ບັນດາເຈົ້າໜ້າທີ່ໃນປະເທດບັງກລາແດັສ ກ່າວວ່າ 56 ຄົນ ໄດ້ເສຍຊີວິດຍ້ອນ ຟ້າຜ່າ ຢູ່ຫລາຍແຫ່ງໃນໄລຍະສອງມື້ທີ່ຜ່ານມານີ້ ເຮັດໃຫ້ເກີດຄວາມຢ້ານກົວ ຢູ່ໃນໝູ່ປະຊາຊົນຈຳນວນນຶ່ງ.
ຫລັງຈາກມີອາກາດຮ້ອນເອົ້າຢູ່ປະມານນຶ່ງອາທິດ ໃນບັງກລາແດັສແລ້ວ ກໍໄດ້ເກີດມີຝົນຕົກຟ້າຮ້ອງຖະຫລົ່ມ 14 ເຂດຂອງປະເທດ ໃນວັນພະຫັດທີ່ຜ່ານມາ ນີ້ພ້ອມດ້ວຍຟ້າຜ່າ ເຮັດໃຫ້ມີຜູ້ເສຍຊີວິດຢ່າງໜ້ອຍ 33 ຄົນ. ຫລັງຈາກນັ້ນກໍໄດ້ເກີດມີຟ້າຜ່າອີກຮອບນຶ່ງ ຢູ່ໃນປະເທດດັ່ງກ່າວໃນວັນສຸກວານນີ້ ທີ່ເຮັດໃຫ້ມີຜູ້ເສຍຊີວິດຢ່າງໜ້ອຍ 23 ຄົນ. ນອກນັ້ນ ຍັງມີອີກຫລາຍຄົນໄດ້ຮັບບາດເຈັບ ຍ້ອນຟ້າຜ່າ ໃນໄລຍະສອງມື້ທີ່ຜ່ານມານີ້.
ອີງຈາກເຈົ້າໜ້າທີ່ຕຳຫລວດແລ້ວ ຄົນສ່ວນໃຫຍ່ທີ່ເສຍຊີວິດຫລືໄດ້ຮັບບາດເຈັບຢູ່ທົ່ວປະເທດ ແມ່ນພາກັນເຮັດວຽກຢູ່ຕາມທົ່ງນາຫລືພາກັນຢູ່ບ່ອນທີ່ແປນໃນເວ ລາທີ່ມີຟ້າຜ່າ.
ທ່ານ Abul Hossain ເຈົ້າໜ້າທີ່ຕຳຫລວດຄົນນຶ່ງໃນເມືອງ Pabna ກ່າວຕໍ່ ວີໂອເອ ວ່າ “ໃນໄລຍະສອງມື້ຜ່ານມານີ້ ຟ້າຜ່າໄດ້ເອົາຊີວິດຄົນໄປຢ່າງໜ້ອຍແປດຄົນ ພຽງແຕ່ຢູ່ໃນເຂດເມືອງ Pabna ເທົ່ານັ້ນ. ມີຜູ້ເສຍຊີວິດຫລາຍເຖິງ 56 ຄົນຢູ່ໃນທົ່ວປະເທດພາຍ ໃນໄລຍະພຽງສອງມື້ ທີ່ເຮັດໃຫ້ຫລາຍຄົນພາກັນຢ້ານກົວ.”
ຢູ່ໃນບັງກລາແດັສ ລະຫວ່າງທີ່ເກີດຝົນຕົກຟ້າຮ້ອງ ກ່ອນລະດູລົມມໍລະສຸມນັ້ນ ຊຶ່ງຕາມປົກກະຕິແລ້ວຈະມີຂຶ້ນລະຫວ່າງເດືອນມີນາ ຫາພຶຶດສະພານັ້ນ ຟ້າຜ່າໄດ້ເຮັດໃຫ້ມີຜູ້ເສຍຊີວິດຫລາຍຄົນ ສ່ວນຫລາຍຢູ່ໃນເຂດຊົນນະບົດ. ປີກາຍນີ້ມີຈຳນວນຜູ້ເສຍຊີວິດຍ້ອນຟ້າຜ່າມີຢູ່ 51 ຄົນ. ແຕ່ວ່າໃນປີນີ້ ນັບແຕ່່ເດືອນມີນາເປັນຕົ້ນມາ ຈຳນວນຜູ້ເສຍຊີວິດໄດ້ກາຍ 90 ຄົນແລ້ວ ຮວມທັງ 56 ຄົນທີ່ໄດ້ເສຍຊີວິດໃນໄລຍະສອງມື້ທີ່ຜ່່ານມານີ້.
ທ່ານ Mohammad Riaz ຫົວໜ້າຫ້ອງການຄຸ້ມຄອງໄພພິບັດຂອງບັງກລາແດັສກ່າວວ່າ ບັນດາເຈົ້າໜ້າທີ່ໄດ້ມີຄວາມເປັນຫ່ວງ ກ່ຽວກັບຈຳນວນຜູ້ເສຍ ຊີວິດທີ່ສູງຂຶ້ນຜິດປົກກະຕິຍ້ອນຟ້າ ໃນປີນີ້.
