ເບິ່ງວີດີໂອ ລາຍງານພາສາອັງກິດ:
ຟັງລາຍງານພາສາລາວ:
ເວລາເກີດການປະທະກັນຢ່າງຮຸນແຮງລະຫວ່າງໄທແລະກໍາປູເຈຍໃນເດືອນກຸມພາຜ່ານມາ
ກ່ຽວກັບການອ້າງເອົາກໍາມະສິດເຂດຊາຍແດນທີ່ເປັນຂໍ້ຂັດແຍ້ງກັນ ຢູ່ໃກ້ວັດປະວັດສາດຮິນ
ດູຂອງຂະເໝນແຫ່ງນຶ່ງນັ້ນ ທ່ານ Marty Natalegawa ລັດຖະມົນຕີຕ່າງປະເທດອິນໂດ
ເນເຊຍ ໄດ້ໃຊ້ຕໍາແໜ່ງປະທານສະມາຄົມອາຊ່ຽນຂອງທ່ານ ໄກ່ເກ່ຍບັນຫາຂັດແຍ້ງກັນນີ້.
ໃນລະຫວ່າງການດໍາເນີນການທູດ ແບບທຽວໄປທຽວມາ ເປັນເວລາຫລາຍເດືອນນັ້ນ
ທ່ານ ນາຕາລີກາວາ ໄດ້ກ່າວປ້ອງກັນວິທີການແກ້ໄຂບັນຫານີ້ ຜ່ານການສ້າງຄວາມເຫັນ
ພ້ອງເປັນເອກະສັນກັນຂອງສະມາຄົມອາຊ່ຽນນັ້ນ. ແຕ່ທ່ານກໍໄດ້ກ່າວເຊ່ນກັນວ່າ ພາລະ
ໜ້າທີ່ຂອງທ່ານ ແມ່ນຍາກຂຶ້ນ ຖ້າປາດສະຈາກການຂົ່ມຂູ່ຂອງການລົງໂທດທາງການ
ເມືອງ ຫລືທາງເສດຖະກິດ. ທ່ານ ນາຕາລີກາວາ ເວົ້າວ່າ:
“ການທູດນັ້ນມັນບໍ່ເປັນພຽງແຕ່ກ່ຽວກັບຄວາມກົດດັນແລະການລົງໂທດ
ເທົ່ານັ້ນ ແຕ່ມັນຍັງກ່ຽວກັບການຊຸກຍູ້ ໃຫ້ກໍາລັງໃຈກັນນໍາ. ພວກເຮົາຕ້ອງ
ໄດ້ຖ້າເບິ່ງໄປນີ້ແຫລະ. ຕອນນີ້ຍັງບໍ່ທັນມີການອອກຄໍາຕັດສິນເທື່ອ. ກັບ
ຄືນມາຫາຂ້າພະເຈົ້າອີກຈັກໜ້ອຍທ່ານກໍຈະໄດ້ຮູ້ວ່າພວກເຮົາຢູ່ໃນຂັ້ນໃດ.”
ໃນທີ່ສຸດແລ້ວ ທັງສອງປະເທດທີ່ເປັນສະມາຊິກສະມາຄົມອາຊ່ຽນກໍຕົກລົງຢຸດຍິງກັນ ແຕ່
ທ່ານນາຕາລີກາວາ ກໍບໍ່ສາມາດຈັດຕັ້ງປະຕິບັດແຜນການດັ່ງກ່າວ ທີ່ຮຽກຮ້ອງໃຫ້ກໍາລັງ
ຮັກສາສັນຕິພາບອິນໂດເນເຊຍໄປປະຈໍາການ ຢູ່ໃນເຂດຂັດແຍ້ງກັນນັ້ນ.
ຢ່າງໃດກໍຕາມ ວິທີການທູດດັ່ງກ່າວນັ້ນ ໄດ້ເຮັດໃຫ້ສະມາຄົມອາຊ່ຽນ ແລະກອງປະຊຸມ
ສຸດຍອດເອເຊຍຕາເວັນອອກ ຂອງອາຊ່ຽນ ມີຄວາມສໍາຄັນຫລາຍຂຶ້ນນັບມື້ ສໍາລັບຂົງ
ເຂດທີ່ມີປະຊາຊົນປະມານເຄິ່ງນຶ່ງຂອງປະຊາກອນທັງໝົດຂອງໂລກ ແລະມີຫລາຍໆ
ປະເທດທີ່ມີເສດຖະກິດທີ່ ເຕີບໂຕຢ່າງໄວທີ່ສຸດຂອງຂົງເຂດ. ພວກເຈົ້າໜ້າທີ່ສະຫະລັດ
ໄດ້ເອີ້ນ ຂົງເຂດເອເຊຍປາຊິຟິກ ຢູ່ເປັນປະຈໍາວ່າ ເປັນຂົງເຂດນຶ່ງທີ່ສໍາຄັນທີ່ສຸດສໍາລັບ
ຜົນປະໂຫຍດຂອງສະຫະລັດໃນອີກຫລາຍສິບປີຕໍ່ໜ້າ.
