ເຮືອບິນ ບໍ່ມີຄົນຂັບ ຂອງ ເກົາຫຼີເໜືອ ຕົກຢູ່ດອນນຶ່ງ ໃນ ເຂດແນວໜ້າ ຂອງເກົາຫຼີໃຕ້ (ວີດີໂອ)

ເກົາຫລີ​ໃຕ້ ກ່າວ​ວ່າ ​ເຮືອບິ​ນ​ບໍ່​ມີ​ຄົນ​ຂັບ​ລຳ​ນຶ່ງ ​ທີ່​ຕົກ​ໃນ
ອາທິດ​ນີ້ ໃສ່ເກາະດອນ ແຫ່ງນຶ່ງ​ໃນເຂດ​ແນວ​ໜ້າ​ ຂອງ
ຕົນນັ້ນ ແມ່ນເປັນ​ຂອງ​ເກົາຫລີ​ເໜືອ.

​ເຮືອ​ບິນ​ນ້ອຍ ທີ່​ບໍ່​ມີ​ຄົນ​ຂັບດັ່ງກ່າວ ​ໄດ້​ຖືກພົບເຫັນ​ຢູ່ທີ່
ເກາະ Baengnyeong ​ໃນ​ວັນ​ອັງຄານ​ວານ​ນີ້ບໍ່ເທົ່າໃດ
ຊົ່ວໂມງຫລັງ​ຈາກທີ່​ທັງສອງ​ຝ່າ​ຍ​ໄດ້​ຍິງ​ປືນ​ໃຫຍ່​ໃສ່ເຂດ
ທະເລຂອງກັນແລະກັນ.

ໂຄສົກກະຊວງທ້ອນໂຮມຊາດ​ເກົາຫລີ ທ່ານ Park Soo-jin
​ໄດ້​ກ່າວ​ໃນ​ວັນ​ພຸດມື້ນີ້ວ່າ ການ​ສືບສວນ​ໄດ້ລົງຄວາມເຫັນວ່າ
​ເຮືອບິນນີ້ແມ່ນ​ຂອງພຽງ​ຢາງ ທ່ານ​ກ່າວເພີ້​ມອີກ​ວ່າ:

“ພະແນກການ​ທີ່​ກ່ຽວຂ້ອງ ຂອງ​ລັດຖະບານເກົາຫຼີໃຕ້ ​ໄດ້​ໃຫ້ການຢືນຢັນວ່າ ​ເກົາຫລີ ​
ເໜືອ ເປັນ​ຜູ້​ຮັບຜິດຊອບ​ຫຼືເປັນເຈົ້າຂອງ​ເຮືອບິນ​ທີ່​ບໍ່​ມີ​ຄົນ​ຂັບລຳນີ້.”

ທ່ານ Park ບໍ່​ໄດ້​ໃຫ້​ຄຳ​ເຫັນໃດໆ​ກ່ຽວ​ກັບ​ຈຸດປະສົງ​ຂອງ​ເກົາຫລີ​ເໜືອໃນການ​ນຳໃຊ້​
ເຮືອບິນທີ່​ບໍ່​ມີ​ຄົນ​ຂັບ ​ເຖິງ​ແມ່​ນວ່າສື່ມວນຊົນຂອງ​ເກົາຫລີ​ໃຕ້​ໄດ້ລາຍ​ງານ​ວ່າ ຕົນ​ໄດ້​
ປະຕິບັດ​ງານ​ສັງ​ເກດ​ການໃນ​ຂະນະ​ທີ່​ມີ​ການ​ຍິງປືນໃຫຍ່ໃສ່ກັນຢູ່ນັ້ນ.

​ໃນ​ວັນ​ຈັນຜ່ານມານີ້ເກົາຫລີ​ເໜືອ​ໄດ້​ຍິງປືນ​ໃຫຍ່ 100 ລູກເຂົ້າ​ໄປ​ໃສ່ເຂດທະເລຂອງ
ເກົາຫລີ​ໃຕ້ ​ເຮັດ​ໃຫ້​ເກົາຫລີໃຕ້ ຍິງປືນໃຫຍ່ຂອງຕົນຕອບໂຕ້ຄີືນໄປໃສ່ ເຂດນ່ານນໍ້າ
ຂອງເກົາຫຼີເໜືອ. ບໍ່​ມີໃຜ​ໄດ້​ຮັບບາດ​ເຈັບ​ໃນ​ການ​ຍິງໂຈມຕີກັນດັ່ງ ກ່າວ.

ຄວາມ​ເຄັ່ງ​ຕືງລ​ະຫວ່າງ ສອງ​ເກົາຫລີ ​ໄດ້ເພີ້​ມທະວີ​ຂື້ນ​ຫ​ວ່າງ​ບໍ່​ເທົ່າ​ໃດ​ອາທິດ​ທີ່​ຜ່ານ​
ມາ ​ເພາະວ່າການ​ຊ້ອມ​ລົບຮ່ວມ​ປະ​ຈຳປີ ລະຫວ່າງສະຫະລັດແລະ​ເກົາ​ຫລີ​ໃຕ້ ​ພ້ອມ
ທັງ​ການ​ຍິງ​ຈະຫຼວດ ແລະລູກ​ສອນ​ໄຟ​ຂີ​ປະ​ນາ​ວຸດ ທີ່ມີມາເປັນລຳດັບ ​ຂອງ​ພຽງຢາງ.


​