ບັນດາເຈົ້າໜ້າທີ່ໃນຈີນ ແລະຮົງກົງ ກຳລັງເພີ່ມທະວີການຄວບຄຸມສັງຄົມພົນລະເຮືອນຢ່າງເຂັ້ມງວດ ໃນຂະນະທີ່ປະຊາຊົນໃນເມືອງຕ່າງໆ ຫຼາຍສິບເມືອງໃນທົ່ວໂລກ ພາກັນລະນຶກເຖິງວັນຄົບຮອບ 35 ປີຂອງການສັງຫານໝູ່ ຢູ່ທີ່ຈະຕຸລັດທຽນອັນເໝິນ ໃນວັນອັງຄານມື້ນີ້.
ກ່ອນວັນຄົບຮອບ, ອຳນາດການປົກຄອງຮົງກົງໄດ້ຈັບຜູ້ຕ້ອງສົງໄສ 8 ຄົນໃນການລົງໂຄສະນາໃນສື່ສັງຄົມເພື່ອລະນຶກເຖິງວັນທີ 4 ມິຖຸນາ, ເຊິ່ງຕຳຫຼວດກ່າວວ່າແມ່ນມີຈຸດປະສົງເພື່ອໃຊ້ “ວັນ ທີ່ລະອຽດອ່ອນທີ່ກຳລັງຈະມາເຖິງ” ເພື່ອຍຸຍົງໃຫ້ມີຄວາມກຽດຊັງຕໍ່ລັດຖະບານຮົງກົງ ແລະ ມີເຈດຕະນາຊັກຈູງ.
ຜູ້ທີ່ພົ້ນເດັ່ນກວ່າໝູ່ໃນບັນດາຜູ້ທີ່ຖືກຈັບກຸມແມ່ນທະນາຍຄວາມດ້ານສິດທິມະນຸດ ທ່ານ ໂຈ ຫັງ-ຕຸງ (Chow Hang-tung) ຊຶ່ງໄດ້ຖືກກັກຂັງມາແຕ່ປີ 2021 ໃນການຈັດພິທີສູດມົນ ທຽນອັນເໝັນ ປະຈຳປີ ຢູ່ສວນສາທາລະນະ ວິກຕໍເຣຍ (Victoria) ຂອງຮົງກົງ, ເຊິ່ງຖືກສັງຫ້າມນັບແຕ່ປັກກິ່ງໄດ້ບັງຄັບໃຊ້ກົດໝາຍຄວາມໝັ້ນຄົງແຫ່ງຊາດ ທີ່ເປັນທີ່ຖົກຖຽງກັນ ກ່ຽວກັບອະດີດອານານິຄົມຂອງອັງກິດ ແຫ່ງນີ້ ໃນປີ 2020.
ບຸກຄົນອື່ນໆທີ່ຖືກຈັບກຸມໂດຍຕໍາຫຼວດຮົງກົງ ມີແມ່ ແລະລຸງຂອງທ່ານ ໂຈ (Chow) ແລະອະດີດສະມາຊິກຂອງພັນທະມິດຮົງກົງທີ່ປະຈຸບັນຖືກຍຸບ ແລ້ວ, ເຊິ່ງເຄີຍຈັດພິທິປະຈໍາປີດັ່ງກ່າວ ແລະ ທ່ານນາງ ໂຈ (Chow) ໄດ້ດຳລົງຕໍາ ແໜ່ງເປັນຮອງປະທານກ່ອນທີ່ຈະຖືກຍຸບ.
ນອກເໜືອໄປຈາກ 8 ຄົນທີ່ຖືກຈັບໃນການຂຽນຂໍ້ຄວາມໃນສື່ສັງຄົມເພື່ອລະນຶກເຖິງວັນທີ 4 ມິຖຸນາ ແລ້ວ, ຕຳຫຼວດຮົງກົງ ຍັງໄດ້ກັກຕົວນັກສິລະປິນ ຊັນມູ ເຊິນ (Sanmu Chen) ໃນວັນຈັນວານນີ້ ຢູ່ໃນເຂດການຄ້າທີ່ມີວຸ້ນວາຍໃນເມືອງ Causeway Bay, ໃກ້ກັບສວນສາທາລະນະ ວິກຕໍເຣຍ.
ຟໍຣັມສະແດງຄວາມຄິດເຫັນ