັນຕົ້ນມາ, ສະຫະລັດ ໄດ້ກ່າວຫຼາຍຄັ້ງກ່ຽວກັບການຍັບຢັ້ງການຄຸກຄາມຂອງ ຣັດເຊຍ ຕໍ່ບັນດາພັນທະມິດຂອງອົງການ NATO ໃນຢູໂຣບ ຕາເວັນອອກ. ແຕ່ວ່າການຍັບຢັ້ງດັ່ງກ່າວນັ້ນ ແມ່ນເປັນແນວໃດ? ນັກຂ່າວ ວີໂອເອປະຈຳທຳນຽບ 5 ແຈ Carla Babb ໄດ້ສົນທະນາກັບຜູ້ບັນຊາ ການ ໜ່ວຍຈູ່ໂຈມທີ 2 ກອງພັນທະຫານມ້າ ຂອງກອງທັບບົກ ສະຫະລັດ. ເຊິ່ງໄດ້ກ່າວວ່າ ການຍັບຢັ້ງແມ່ນການປ້ອງກັນທີ່ສາມາດເຫັນໄດ້ ເຊິ່ງຕໍ່ໄປ ພຸດທະສອນ ມີລາຍລະອຽດ ມາສະເໜີທ່ານ.
ສິ່ງທີ່ທ່ານກຳລັງເຫັນຢູ່ນີ້ ແມ່ນບັນດາທະຫານ ຫຼາຍຮ້ອຍຄົນ ພ້ອມດ້ວຍອາວຸດທີ່ໜັກ ເປັນໂຕນໆເດີນທາງຫຼາຍພັນກິໂລແມັດຜ່ານຫຼາຍປະເທດ.
ການສະແດງກຳລັງທະຫານດັ່ງກ່າວ ແມ່ນເພື່ອໃຫ້ການຄ້ຳປະກັນແກ່ບັນດາພັນທະມິດ NATO ແລະ ປະຊາຊົນຂອງພວກເຂົາ ໃນຄວາມຢ້ານກົວ ຕໍ່ການຮຸກຮານຂອງ ຣັດເຊຍ.
ພັນເອກ John Mayer, ກອງພັນທະຫານມ້າ ຂອງ ກອງທັບບົກ ສະຫະລັດ ກ່າວວ່າ “ມັນຢູ່ບ່ອນນັ້ນແຫຼະ. ພວກເຂົາພາກັນເປັນຫ່ວງ, ພວກເຂົາໄດ້ເຫັນສິ່ງທີ່ໄດ້ເກີດຂຶ້ນຢູ່ແຫຼມ Crimea. ພວກເຂົາຕິດຕາມສິ່ງທີ່ກຳລັງເກີດຂຶ້ນຢູ່ໃນປະເທດ ຢູເຄຣນ.”
ໃນເດືອນມີນາປີນີ້ ກອງທັບສະຫະລັດໄດ້ສົ່ງຂະບວນທະຫານຂະໜາດໃຫຍ່ທີ່ແລ່ນໄລຍະ ໄກເຖິງ 2,200 ກິໂລແມັດ ຈາກປະເທດ ເອສໂຕເນຍ ໄປຫາປະເທດ ເຢຍຣະມັນ.
ໃນເດືອນ ພຶດສະພາ, ຂະບວນລົດທະຫານສະຫະລັດກໍໄດ້ເດີນທາງຜ່ານປະເທດ ໂຣເມເນຍ ໃນໄລຍະໄກກວ່າ 350 ກິໂລແມັດ.
ແລະ ພວກກອງທະຫານກໍຈະຂັບລົດຕິດອາວຸດຂອງພວກເຂົາຜ່ານປະເທດ ເຢຍຣະມັນ,
ສາທາລະນະລັດ ເຊັກ, ສໂລວາເກຍ ແລະ ຮັງກາຣີ ໃນຂະບວນລົດ ທີ່ກຳນົດຈະອອກ ເດີນທາງໃນເດືອນກັນຍາແລະ ຕຸລາ ນີ້.
ບັນດາຜູ້ຊ່ຽວຊານກ່ຽວກັບຄວາມໝັ້ນຄົງ ຢູໂຣບ ກ່າວວ່າຂະບວນລົດທະຫານແມ່ນມີຄວາມໝາຍ ຫຼາຍໄປກວ່າການຝຶກຊ້ອມຫຼາຍເທົ່ານັ້ນ, ແຕ່ມັນເປັນຄຳເຕືອນຕໍ່ ຣັດເຊຍ ວ່າ ໃຫ້ພວກເຂົາຢ່າເຂົ້າໄປຍຸ່ງກ່ຽວກັບ ບັນດາປະເທດ NATO.
ທ່ານ ນາງ Heather Conley, ຈາກສູນເພື່ອຍຸດທະສາດ ແລະ ການສຶກສາສາກົນ ກ່າວວ່າ “ພວກເຮົາກຳລັງສົ່ງຄຳເຕືອນໄປວ່າ ຢ່າເຮັດແນວນັ້ນ, ບໍ່ຕ້ອງໄປຄິດຫາມັນເລີຍ.”
ໃນບັນດາປະເທດດັ່ງກ່າວນີ້, ປະຊາຊົນທ້ອງຖິ່ນ ໄດ້ເຫັນທະຫານ ສະຫະລັດ ວ່າເປັນຜູ້ຊ່ວຍປົດປ່ອຍຕັ້ງແຕ່ສະໄໝສົງຄາມໂລກ. ແລະ ກໍເປັນຜູ້ຊ່ວຍປົກປ້ອງ ມາຈົນຮອດທຸກມື້ນີ້.
ພັນເອກ John Meyer ກ່າວວ່າ “ມັນແມ່ນສິ່ງທີ່ການສົ່ງຂະບວນລົດເປັນຕົວແທນໃຫ້. ມັນແມ່ນຄວາມຮູ້ສຶກວ່າ ສະຫະລັດແມ່ນຢູ່ທີ່ນີ້ແລ້ວ. ພວກເຂົາແມ່ນສະມາຊິກຂອງພັນທະມິດນີ້ ແລະ ພວກເຮົາກໍແມ່ນສະ ມາຊິກຂອງພັນທະມິດນີ້. ແລະ ໃນເມື່ອພວກເຮົາຍັງເປັນສະມາຊິກຂອງພັນທະມິດນີ້ຢູ່, ນັ້ນກໍແມ່ນສິ່ງທີ່ຈະປົກປ້ອງ ປະເທດຂອງພວກເຮົາ.”
ພັນເອກ Meyer ກ່າວວ່າ ລາວວາງແຜນທີ່ຈະຈັດສົ່ງຂະບວນລົດທະຫານທີ່ຄ້າຍຄືກັນນີ້ ອີກຫຼາຍຄັ້ງ ຕະຫຼອດປີ 2016 ເຊັ່ນກັນ.
ທ່ານກ່າວວ່າ ການໃຫ້ບັນດາພັນທະມິດ NATO ໝັ້ນໃຈຂຶ້ນຕື່ມ ແລະ ເສີມຂະຫຍາຍການ ເປັນພັນທະມິດ ແມ່ນບູລິມະສິດທີ່ຍືນຍົງ ຂອງທະຫານ ສະຫະລັດ.
