ນັກການທູດ ຊຸກຍູ້ ໃຫ້ພວກຕໍ່ຕ້ານ ໃນຊີເຣຍ ເຂົ້າຮ່ວມ ກອງປະຊຸມ ສັນຕິພາບ (ວີດີໂອ)

ບັນດານັກ​ການ​ທູດ​ຂັ້ນ​ສູງ ຈາກ 11 ປະ​ເທດ ​ປະຊຸມກັນໃນ​ວັນ​
ອັງຄານ​ມື້​ນີ້ ທີ່ກຸງ​ລອນ​ດອນ ກັບສະມາ​ຊິກ​ຂອງຝ່າຍ​ຄ້ານຊີ​ເຣຍ
​ເພື່ອ​ຊຸກຍູ້ໃຫ້​ພວກ​ທີ່ຄັດຄ້ານ​ຕໍ່​ປະທານາທິບໍດີຊີ​ເຣຍ ທ່ານ
Bashar al-Assad ນັ້ນ ​ເຂົ້າ​ຮ່ວມ​ໃນກອງປະຊຸມ​ສັນ​ຕິພາບ
ກັບ​ທາງ​ລັດຖະບານ ທີ່ໄດ້​ຊັກ​ຊ້າ​ມາ​ເປັນ​ເວລາ​ດົນນານ​ນັ້ນ.

ກ່ອນການ​ເຈລະຈາ ກັບ​ບັນດາສະມາຊິກ​ຄົນ​ສໍາຄັນຂອງ​ກຸ່ມ
​ເພື່ອ​ນມິດຂອງ​ຊີ​ເຣຍນັ້ນ​ ລັດຖະມົນຕີ​ການ​ຕ່າງປະ​ເທດອັງກິດ
ທ່ານ William Hague ກ່າວ ວ່າ ຍິ່ງ​ວິ​ກິດ​ການ​ທາງ​ການ​
ເມືອງ​ໃນ​ຊີ​ເຣຍ ຍືດ​ເຍື້ອ​ແກ່ຍາວ​ອອກ​ໄປດົນ​ເທົ່າ​ໃດ ກໍ​ຍິ່ງ
ເຮັດ​ໃກ້​ມີ ​ການ​ແບ່ງ​ແຍກ​ກັນຫລາຍຍິ່ງຂຶ້ນ. ທ່ານ​ໄດ້​ກ່າວ
ໃນ​ການ​ໃຫ້​ສໍາພາດ​ກັບ​ວິທະຍຸທ້ອງ​ຖິ່ນ​ແຫ່ງນຶ່ງ ວ່າ ໝົດທຸກກຸ່ມ​ຂອງ​ຝ່າຍຄ້ານ​ນັ້ນ​ ຄວນ​ຈະ​ເຂົ້າ​ມາ​ຮ່ວມການເຈລະຈາສັນຕິພາບ​ນີ້.

ການ​ມີ​ຫຼາຍໆ​ກຸ່ມ​ຂອງ​ຝ່າຍ​ຄ້ານ ​ເຮັດເປັນ​ການ​ຍາກ​ທີ່​ຈະ​ຈັດ​ການ​ເຈລະຈາສັນຕິພາບຂຶ້ນ
ຊຶ່ງ​ມີ​ຫຼາຍ​ໆຄໍາ​ຖາມ​ທີ່​ວ່າ ​ແມ່ນ​ຜູ້​ໃດ​ຈະ​ເຂົ້າ​ຮ່ວມ ​ແລະພາຍ​ໃຕ້​ສະພາບ​ການ​ແບບ​ໃດ ​
ເປັນ​ຕົ້ນ.

ບັນດາຜູ້​ນໍາ​ຝ່າຍຄ້ານ ​ໄດ້​ຂູ່​ທີ່​ຈະ​ບໍ່​ຍອມ​ເຂົ້າ​ຮ່ວມ​ກອງ​ປະຊຸມ ນອກຈາກ​ວ່າປະທານາທິບໍດີ
ຊີ​ເຣຍ ທ່ານ Bashar al-Assad ​ຕົກລົງ​ທີ່​ຈະກ້າວລົງຈາກ​ອໍານາດ. ​ແຕ່ທ່ານ Assad
ຢືນ​ຢັດ​ວ່າ ທ່ານ​ຈະ​ຢູ່​ໃນ​ຕໍາ​ແໜ່​ງຕໍ່​ໄປ ຈົນ​ກວ່າ​ສະ​ໄໝຂອງ​ທ່ານ​ຈະ​ສິ້ນສຸ​ດ​ລົງ​ໃນ​ປີ 2014
​ແລະ​ທ່ານ​ກໍ​ອາດ​ຈະສະມັກເລືອກ​ຕັ້ງໃໝ່ ອີກ​ກໍ​ເປັນ​ໄດ້.