ທີ່ກອງປະຊຸມສະມາຄົມອາຊ່ຽນຄັ້ງຜ່ານມາ
ໃນເດືອນກໍລະກົດ ທ່ານນາຕາລີກາວາໄດ້
ສະແດງຄວາມຍິນດີ ນໍາຂໍ້ຕົກລົງກັນລະ
ຫວ່າງຈີນແລະສະມາຄົມອາຊ່ຽນ ເພື່ອແກ້
ໄຂບັນຫາການອ້າງເອົາກໍາມະສິດທີ່ເປັນຂໍ້
ຂັດແຍ້ງກັນໃນເຂດທະເລຈີນໃຕ້ທີ່ອຸດົມ
ສົມບູນໄດ້ດ້ວຍນໍ້າມັນນັ້ນ ເຖິງແມ່ນວ່າ
ສ່ວນໃຫຍ່ແລ້ວ ມັນເປັນພຽງສັນຍາລັກກໍຕາມ.
ແລະຢູ່ນອກກອງປະຊຸມຄັ້ງນັ້ນ ພວກເຈົ້າ
ໜ້າທີ່ເກົາຫລີເໜືອແລະເກົາຫລີໃຕ້ ໄດ້ທໍາ
ການໂອ້ລົມກັນແບບບໍ່ເປັນທາງການ ທີ່ກໍ່
ໃຫ້ເກີດຄວາມຫວັງວ່າ ໃນທີ່ສຸດແລ້ວກໍຄົງ
ຈະມີການຮື້ຟື້ນການເຈລະຈາຫົກຝ່າຍກ່ຽວກັບໂຄງການນີວເຄລຍຂອງເກົາຫລີເໜືອຄືນມາ.
ທ່ານນາງເທວີ ຟໍຈູນາ ອັນວາ (Dewi Fortuna Anwar) ຮອງເລຂາທິການປະຈໍາຮອງ
ປະທານາທິບໍດີອິນໂດເນເຊຍ ຮັບຜິດຊອບກິດຈະການການເມືອງ ກ່າວວ່າ ເຖິງແມ່ນ
ກອງປະຊຸມສຸດຍອດອາຊ່ຽນບໍ່ຄ່ອຍຈະມີການຕົກລົງກັນແບບເດັດຂາດຢ່າງໃດຢ່າງນຶ່ງ
ຈັກເທື່ອກໍຕາມ ແຕ່ສະມາຄົມອາຊ່ຽນກໍມີບົດບາດສໍາຄັນ ໃນການຮັກສາປະຄັບປະຄອງ
ສັນຕິພາບແລະສະຖຽນລະພາບ ໃນຂົງເຂດເອເຊຍເອົາໄວ້. ທ່ານນາງເທວີ ເວົ້າວ່າ:
“ສິ່ງທີ່ເຮົາສາມາດເຮັດໄດ້ຫລາຍທີ່ສຸດນັ້ນ ກໍຄືພະຍາຍາມຜ່ອນຄາຍ
ຄວາມເຄັ່ງຕຶງ ແລະ ນອກນີ້ແລ້ວ ກໍຫວັງຢ່າງຍິ່ງ ວ່າຈະສາມາດພັດ
ທະນາກົນໄກໃດນຶ່ງຂຶ້ນມາ ເພື່ອສ້າງຄວາມເຊຶ່ອມໂຍງກັນລະຫວ່າງ
ພັກຝ່າຍຕ່າງໆ ເພື່ອວ່າພັກຝ່າຍເຫລົ່ານັ້ນຈະຫລິງເຫັນວ່າ ມັນນອນ
ຢູ່ໃນຜົນປະໂຍດຂອງພວກເຂົາເຈົາ ທີ່ຈະຕ້ອງຮ່ວມມືກັນ.”
