ພວກນັກການທູດຂອງອົງການສະຫະປະຊາຊາດ ກຳລັງພິຈາ
ລະນາຍັດຕິສະບັບນຶ່ງຂອງສະພາຄວາມໝັ້ນຄົງອົງການສະຫະ
ປະຊາຊາດ ເພື່ອສະໜັບສະໜູນການຢຸດຍິງໃນຊີເຣຍ ທີ່ໄດ້ຮັບ
ການໜຸນຫລັງຈາກສະຫະລັດແລະຣັດເຊຍ ທີ່ລັດຖະມົນຕີ
ການຕ່າງປະເທດສະຫະລັດ ທ່ານ John Kerry ກ່າວວ່າ
“ນີ້ແມ່ນວິທີທາງນຶ່ງທີ່ຈະຍຸຕິສົງຄາມນີ້ລົງໄດ້.”
ພັກຝ່າຍຕ່າງໆທີ່ເຮັດສົງຄາມຢູ່ໃນຊິເຣຍ ມີເວລາຈົນຮອດ
ຕອນທ່ຽງວັນສຸກມື້ອື່ນນີ້ເທົ່ານັ້ນ ທີ່ຈະຢືນຢັນວ່າ ພວກເຂົາເຈົ້າ
ຈະເຂົ້າຮ່ວມໃນການຍຸຕິການເປັນປໍລະປັກກັນຫຼືບໍ່ ຊຶ່ງຈະເລີ້ມຂຶ້ນ
ພາຍໃນ 12 ຊົ່ວໂມງ ຫລັງຈາກນັ້ນ.
ທ່ານ Kerry ໄດ້ກ່າວໃນວັນພຸດວານນີ້ວ່າ “ທາງອອກອີກດ້ານນຶ່ງ ກໍແມ່ນວ່າ ສົງຄາມ
ຍິ່ງຈະຮ້າຍແຮງລົງ ຊຶ່ງຊິເຣຍ ອາດຈະຖືກທຳລາຍໝົດ ແລະບໍ່ສາມາດຈະກັບຄືນການຮວມກັນໄດ້ອີກ.”
ບັນດາເຈົ້າໜ້າທີ່ຂອງສະຫະລັດ ແລະຣັດເຊຍ ແມ່ນຈະໂອ້ລົມສົນທະນາກັນຕື່ມອີກ ໃນວັນພະຫັດມື້ນີ້ ກ່ຽວກັບການຈັດຕັ້ງປະຕິບັດການຢຸດຍິງ ແລະທ່ານ Mikhail Bogdanov ຮອງລັດຖະມົນຕີການຕ່າງປະເທດຣັດເຊຍ ກ່າວຍ້ຳວ່າ ຣັດເຊຍ ຈະບໍ່ໂອ້ລົມສົນທະນາແຜນການຂອງທາງເລືອກໃໝ່ໃດໆທັງສິ້ນ.
ລັດຖະບານຊິເຣຍໄດ້ກ່າວວ່າ ຕົນຈະເຂົ້າຮ່ວມ ແຕ່ວ່າຕົນຍັງຈະສືບຕໍ່ໂຈມຕີກຸ່ມລັດອິສລາມ ແລະກຸ່ມອື່ນໆ ທີ່ເປັນເຄືອຂ່າຍກັບກຸ່ມກໍ່ການຮ້າຍ al-Qaida ຊຶ່ງບໍ່ໄດ້ຮວມຢູ່ໃນການຢຸດຍິງນີ້.
ຄະນະກຳມະການເຈລະຈາຂັ້ນສູງຂອງພວກຕໍ່ຕ້ານ ຫຼື HNC ຍັງສະຫງວນທ່າທີກ່ຽວກັບ ການໃຫ້ຄວາມສະໜັບສະໜຸນຕໍ່ ການຢຸດຍິງ ໃນວັນພຸດວານນີ້ ໂດຍກ່າວວ່າ ພວກຕົນຈະເຂົ້າຮ່ວມ 2 ສັບປະດາ ຊຶ່ງຈະຊັ່ງຊາເບິ່ງວ່າ ພັກຝ່າຍອື່ນໆນັ້ນ ຈະມີຄວາມໝາຍໝັ້ນສ່ຳໃດ.
ຄະນະກຳມະການ HNC ຍັງໄດ້ກ່າວອີກວ່າ ການປະກອບສ່ວນ
ຂອງຕົນນັ້ນແມ່ນມີເງື່ອນ ໄຂ ກ່ຽວກັບການຈັດສົ່ງການຊ່ອຍເຫຼືອ
ທາງດ້ານມະນຸດສະທຳຕໍ່ເຂດຕ່າງໆແລະການຢຸດເຊົາຕໍ່ການປິດ
ລ້ອມຫົວເມືອງຕ່າງໆ ພ້ອມທັງການໂຈມຕີທາງອາກາດຕໍ່ພົນລະເຮືອນ.
ທ່ານ Michael Ratney ທູດພິເສດຂອງສະຫະລັດ ຮັບຜິດຊອບເລື້ອງຊິເຣຍ ໄດ້ກ່າວຢູ່ໃນຖະແຫຼງການວ່າ ການສະເໜີແນະຂອງຄະນະກຳມະການ HNC ກຳລັງໄດ້ຮັບການພິ ຈາລະນາຢ່າງລະມັດລະວັງ. ທ່ານຍັງສະແດງຄວາມເຫັນຕື່ມວ່າ ຈະມີກຸ່ມປະກອບອາວຸດ ຕ່າງໆໃນຈຳນວນຫຼາຍທີ່ສຸດ ຈະລົງນາມໃນຂໍ້ຕົກລົງຢຸດຍິງດັ່ງກ່າວ.
