ອົງການ ແພດບໍ່ມີພົມແດນ ກ່າວວ່າ ການໂຈມຕີຖິ້ມລະເບີດ ໃສ່
ໂຮງໝໍຂອງຕົນທີ່ເມືອງ Kunduz ໃນພາກເໜືອອັຟການິສຖານ
ໄດ້ສັງຫານພະນັກງານ 9 ຄົນ ແລະອີກ 37 ຄົນໄດ້ຮັບບາດເຈັບ. ອົງການແພດບໍ່ມີພົມແດນກ່າວວ່າ ການໂຈມຕີໄດ້ດຳເນີນຢູ່ຕໍ່ມາ
ດົນກວ່າ 30 ນາທີ ຫລັງຈາກເຈົ້າໜ້າທີ່ທະຫານອາເມຣິກັນແລະ
ອັຟການິສຖານ ທີ່ນະຄອນຫຼວງກາບູລແລະວໍຊິງຕັນໄດ້ຖືກແຈ້ງ
ໃຫ້ຊາບ.
ກອງທັບສະຫະລັດ ຮັບຮູ້ວ່າ ຕົນໄດ້ປະຕິບັດງານໂຈມຕີທາງອາ
ກາດໃນຕອນເຊົ້າມືດໃນບໍລິເວນທີ່ອາດໄດ້ສ້າງຄວາມເສຍຫາຍ
ແບບບໍ່ໄດ້ຕັ້ງໃຈ.
ອົງການແພດບໍ່ມີພົມແດນ ກ່າວຢູ່ໃນຖະແຫລງການ ສະບັບນຶ່ງວ່າ “ອົງການແພດບໍ່ມີພົມ ແດນຂໍປະນາມດ້ວຍຄຳເວົ້າທີ່ແຮງທີ່ສຸດ ຕໍ່ການຖິ້ມລະເບີດໂຈມຕີທີ່ໜ້າຢ້ານກົວໃສ່ໂຮງ ໝໍໃນເມືອງ Kunduz ທີ່ເຕັມໄປດ້ວຍພະນັກງານແລະພວກຄົນເຈັບ.” ຖະແຫຼງການກ່າວ ຕໍ່ໄປວ່າ ທຸກພັກຝ່າຍກ່ຽວຂ້ອງ ຮວມທັງກາບູລແລະວໍຊິງຕັນໄດ້ຖືກແຈ້ງໃຫ້ຊາບກ່ຽວກັບ ທີ່ຕັ້ງຂອງໂຮງໝໍຫລັງຈາກການສູ້ລົບ ກັນໄດ້ລະເບີດຂຶ້ນໃນເມືອງດັ່ງກ່າວ.
ຖະແຫຼງການກ່າວຕໍ່ໄປວ່າ “ອົງການແພດບໍ່ມີພົມແດນ ຂໍຄວາມກະຈ່າງແຈ້ງຢ່າງຮີບດ່ວນ ວ່າແມ່ນຫຍັງແທ້ໄດ້ເກີີດຂຶ້ນ ແລະເຫດການທີ່ໜ້າຢ້ານກົວນີ້ເກີດຂຶ້ນໄດ້ແນວໃດ. ກຸ່ມດັ່ງ ກ່າວເວົ້າວ່າ ໃນເວລາການໂຈມຕີທາງອາກາດ ເກີດຂຶ້ນນັ້ນ ມີຄົນເຈັບແລະພວກທີ່ມາຮັບ ການປິ່ນປົວປະມານ 105 ຄົນຢູ່ໂຮງໝໍແລະມີພະນັກງານຂອງອົງການແພດບໍ່ມີພົມແດນ ຊາວຕ່າງປະເທດ ແລະພະນັກງານທ້ອງຖິ່ນ ຫຼາຍກວ່າ 80 ຢູ່ທີ່ນັ້ນ.
ກຳລັງທະຫານອັຟການິສຖານທີ່ໄດ້ສະໜັບສະໜູນຈາກການໂຈມຕີທາງອາກາດຂອງສະ ຫະລັດ ພວມທຳການສູ້ລົບຢ່າງໜັກທີ່ເມືອງ Kunduz ກັບພວກຫົວຮຸນແຮງຕາລີບານ ທີ່ໄດ້ເຂົ້າຄວບຄຸມເອົາເມືອງດັ່ງກ່າວ ໃນຕົ້ນອາທິດນີ້.
ໂຄສົກຂອງກອງທັບສະຫະລັດໃນອັຟການິສຖານ ພັນເອກ Brian Tribus ກ່າວວ່າ “ບັນ ດາກຸ່ມບຸກຄົນທີ່ຂົ່ມຂູ່ຕໍ່ກຳລັງດັ່ງກ່າວ” ແມ່ນເປົ້າໝາຍໃນການໂຈມຕີທາງອາກາດທີ່ມີຂຶ້ນ
ໃນເວລາ 2 ໂມງ 15 ນາທີ ຂອງຕອນເຊົ້າ ວັນເສົາມື້ນີ້ ຕາມເວລາທ້ອງຖິ່ນ ໃນອັຟການິສ ຖານ.
ທ່ານກ່າວວ່າ “ການໂຈມຕີ ອາດເປັນຜົນມາຈາກຄວາມເສຍຫາຍ ທີ່ບໍ່ຕັ້ງໃຈຕໍ່ສະຖານທີ່ ພະຍາບານທີ່ຕັ້ງຢູ່ໃກ້ໆນັ້ນ. ອຸບັດເຫດດັ່ງກ່າວ ກຳລັງຢູ່ພາຍໃຕ້ການສືບສວນ.”
ເຈົ້າໜ້າທີ່ ອັຟການິສຖານ ກ່າວໃນວັນສຸກວານນີ້ວ່າ ມີຢ່າງໜ້ອຍ 60 ຄົນ ໄດ້ເສຍຊີວິດ ແລະອີກ 466 ຄົນໄດ້ຮັບບາດເຈັບໃນການສູ້ລົບກັນ ລະຫວ່າງທະຫານລັດຖະບານແລະ ພວກກະບົດຕາລີບານ ເພື່ອເຂົ້າຄວບຄຸມເມືອງ Kunduz.
