ລິ້ງ ສຳຫລັບເຂົ້າຫາ

logo-print

ສຫລ ຈີນ ຕົກລົງກັນ ຫຼາຍເລື່ອງ ໃນການພົບປະ ສຸດຍອດ ທີ່ລັດ ຄາລີຟໍເນຍ (ວີດີໂອ)


ປະທານາທິບໍດີ ບາຣັກ ໂອບາມາ ແລະປະທານປະເທດຈີນ ທ່ານ Xi Jinping (ຊ້າຍ) ພວມຍ່າງລົມກັນ ທີ່ບ່ອນຕາກອາກາດ Annenberg ໃນເຂດ Rancho Mirage ລັດ ຄາລີຟໍເນຍ (8 ມິຖຸນາ 2013)
ເຈົ້າໜ້າທີ່ສະຫະລັດ ແລະຈີນ ໄດ້ຕົກລົງກັນ ຢູ່ທີ່ກອງປະຊຸມສຸດ ຍອດແບບບໍ່ເປັນທາງການໃນມື້ວັນສຸກແລະວັນເສົາຜ່ານມານັ້ນ
ວ່າ ຈະເຮັດວຽກຮ່ວມກັນ ເພື່ອຮັບມື ກັບການປ່ຽນແປງ ຂອງດິນ
ຟ້າອາກາດແລະຍຸຕິໂຄງການອາວຸດນິວເຄລຍຂອງເກົາຫຼີເໜືອ. ທັງສອງຝ່າຍໄດ້ສົນທະນາຫາລືກັນ ກ່ຽວກັບບັນຫາຄວາມປອດ ໄພທາງອິນເຕີແນັດຊຶ່ງເປັນບັນຫາລະອຽດອ່ອນຕະຫຼອດທັງບັນ ຫາອື່ນໆໃນຂອບເຂດທີ່ກວ້າງຂວາງ. Bill Ide ຜູ້ສື່ຂ່າວວີໂອເອ ລາຍງານມາຈາກກຸງປັກກິ່ງວ່າ ຍັງບໍ່ທັນ ເປັນທີ່ຈະແຈ້ງເທື່ອວ່າ ການເຈລະຈາດັ່ງກ່າວຈະມີຜົນສໍ່າໃດ ໃນແກ້ໄຂບັນຫາຂັດແຍ້ງ
ທີ່ສຳຄັນໆແລະຫຼຸດຜ່ອນຄວາມບໍ່ໄວ້ເນື້ອເຊື່ອໃຈຊຶ່ງກັນແລະກັນ ລະຫວ່າງປະເທດມະຫາອຳນາດ ຂອງໂລກທັງສອງ. ໄພສານ ມີ
ລາຍລະອຽດ ມາສະເໜີທ່ານ ໃນອັນດັບຕໍ່ໄປ.

ລິງໂດຍກົງ

ການລາຍງານຂ່າວຢູ່ຈີນ ກ່ຽວກັບກອງປະຊຸມສຸດຍອດທີ່ບໍ່ເປັນທາງການ ລະຫວ່າງສະຫະ ລັດກັບຈີນເມື່ອໄວໆມານີ້ ສ່ວນໃຫຍ່ແລ້ວ ແມ່ນເປັນໄປໃນທາງບວກ ແລະກໍຍັງສືບຕໍ່ເປັນ ຫົວຂໍ້ຂ່າວອັນດັບນຶ່ງ ຂອງລາຍການຂ່າວທຸກໆຊົ່ວໂມງ ນຶ່ງມື້ກວ່າໆຫຼັງຈາກກອງປະຊຸມດັ່ງ ກ່າວໄດ້ສິ້ນສຸດລົງ ຢູ່ທີ່ລັດຄາລີຟໍເນຍນັ້ນ.

ໃນມື້ວັນຈັນຜ່ານມານີ້ໜັງສືພິມປະຊາຊົນລາຍວັນຫຼື China Daily ຂອງທາງການຈີນພາດ ຫົວຂໍ້ຂ່າວວ່າ “ພ້ອມແລ້ວທີ່ຈະເປີດບົດຕອນໃໝ່” ໃນໜ້າທຳອິດຂອງຕົນ. ບົດຂຽນນີ້ ແມ່ນ ໄດ້ເນັ້ນຢໍ້າ ເຖິງຄຳເວົ້າ ຂອງລັດຖະມົນຕີອະວຸໂສຈີນ ທ່ານ Yang Jiechia ໃນຕອນປິດ ກອງປະຊຸມສຸດຍອດ ຊຶ່ງເອີ້ນການເຈລະຈາທີ່ດຳເນີນໄປເປັນເວລາດົນກວ່າ 8 ຊົ່ວໂມງນັ້ນ ວ່າ ບໍ່ເຄີຍມີມາກ່ອນ ຖ້າເວົ້າເຖິງເລື່ອງເວລາ ຄຸນນະພາບ ແລະການລົງເລິກ.

