ນັກດຳນ້ຳ ໄດ້ກູ້ເອົາຕື່ມອີກ 6 ສົບ ຈາກພື້ນທະເລ ໃກ້ໆກັບບ່ອນ
ທີ່ລຳໂຕຂອງເຮືອບິນ Airbus A320 ຖ້ຽວບິນ 8501 ຈົມຢູ່ນັ້ນ ໃນຂະນະທີ່ກະແສນ້ຳໃຕ້ພື້ນທະເລໄຫລບໍ່ແຮງເກີນໄປ ພໍທີ່ໃຫ້
ພວກນັກດຳນ້ຳ ລົງໄປສຳຫຼວດເບິ່ງບໍລິເວນດັ່ງກ່າວໄດ້.
ຊາກສົບທີ່ຄົ້ນພົບນັ້ນ ຍັງໃສ່ສາຍແອວຢູ່ໃນຕັ່ງນັ່ງຂອງເຮືອບິນ
ໃນຂະນະທີ່ພວກນັດດຳນ້ຳພາກັນຊອກຄົ້ນຫາ ໃນວັນພະຫັດມື້ນີ້.
ກະແສນ້ຳທີ່ໄຫລແຮງນັ້ນ ເປັນອຸບປະສັກກີດຂວາງ ບໍ່ໃຫ້ພວກ
ນັກດຳນ້ຳ ເຂົ້າໄປເຖິງລຳໂຕຂອງຊາກເຮືອບິນ ຊຶ່ງໄດ້ຈົມຢູ່
ໃຕ້ທ້ອງທະເລຈາວາ ປະທານ 30 ແມັດ ເລິກລົງໄປຈາກໜ້ານ້ຳ.
ຈົນເທົ່າເຖິງປະຈຸບັນນີ້ ໄດ້ພົບເຫັນສົບແລ້ວ 59 ສົບ ຈາກຖ້ຽວບິນ 8501 ທີ່ຕົກລົງໃສ່ທະເລຈາວາ ພ້ອມດ້ວຍຜູ້ໂດຍສານແລະພະນັກງານທັງໝົດ 162 ຄົນ ໃນຂະນະທີ່ກຳລັງເດີນທາງ
ແຕ່ເມືອງ Surabaya ຫົວເມືອງໃຫຍ່ອັນດັບ 2 ຂອງອິນໂດເນເຊຍ ໄປສູ່ປະເທດສິງກະໂປ.
ຫີບດຳ ຫຼື “Blackboxs” ທີ່ບັນທຶກສຽງແລະຂໍ້ມູນຕ່າງໆຂອງເຮືອບິນນັ້ນແມ່ນໄດ້ຄົ້ນພົບແລ້ວ ໃນອາທິດແລ້ວນີ້.
ລັດຖະມົນຕີຂົນສົ່ງອິນໂດເນເຊຍ ທ່ານ Ignasius Jonan ໄດ້ກ່າວໃນສັບປະດານີ້ວ່າ ເຮືອບິນລຳດັ່ງກ່າວ ໄດ້ບິນຂຶ້ນສູງແລະໄວເກີນໄປ ກ່ອນທີ່ຈະຕົກລົງສູ່ທ້ອງທະເລ.
