ການເລືອກຕັ້ງໃນສາທາລະນະລັດ ປະຊາທິປະໄຕຄອງໂກ ຍັງສືບຕໍ່ດໍາເນີນໄປໃນວັນອັງ
ຄານມື້ນີ້ ຢູ່ໃນເຂດທີ່ມີການກໍ່ຄວາມຮຸນແຮງ ແລະເຂດທີ່ສົ່ງຫີບປ່ອນບັດເລືອກຕັ້ງໄປບໍ່
ຮອດ ຊຶ່ງເຮັດໃຫ້ປະຊາຊົນບໍ່ສາມາດໄປປ່ອນບັດເລືອກຕັ້ງ ໃນວັນຈັນວານນີ້ໄດ້.
ເຈົ້າໜ້າທີ່ໃນຄະນະກໍາມະການເລືອກຕັ້ງ ໄດ້ເລີ້ມຕົ້ນນັບຄະແນນສຽງ ຢູ່ບ່ອນທີ່ການ
ປ່ອນບັດໄດ້ດໍາເນີນໄປຢ່າງສັນຕິ ແລະສິ້ນສຸດລົງໄວຫລືຊ້າກ່ອນເວລາກໍານົດໄວ້.
ປະທານາທິບໍດີທີ່ຢູ່ໃນຕໍາແໜ່ງ ທ່ານ Joseph Kabila ຄາດວ່າຈະໄດ້ຮັບໄຊຊະນະໃນ
ການເລືອກຕັ້ງຕື່ມອີກສະໄໝນຶ່ງ ທັງນີ້ສ່ວນນຶ່ງກໍເປັນຍ້ອນວ່າ ລະບົບການເລືອກຕັ້ງໃໝ່
ບໍ່ມີການເລືອກຕັ້ງໃນຮອບຕັດສິນຊີ້ຂາດ ຊຶ່ງກໍໝາຍຄວາມວ່າ ຜູ້ສະ ໝັກເລືອກຕັ້ງຜູ້ໃດ
ທີ່ໄດ້ຮັບຄະແນນສຽງສູງສຸດຈະເປັນຜູ້ຊະນະການເລືອກຕັ້ງ ໂດຍບໍ່ຕ້ອງໃຫ້ມີການບັນລຸ
ກົດເກນໃດນຶ່ງ.
ບັນຫາໃນການເລືອກຕັ້ງໃນວັນຈັນວານນີ້ ລວມມີການສົ່ງເອກະສານເພື່ອໃຊ້ໃນການ
ເລືອກຕັ້ງໄປເຖິງຊ້າ ຫລືບໍ່ກໍໄປບໍ່ເຖິງເລີຍ ຢູ່ໃນເຂດຕ່າງໆຢູ່ທົ່ວປະເທດ.
ສະຖານທີ່ປ່ອນບັດບາງບ່ອນ ກໍໄດ້ຮັບຜົນກະທົບຈາກການກໍ່ຄວາມຮຸນແຮງ, ໂດຍສ່ວນ
ໃຫຍ່ແມ່ນຢູ່ໃນເຂດເມືອງ ລູບໍາບາຊີ (Lubumbashi) ທາງພາກໃຕ້ຂອງປະເທດບ່ອນທີ່
ພວກມືປືນໄດ້ພາກັນ ໂຈມຕີຂະບວນລົດຂົນສົ່ງບັດເລືອກຕັ້ງ ແລະສະຖານທີ່ປ່ອນບັດ
ແຫ່ງນຶ່ງ ຢູ່ຄຸ້ມແບລແອ (Bel-Air). ພວກເຈົ້າໜ້າທີ່ຄອງໂກເວົ້າວ່າ ມີຫລາຍຄົນຖືກຂ້າ
ຕາຍໃນການກໍ່ຄວາມຮຸນແຮງເຫຼົ່ານີ້.