ສ່ວນທ່ານ Tom Donilon ທີ່ປຶກສາດ້ານຄວາມໝັ້ນຄົງແຫ່ງຊາດຂອງສະຫະລັດຊຶ່ງພ້ອມໆ ກັນກັບທ່ານ Yang ກໍໄດ້ຖະແຫຼງຕໍ່ສື່ມວນຊົນໃນຕອນທ້າຍຂອງກອງປະຊຸມສຸດຍອດຄືກັນ ແລະໄດ້ເອີ້ນການພົບປະ ໃນຄັ້ງນີ້ວ່າ ເປັນໄປໃນທາງສ້າງສັນ ໃນຂອບເຂດທີ່ກວ້າງຂວາງ ແລະໃນທາງບວກ.

ທ່ານ Jean-Pierre Cabestan ນັກລັດຖະສາດການເມືອງ ທີ່ມະຫາວິທະຍາໄລ ບັບຕິສ ຮົງກົງກ່າວວ່າ ທັງສອງຝ່າຍຕ່າງກໍຢາກເວົ້າວ່າ ການພົບປະໃນຄັ້ງນີ້ ເປັນໄປໃນທາງບວກ. ທ່ານເວົ້າວ່າ ພວກເຂົາເຈົ້າຢາກບອກໃຫ້ໂລກຮູ້ວ່າ ເຂົາເຈົ້າຈະດຳເນີນງານຮ່ວມກັນ ເພື່ອ ຢ່າງໜ້ອຍ ກໍຫຼຸດຜ່ອນຄວາມຂັດແຍ້ງກັນ ຖ້າຫາກວ່າແກ້ໄຂບໍ່ໄດ້.

ທ່ານ Cabestan ເວົ້າວ່າ “ແຕ່ກໍຫັ້ນແຫລະ ຍັງຈະຕ້ອງໄດ້ມີການລໍຖ້າເບິ່ງວ່າກອງ ປະຊຸມສຸດຍອດນີ້ຈະມີຄວາມສຳຄັນຫຼືບໍ່ຕໍ່ຄວາມສຳພັນໃນອະນາຄົດລະຫວ່າງສະ ຫະລັດກັບຈີນ ຫຼືວ່າຈະຖືກພິຈາລະນາໃນອະນາຄົດວ່າ ເປັນການດຳເນີນຄວາມ ພະຍາຍາມຢ່າງບໍ່ສໍາເລັດຜົນ ເພື່ອປົວແປງຄວາມສຳພັນທີ່ບັນຫາຂັດແຍ້ງໂຕຈິງ ນັບມື້ນັບເຕີບໃຫຍ່ຂະຫຍາຍໂຕຂຶ້ນ ກາຍຂົງເຂດຂອງການຮ່ວມມື.”



ໃນເວລານີ້ ຂົງເຂດທັງໝົດ ທີ່ສະຫະລັດແລະຈີນ ມີການຮ່ວມມືກັນເພີ້ມຂຶ້ນນັ້ນ ກໍມີບັນຫາ ທ້າທາຍຕ່າງໆເຊັ່ນດຽວກັນ. ໂຕຢ່າງ ປະເທດທັງສອງ ໄດ້ດຳເນີນງານຮ່ວມກັນມາເປັນເວ ລາຫຼາຍໆປີເພື່ອເສີມສ້າງຄວາມສຳພັນລະຫວ່າງກອງທັບກັບກອງທັບ ເຖິງແມ່ນວ່າໄດ້ດຳ ເນີນໄປຢ່າງຊ້າໆກໍຕາມ.

