ກຸ່ມປົກປ້ອງສິດທິມະນຸດລະຫວ່າງປະເທດກຸ່ມນຶ່ງກ່າວວ່າ ກຳລັງຮັກສາຄວາມປອດໄພຄອງ
ໂກໄດ້ສັງຫານຢ່າງນ້ອຍ 24 ຄົນ ນັບແຕ່ໄດ້ມີການປະກາດວ່າ ປະທານາທິບໍດີ Joseph
Kabila ເປັນຜູ້ຊະນະການເລືອກຕັ້ງທີ່ພວກນັກສັງເກດການນາໆຊາດຖືວ່າມີການຂາດຕົກ
ບົກຜ່ອງຢ່າງຮ້າຍແຮງນັ້ນ.
ກຸ່ມປົກປ້ອງສິດທິມະນຸດ Human Rights Watch ກ່າວວ່າ ຜູ້ເຄາະຮ້າຍ ແມ່ນຮວມທັງ
ພວກນັກເຄື່ອນໄຫວຝ່າຍຄ້ານຕະຫຼອດທັງປະຊາຊົນທີ່ໂຮມຊຸມນຸມກັນຢູ່ຕາມຖະໜົນຫົນ
ທາງຫຼືຢູ່ໃນບ້ານເຮືອນຂອງພວກເຂົາເຈົ້າ. ລາຍງານ ແຈ້ງວ່າ ກຳລັງຮັກສາຄວາມສະຫງົບ
ໄດ້ຍິງປືນເຂົ້າໃສ່ການໂຮມຊຸມນຸມຂອງຝູງຊົນຂະໜາດນ້ອຍໃນອັນທີ່ປະກົດວ່າເປັນຄວາມ
ພະຍາຍາມເພື່ອປ້ອງກັນບໍ່ໃຫ້ ມີການປະທ້ວງ.
ທ່ານນາງ Anneke Van Woudenberg ຈາກກຸ່ມ Human RightsWatch ກ່າວວ່າ
ຍຸດທະວິທີທີ່ນອງເລືອດເຫຼົ່ານີ້ມີແຕ່ຈະບ່ອນທຳລາຍການເລືອກຕັ້ງເພີ່ມຕື່ມ. ທ່ານນາງເວົ້າ
ວ່າ ພວກເຂົາເຈົ້າເຊື່ອໝັ້ນວ່າລັດຖະບານຈະດຳເນີນການທຸກສິ່ງຢ່າງທີ່ມີຄວາມຈຳເປັນເພື່ອ
ຮັກສາ ອຳນາດໄວ້.
ປະທານາທິບໍດີ Kabila ໄດ້ສາບານໂຕເຂົ້າຮັບຕຳແໜ່ງ ໃນວັນອັງຄານແລ້ວນີ້ໂດຍໃຫ້ຄຳ
ໝັ້ນສັນຍາວ່າ ຈະເຮັດໃຫ້ປະເທດຊາດມີຄວາມເປັນນໍ້ານຶ່ງໃຈດຽວກັນ. ແຕ່ຜູ້ນຳຝ່າຍຄ້ານ
ທ່ານ Etienne Tshisekedi ໄດ້ປະຕິເສດບໍ່ຍອມຮັບເອົາຜົນຂອງການເລືອກຕັ້ງຍ້ອນມີ
ການສໍ້ໂກງຄະແນນສຽງແລະໄດ້ປະກາດໂຕທ່ານເອງເປັນປະທານາທິບໍດີໂດຍເວົ້າວ່າທ່ານ
ຈະເຂົ້າຮັບຕຳແໜ່ງໃນວັນສຸກມື້ອື່ນນີ້.
ສະຫະລັດກ່າວໃນມື້ວັນອັງຄານຜ່ານມານີ້ວ່າ ຕົນຮູ້ສຶກເສຍໃຈເປັນທີ່ສຸດກ່ຽວກັບການຕັດ
ສິນໃຈຂອງຄອງໂກ ທີ່ໄດ້ເຫັນພ້ອມກັບຜົນຂອງການເລືອກຕັ້ງ ໂດຍທີ່ບໍ່ໄດ້ຊັ່ງຊາຕີລາຄາ
ໂດຍເຕັມເບິ່ງລາຍງານ ກ່ຽວກັບການກະທຳທີ່ບໍ່ຖືກຕ້ອງ ທີ່ໄດ້ມີການກັນໃນຂອບເຂດທີ່
ກວ້າງຂວາງນັ້ນ.