ນອກນີ້ແລ້ວ ການປ່ຽນແປງຕ່າງໆທາງດ້ານການເມືອງໃນມຽນມາ ກໍຈະຮວມຢູໃນລາຍ
ການກອງປະຊຸມສຸດຍອດຄັ້ງນີ້ນໍາ. ນັບຕັ້ງແຕ່ທ້າຍປີຜ່ານມານີ້ ມຽນມາກໍໄດ້ມີລັດຖະ
ບານຊຸດໃໝ່ ແລະໄດ້ປ່ອຍຕົວທ່ານນາງອອງ ຊານ ຊູຈີ ຜູ້ນໍາປະຊາທິປະໄຕຂອງມຽນມາ
ຕິດຕາມດ້ວຍການປ່ອຍຕົວ ພວກນັກໂທດການເມືອງປະມານ 200 ຄົນ. ພວກປະເທດ
ສະມາຊິກສະມາຄົມອາຊ່ຽນ ໄດ້ສະແດງຄວາມສະໜັບສະໜຸນຕໍ່ຄວາມພະຍາຍາມຂອງ
ມຽນມາ ທີ່ຢາກເປັນປະທານວຽນຂອງສະມາຄົມອາຊ່ຽນ ໃນປີ 2014 ນັ້ນ ເພື່ອເປັນ
ຫົນທາງນຶ່ງໃນການຊຸກຍູ້ໃຫ້ມີການປະຕິຮູບຕ່າງໆອີກໃນຂັ້ນຕໍ່ໄປ ເຖິງແມ່ນວ່າພວກກຸ່ມ
ສິດທິມະນຸດບາງກຸ່ມ ຕ້ອງການໃຫ້ໃຊ້ວິທີການທີ່ໜັກໜ່ວງກວ່ານັ້ນ ກໍຕາມ.
ທ່ານນາງເທວີ ກ່າວວ່າ ການສະໜັບສະໜຸມມຽນມາ ແມ່ນຈະສ່ຽງຕໍ່ການສູນເສຍຄວາມ
ໜ້າເຊື່ອຖືຂອງສະມາຄົມອາຊຽນ ໃນຂະນະອາຊ່ຽນກໍາລັງຫຍັບເຂົ້າໄປໃກ້ ກໍານົດເສັ້ນ
ຕາຍປີ 2015 ທີ່ໄດ້ຕັ້ງຂຶ້ນເອງ ສໍາລັບການກາຍເປັນອົງການຈັດຕັ້ງແຫ່ງຂົງເຂດທີ່ລວມ
ຕົວກັນ ບົນພື້ນຖານຂອງປະຊາທິປະໄຕແລະຕົວບົດກົດໝາຍນັ້ນ. ທ່ານນາງເທວີກ່າວວ່າ:
“ຖ້າຫາກມຽນມາບໍ່ມີການປະຕິຮູບທີ່ສໍາຄັນ ຫລືມີການຖອຍຫລັງບາງຢ່າງ
ໃນການປະຕິຮູບແລ້ວ ມັນກໍມີຄວາມເປັນໄປໄດ້ຢູ່ສະເໝີ ທີ່ວ່າການເປັນ
ປະທານສະມາຄົມອາຊ່ຽນຂອງມຽນມາ ໃນເວລາພຽງນຶ່ງປີກ່ອນທີ່ປະຊາຄົມ
ອາຊ່ຽນຈະເກີດຂຶ້ນນັ້ນ ອາດກາຍເປັນຄວາມຫາຍຍະນະຢ່າງແທ້ຈິງ ຄືຄວາມ
ຫາຍຍະນະທາງດ້ານປະຊາສໍາພັນຢ່າງແທ້ຈິງ ສໍາລັບສະມາຄົມອາຊ່ຽນ.”
ຢ່າງໃດກໍຕາມ ທ່ານນາງເທວີ ອັນວາ ກ່າວວ່າ ໂດຍສະເພາະ ໃນຊ່ວງການເຕີບໂຕດ້ານ
ເສດຖະກິດແຫ່ງຂົງເຂດເວລານີ້ແລ້ວ ແນວທາງຂອງສະມາຄົມອາຊ່ຽນ ໃນການເພັ່ງເລັງໃສ່
ຜົນປະໂຫຍດທີ່ມີຮ່ວມກັນ ສະເໜີໃຫ້ກໍາລັງໃຈຊຶ່ງເປັນແລະກັນ ແລະສ້າງຄວາມເຫັນພ້ອງ
ຕ້ອງກັນນັ້ນ ແມ່ນເປັນແນວທາງທີ່ໄດ້ຜົນທີ່ສຸດໃນການຄໍ້າປະກັນສັນຕິພາບແລະສະຖຽນ
ລະພາບ.
