ປະທານາທິບໍດີ ສະຫະລັດ ທ່ານ ດໍໂນລ ທຣຳ ໄດ້ມິດງຽບຢ່າງຜິດປົກກະຕິກ່ອນການ
ເລີ່ມຕົ້ນຂອງເຫດການທາງດ້ານການທູດ ໃນລະຫວ່າງ ກອງປະຊຸມສະມັດຊາໃຫຍ່
ອົງການສະຫະປະຊາຊາດ.
ທ່ານ ທຣຳ ບໍ່ໄດ້ກ່າວຫຍັງ ຢູ່ໃນ ທວິດເຕີ ໃນວັນເສົາ ແລະ ວັນອາທິດວານນີ້ ເຊິ່ງເປັນ
ສິ່ງທີ່ບໍ່ຄ່ອຍເກີດຂຶ້ນ ໃນຂະນະທີ່ທ່ານໄປພັກຜ່ອນຢູ່ສະໂມສອນກັອລຟ ສ່ວນຕົວຂອງ
ທ່ານໃນລັດ ນິວ ເຈີຊີ, ທ່າມກາງຫຼາຍບັນຫາ ທີ່ຍັງຄົງຄ້າງ ທີ່ເບິ່ງຄືວ່າ ຈະອະທິບາຍ
ເຖິງການເປັນປະທານາທິບໍດີຂອງທ່ານ.
ບໍ່ມີຂໍ້ຄວາມ ທີ່ສຳຄັນຈາກທ່ານປະທານາທິບໍດີຢູ່ໃນ ທວິດເຕີ ລຸນຫຼັງຄຳເຫັນຂອງທ່ານ
ເມື່ອວັນສຸກທີ່ຜ່ານມາ ກ່ຽວກັບ ຄຳສັ່ງ ໃຫ້ເປີດເຜີຍເອກະສານທີ່ເປັນບັນຫາຕ່າງໆ
ກ່ຽວກັບ ການສອບສວນ ຣັດເຊຍ, ເຊິ່ງຕອນນີ້ ກຳລັງຖືກທົບທວນຢູ່ ແລະ ກໍໄດ້ກ່າວ
ຫາພັກຝ່າຍຄ້ານເດໂມແຄຣັດ ກ່ຽວກັບ ການຂັດຂວາງຂັ້ນຕອນການຮັບຮອງ ຜູ້ຖືກສະ
ເໜີຊື່ ຄົນທີສອງຂອງທ່ານ ສຳລັບການແຕ່ງຕັ້ງຕຳແໜ່ງໃນສານສູງສຸດ ສະຫະລັດ ຕະ
ຫຼອດຊີວິດ.
ທ່ານ ທຣຳ ໄດ້ຮັບປະທານອາຫານກັບນາຍົກລັດຖະມົນຕີ ຍີ່ປຸ່ນ ທ່ານ ຊິນໂຊ ອາເບະ
ທີ່ນະຄອນ ນິວຢອກ ໃນວັນອາທິດວານນີ້, ເຊິ່ງທ່ານກໍແມ່ນນຶ່ງ ໃນຈຳນວນຜູ້ນຳໂລກ
ທີ່ມາເຕົ້າໂຮມກັນ ສຳລັບກອງປະຊຸມສະມັດຊາໃຫຍ່ ສະຫະລັດ ປະຊາຊາດຄັ້ງທີ 73.
ບໍ່ດົນກ່ອນການຮັບປະທານອາຫານຄ່ຳນັ້ນ, ທ່ານ ທຣຳ, ໄດ້ກົດດັນທ່ານ ອາເບະ ໃນ
ຂໍ້ຄວາມຢູ່ທວິດເຕີວ່າ, “ພວກເຮົາໄດ້ເຮັດຫຼາຍຢ່າງ ເພື່ອຊ່ວຍເຫຼືອ ຍີ່ປຸ່ນ, ພວກເຮົາ
ຢາກເຫັນສາຍພົວພັນແບບເປັນການແລກປ່ຽນກັນ.”
ນອກຈາກຄວາມແຕກຕ່າງດ້ານການຄ້າ ແລະ ຄ່າໃຊ້ຈ່າຍທັງຫຼາຍຂອງການຕ້ອນຮັບ
ກອງກຳລັງ ສະຫະລັດ ໃນ ຍີ່ປຸ່ນ ແລ້ວ, ທ່ານ ທຣຳ ກັບ ທ່ານ ອາເບະ, ກໍຍັງມີຄວາມ
ແນ່ນອນວ່າ ຈະປຶກສາຫາລືກັນ ກ່ຽວກັບ ສະຖານະການໃນແຫຼມເກົາຫຼີ, ພຽງບໍເທົ່າໃດ
ວັນ ຫຼັງຈາກປະທານາທິບໍດີ ເກົາຫຼີໃຕ້ ທ່ານ ມູນ ແຈ ອິນ ໄດ້ເດີນທາງໄປນະຄອນຫຼວງ
ພຽງຢາງ ແລະ ໄດ້ເຊັນຂໍ້ຕົກລົງກັບຜູ້ນຳເກົາຫຼີເໜືອ ທ່ານ ກິມ ຈົງ ອຶນ.
ນອກນັ້ນ ປະທານາທິບໍດີ ສະຫະລັດ ຍັງມີກຳນົດທີ່ຈະພົບປະກັບບັນດາຜູ້ນຳອັງກິດ,
ໂຄລອມເບຍ, ອີຈິບ, ຝຣັ່ງ ແລະ ອິສຣາແອລ ນຳ ໃນສັບປະດານີ້.