ຄື້ນຟອງແຫ່ງຄວາມມືດໄດ້ແຜ່ໄປທົ່ວໂລກໃນຄືນວັນເສົາວານນີ້ ໃນຂະນະທີ່ປະເທດຕ່າງໆພາກັນປະຕິບັດຊົ່ວໂມງແຫ່ງແຜ່ນດິນ ຫລື Earth Hour ອັນເປັນສັນຍະລັກຂອງການພະຍາຍາມປົກປັກຮັກສາຜືນແຜ່ນດິນຂອງໂລກໄວ້ ໂດຍພາກັນມອດໄຟເປັນເວລານຶ່ງຊົວໂມງ.
ປະຊາຊົນໃນ 134 ປະເທດໄດ້ໃຫ້ຄໍາໝັ້ນສັນຍາເຂົ້າປະກອບສ່ວນໃນຊົ່ວໂມງດັ່ງກ່າວ ໃນເວລາ 8:30 ໂມງຕອນແລງໃນແຕ່ລະເຂດເວລາໃນທ້ອງຖິ່ນຂອງໃຜລາວ. ການປຸກລະດົມດັ່ງກ່າວມີວັດຖຸປະສົງເພື່ອປຸກຈິດໃຈປະຊາຊົນໃຫ້ຊ່ອຍກັນປົກປ້ອງສິ່ງແວດລ້ອມໂດຍການປ່ຽນແປງຄວາມປະພຶດຂອງເຂົາເຈົ້າ ໃຫ້ຫັນໄປຊ່ວຍກັນອະນຸລັກແຫລ່ງຊັບພະຍາ
ກອນເອົາໄວ້.
ພວກຫລັກເມືອງທີ່ສໍາຄັນໆມີຊື່ສຽງຂອງປະເທດຕ່າງໆ ເຊ່ນໂຮງລະຄອນໂອເປຣາ ຫລື Opera House ທີ່ນະຄອນຊິດນີປະເທດອອສເຕຣເລຍ, ຫໍຄອຍ Eiffel ທີ່ກຸງປາຣີ, ແລະຕຶກ Empire State Building ທີ່ນະຄອນນີວຢອກ ແມ່ນໄດ້ຕົກຢູ່ໃນຄວາມມືດເປັນເວລານຶ່ງຊົ່ວໂມງໃນຄືນວານນີ້. ພວກສະຖານທີ່ສໍາຄັນອື່ນໆອີກ ທີ່ເຂົ້າປະກອບສ່ວນນໍາ ກໍມີຮວມທັງ Christ the Redeemer statue ທີ່ປະເທດບຣາຊີລ ຕຶກແຝດ Petronas Towers ທີ່ມາເລເຊຍ ແລະສະໜາມກີລາຮັງນົກ ຫລື Bird’s Nest ທີ່ກຸງປັກກິງ ບ່ອນທີ່ຈີນເປັນເຈົ້າພາບຈັດການແຂ່ງຂັນກີລາໂອລິມປິກລະດູຮ້ອນໃນປີ 2008 ນັ້ນ.
ກອງທຶນອະນຸລັກສັດປ່າເປັນຜູ້ຈັດແຈງໃຫ້ມີການຮ່ວມກັນປະຕິບັດ ຊົ່ວໂມງແຫ່ງແຜ່ນດິນນີ້ ຊຶ່ງມີຂຶ້ນທຸກໆປີ ຊຶ່ງຄັ້ງທໍາອິດໄດ້ມີຂຶ້ນທີ່ນະຄອນຊິດນີ ປະເທດອອສເຕຣເລຍ ໃນປີ 2007.