ລິ້ງ ສຳຫລັບເຂົ້າຫາ

ວັນເສົາ, ໒໕ ພຶດສະພາ ໒໐໒໔

ຫົກຄົນເສຍຊີວິດ ໃນຟິລິບປິນ ໃນຂະນະທີ່ ທ່ານ Duterte ດຳເນີນການທັບມ້າງ ການຄ້າຢາເສບຕິດ


ນາງ Jennelyn Olaires, ອາຍຸ 26 ປີ, ຮ້ອງໃຫ້ຢູ່ສົບຂອງໝູ່ ລາວ ຜູ້ທີ່ຖືກຂ້າຕາຍຈາກກຸ່ມອັນຕະພານ.
ນາງ Jennelyn Olaires, ອາຍຸ 26 ປີ, ຮ້ອງໃຫ້ຢູ່ສົບຂອງໝູ່ ລາວ ຜູ້ທີ່ຖືກຂ້າຕາຍຈາກກຸ່ມອັນຕະພານ.

ບັນດາ​ເຈົ້າໜ້າ​ທີ່​ຟິລິບ​ປີນ​ກ່າວ​ວ່າ ຕຳຫລວດ​ໄດ້​ສັງຫານ​ຜູ້​ອາລັກຂາ​ຕິດ​ອາວຸດ ຫ້າ​ຄົນ ທີ່​ຈົງ​ຮັກ​ພັກດີ​ຕໍ່​ເຈົ້າ​ເມືອງ ​ເມືອງ​ນຶ່ງ​ທີ່​ຖືກ​ກ່າວ​ຫາ​ວ່າ​ພົວພັນ​ກັບ​ການ​ຄ້າ​ຢາ​ເສບ​ຕິດ.

​ໃນ​ຕົ້ນ​ອາທິດ​ນີ້ ປະທານາທິບໍດີຟິລິບ​ປິນ ທ່ານ Rodrigo Duterte ​ໄດ້​ຂົ່ມຂູ່ເຈົ້າ​ເມືອງ Albuera ທ່ານ Rolando Espinoza Sr. ວ່າຈະ “ຍິງ​ຢູ່່​ຄາ​ທີ່” ​ໃນ​ການ​ປ້ອງ​ກັນ​ລູກ​ຊາຍ​ຂອງ​ທ່ານ ທີ່​ເປັນ​ຜູ້​ຕ້ອງ​ສົງ​ໄສ​ຄ້າ​ຢາ​ເສບ​ຕິດ. ທ່ານ Espinoza ​ໄດ້​ມອບ​ໂຕ​ຂອງ​ທ່ານ​ຕໍ່ຕຳຫລວດ​ແຫ່ງ​ຊາດ​ໃນ​ວັນ​ອັງຄານ​ທີ່​ຜ່ານ​ມາ ​ເຖິງ​ແມ່ນ​ວ່າ ລູກ​ຊາຍ​ຂອງ​ທ່ານ ທ້າວ Erwin ຜູ້​ຕ້ອງ​ສົງ​ໄສ​ວ່າລາຊາ​ຄ້າ​ຢາ​ເສບ​ຕິດ ບໍ່​ໄດ້​ຖືກ​ຈັບກໍຕາມ.

ຕຳຫລວດ​ທ້ອງ​ຖິ່ນ​ກ່າວ​ວ່າ ການ​ຍິງ​ກັນ​ໄດ້​ເກີດ​ຂຶ້ນ​ລະຫວ່າງ ພວກ​ອາລັກຂາ ​ແລະຕໍາ​ຫລວດຜູ້​ທີ່​ໄດ້​ອອກ​ລາດຕະ​ເວນ​ໃນ​ຕອນ​ເຊົ້າ​ວັນ​ພຸດ​ໃກ້​ກັບ​ເຮືອນ​ຂອງ​ທ່ານ Espinoza.

ອ້າງ​ຕາມ​ຜູ້​ບັນຊາ​ການ​ຕຳຫລວດ​ຢູ່​ໃນ​ຂົງ​ເຂດ ທ່ານ Elmer Beltejar ພວກ​ອາລັກຂາ​ໄດ້​ຍິງ​ໃສ່​ຕຳຫລວດ​ກ່ອນ ​ແລະ​ຕຳຫລວດ​ໄດ້​ຍິງຕອບ​ຄືນໃສ່ ສັງຫານເຂົາ​ເຈົ້າທັງ​ຫົກ​ຄົນ. ຕໍາຫລວດ​ຍັງ​ໄດ້​ຍຶດ​ເອົາ​ອາວຸດ​ຢ່າງ​ໜ້ອຍ 17 ກະ​ບອກ​ທີ່​ພົບເຫັນ​ຢູ່​ໃນ​ບ້ານ.

ທ່ານ Duterte ທີ່​ລົງ​ສະໝັກ​ເປັນ​ປະ​ນາ​ທິບໍດີ ​ໄດ້​ໃຫ້​ຄໍາ​ໝັ້ນ​ສັນຍາ​ດັ່ງກ່າວ ຖ້າ​ຫາກ​ຖືກ​ຄັດ​ເລືອກ ທ່ານ​ຈະ​ກວດ​ລ້າງ​ພວກ​ຄ້າ​ຢາ​ເສບ​ຕິດ ​ແລະ​ຄວາມ​ຮຸນ​ແຮງ​ທີ່​ເກີດ​ຂຶ້ນ​ຢູ່​ໃນ​ປະເທດ. ນັບ​ແຕ່​ທ່ານ​ໄດ້​ຊະນະ​ການ​ເລືອກ​ຕ້ັງ​ໃນ​ເດືອນ​ພຶດສະພາມາ ຕຳຫລວດ​ອ້າງ​ວ່າ​ໄດ້​ສັງຫານ​ຜູ້​ຕ້ອງສົງ​ໄສ​ຄ້າ​ຢ່າ​ເສບ​ຕິດ 400 ກວ່າຄົນ.

ອ່ານຂ່າວນີ້ເພີ້ມເປັນພາສາອັງກິດ

XS
SM
MD
LG