ປະຊາຊົນຊາວຕີມໍຕາເວັນອອກຫຼືຕີມໍເລັສເຕ ພາກັນໄປປ່ອນບັດເລືອກເອົາສະມາຊິກສະພາ
ແຫ່ງຊາດຊຸດໃໝ່ ລຸນຫຼັງການເລືອກຕັ້ງປະທານາທິບໍດີທີ່ຂ້ອນຂ້າງຫງຽບສະງົບສອງຮອບ
ໃນເດືອນມີນາແລະເມສາຜ່ານມາ.
ການປ່ອນບັດໄດ້ເລີ່ມຂຶ້ນໃນຕອນເຊົ້າຂອງວັນເສົາມື້ນີ້ ໃນຂັ້ນຕອນການເລືອກຕັ້ງທີ່ຄາດວ່າ
ຈະຍັງຜົນໃຫ້ມີການຖອນກຳລັງຮັກສາສັນຕິພາບອອກໄປ ພາຍໃນເດືອນທັນວາທ້າຍປີນີ້.
ມີ 21 ພັກການເມືອງ ໄດ້ສົ່ງຜູ້ສະມັກເຂົ້າແຂ່ງຂັນເອົາບ່ອນນັ່ງຢູ່ໃນສະພາແຫ່ງຊາດທີ່ມີທັງ
ໝົດ 65 ບ່ອນ. ພັກໃຫຍ່ສຸດສອງພັກແມ່ນປະກອບດ້ວຍພັກສະພາແຫ່ງຊາດເພື່ອບູລະນະ
ສ້າງສາຕີມໍ ແລະພັກ Fretilin.
ທ່ານ Damien Kingsbury ນັກຊ່ຽວຊານຊາວອິນໂດເນເຊຍທີ່ມະຫາວິທະຍາໄລ Deakin
ໃນອັອສເຕຣເລຍກ່າວວ່າ ການໂຄສະນາຫາສຽງ ໄດ້ດຳເນີນໄປດ້ວຍຄວາມສະຫງົບແບບບໍ່
ໜ້າເຊື່ອຊຶ່ງເປັນການເສີມສ້າງຄວາມແຂງແກ່ນຂຶ້ນຕື່ມໃຫ້ແກ່ລະບອບປະຊາທິປະໄຕທີ່ບອບ
ບາງຂອງຕີມໍຕາເວັນອອກ ແຕ່ທ່ານກໍຕື່ມເວົ້າວ່າ ຍັງມີບັນຫາທ້າທາຍຫຼາຍໆຢ່າງຢູ່.
ຕີມໍຕາເວັນອອກ ຊຶ່ງເປັນອະດີດອານານິຄົມ ຂອງປອກຕຸຍກາລ ໄດ້ຮັບເອກກະລາດ ໃນປີ
1975 ແຕ່ໄດ້ຖືກຍຶດຄອງໂດຍອິນໂດເນເຊຍ ມາຈົນຮອດເວລາ ບັນດາຜູ້ມີສິດປ່ອນບັດ ໄດ້
ເລືອກເອົາຄວາມເປັນເອກກະລາດໃນການລົງປະຊາມະຕິ ທີ່ຈັດຂຶ້ນໂດຍນາໆຊາດປີ 1999.
ພວກທະຫານບ້ານທີ່ນິຍົມອິນໂດເນເຊຍໄດ້ເລີ່ມທຳການປາບປາມຢ່າງນອງເລືອດເພື່ອເປັນ
ການແກ້ແຄ້ນ ທີ່ສິ້ນສຸດລົງໂດຍການຈັດສົ່ງກຳລັງຮັກສາສັນຕິພາບພາຍໃຕ້ການນຳພາຂອງ
ອັອສເຕຣເລຍເຂົ້າໄປໃນປະເທດດັ່ງກ່າວ.