ບັນດາທີມກູ້ໄພຂອງຈີນຍັງສືບຕໍ່ຂຸດຄົ້ນຢູ່ຕາມຊາກຫັກພັງ
ເພື່ອຊອກຫາຜູ້ທີ່ອາດຍັງລອດຊີວິດຢູ່ ຈາກແຜ່ນດິນໄຫວ
ຮ້າຍແຮງ ທີ່ປະທະຂົງ ເຂດພູເຂົາສອກຫລີກຫ່າງໄກແຫ່ງນຶ່ງ
ໃນພາກຕາເວັນຕົກສຽງໃຕ້ຂອງປະເທດ ເມື່ອຕອນບ່າຍວັນ
ອາທິດວານນີ້ ເຮັດໃຫ້ຢ່າງນ້ອຍ 398 ຄົນເສຍຊີວິດ.
ເຈົ້າໜ້າທີ່ກ່າວວ່າ ມີຫລາຍກ່ວາ 1.800 ຄົນ ໄດ້ຮັບບາດເຈັບ
ແລະ ຍັງມີອີກຫລາຍຄົນ ທີ່ຊອກຫາບໍ່ພົບເທື່ອ.
ກົມສຳຫຼວດທໍລະນີຂອງສະຫະລັດ ກ່າວວ່າ ແຜ່ນດິນໄຫວຄັ້ງນີ້
ມີຄວາມແຮງຂະໜາດ 6.1 ຣິກເຕີ.
ອົງການຂ່າວ ຊິນຫົວ ຂອງທາງການຈີນ ກ່າວວ່າ ແຮງສັ່ນສະເທືອນໄດ້ທຳລາຍເຮືອນຊານ
ຈຳນວນ 12.000 ຫຼັງ ແລະ ສ້າງຄວາມເສຍຫາຍ ໃຫ້ແກ່ເຮືອນຊານ ອີກ 30.000 ຫຼັງ.
ຄວາມພະຍາຍາມຊ່ວຍເຫລືອບັນເທົາທຸກພວກເຄາະຮ້າຍ
ກຳລັງດຳເນີນໄປ ພ້ອມກັບທີ່ປັກກິ່ງໄດ້ຈັດສົ່ງ ຕູບຜ້າໃບ
ນ້ຳດື່ມ ອາຫານ ແລະ ເຄື່ອງຂອງທີ່ຈຳເປັນອື່ນໆ ໄປຍັງຂົງ
ເຂດດັ່ງກ່າວ ບ່ອນທີ່ພະຍາກອນອາກາດເວົ້າວ່າ ຈະມີຝົນຕົກ
ໃນ 2-3 ມື້ ຕໍ່ໜ້ານີ້.
ສະຖານີໂທລະພາບ CCTV ຂອງລັດ ລາຍງານວ່າ ແຜ່ນ
ດິນໄຫວ ຄັ້ງນີ້ ແມ່ນຄັ້ງຮ້າຍແຮງທີ່ສຸດ ທີ່ໄດ້ປະທະແຂວງ
ຢຸນນ່ານ ໃນຮອບ 14 ປີ.
ພາກຕາເວັນຕົກສຽງໃຕ້ຂອງຈີນ ແມ່ນມັກເກີດແຜ່ນດິນໄຫວຢູ່ເລື້ອຍໆ. ໃນປີ 2012 ມີແຜ່ນດິນໄຫວ ຢູ່ໃນຂົງເຂດແຂວງຢຸນນ່ານ ທີ່ໄດ້ເຮັດໃຫ້ມີຢ່າງນ້ອຍ 80 ຄົນເສຍຊີວິດ.