ໃນລະຫວ່າງ ການເຈລະຈາກັນຄັ້ງນີ້ ຈີນ ໄດ້ຕົກລົງ ທີ່ຈະເຂົ້າຮ່ວມ ການຊ້ອມລົບຮ່ວມກັບ ກອງທັບເຮືອສະຫະລັດເປັນເທື່ອທຳອິດໃນລະດູຮ້ອນໜ້າ. ການເສີມຂະຫຍາຍການສື່ສານ ຄົມມະນາຄົມ ລະຫວ່າງກອງທັບກັບກອງທັບ ຂອງປະເທດທັງສອງ ແມ່ນເປັນສິ່ງນຶ່ງທີ່ພວກ ນັກວິເຄາະເວົ້າວ່າ ອາດສາມາດຊ່ອຍໄດ້ຫຼາຍໃນການຫຼີກລ່ຽງບໍ່ໃຫ້ເກີດບັນຫາຂັດແຍ້ງໃນ ເວລາທີ່ໄພຂົມຂູ່ ຈາກການຄຳນວນຜິດພາດນັບມື້ນັບເພີ້ມທະວີຂຶ້ນ.

ການເຄື່ອນໄຫວເພີ້ມຂຶ້ນຂອງຈີນເພື່ອປ້ອງກັນໃນອັນທີ່ຈີນເວົ້າວ່າການອ້າງກຳມະສິດຂອງ ຕົນໃນເຂດທະເລຈີນໃຕ້ ພວມສ້າງຄວາມວິຕົກກັງວົນຕື່ມຂຶ້ນ ຢູ່ໃນຂົງເຂດ. ສຳລັບປັກກິ່ງ ເອງແລ້ວ ກໍແມ່ນມີຄວາມສົງໄສຢ່າງໃຫຍ່ຫຼວງຕໍ່ການດຳເນີນຄວາມພະຍາຍາມຂອງສະຫະ ລັດທີ່ຈະເພັ່ງເລັງຄວາມສົນໃຈຂອງຕົນຄືນໃໝ່ໄປຍັງຂົງເຂດເອເຊຍບໍ່ພຽງແຕ່ໃນດ້ານເສດ ຖະກິດທໍ່ນັ້ນແຕ່ຍັງຮວມທັງດ້ານທະຫານນຳດ້ວຍ.

ເປັນທີ່ຄາດກັນວ່າ ກອງທັບເຮືອຂອງສະຫະລັດຈະຫັນປ່ຽນກອງກຳລັງທັງໝົດຂອງຕົນ 60 ເປີເຊັນ ໄປຍັງເຂດມະຫາສະມຸດປາຊີຟິກ ພາຍໃນປີ 2020 ໃນອັນທີ່ພວກນັກຍຸດທະສາດ ບາງຄົນໃນຈີນເຊື່ອວ່າ ເປັນພາກສ່ວນນຶ່ງໃນການດຳເນີນຄວາມພະຍາຍາມ ເພື່ອປິດລ້ອມ ຈີນແລະຕໍ່ຕ້ານການໂຜ່ໂຕຂຶ້ນມາມີອິດທິພົນເພີ້ມຂຶ້ນຂອງຈີນ.

ທ່ານເສຍ ທ້າວແມ່ນອາຈານສອນຢູ່ມະຫາວິທະຍາໄລທີ່ສຶກສາກ່ຽວກັບຕ່າງປະເທດຢູ່ທີ່ກຸງ ປັກກິ່ງ.

ທ່ານເສຍ ທ້າວ ກ່າວວ່າ “ທ່ານຈົ່ງເບິ່ງການເຄື່ອນໄຫວທາງບົກຂອງສະຫະລັດຫຼາຍໆ ຢ່າງແມ່ນເປັນພຽງສັນຍາລັກທໍ່ນັ້ນ. ໂຕຢ່າງການສົ່ງທະຫານ 1,200 ຄົນໄປປະຈຳ ທີ່ເມືອງ Darwin ໃນພາກເໜືອຂອງອອສເຕຣເລຍ ແລະ ການຊ້ອມລົບຮ່ວມທາງ ທະຫານກັບຟີລິບປິນ. ສິ່ງເຫຼົ່ານີ້ ແມ່ນເປັນພຽງສັນຍາລັກຫຼາຍກວ່າສາລະ. ແຕ່ໃນ ຄວາມເຫັນຂອງຊາວຈີນແລ້ວ ມັນແມ່ນຄໍາຖາມວ່າ ເປັນຫຍັງສະຫະລັດຈຶ່ງກັບຄືນ ມາ?”



ສະຫະລັດກ່າວວ່າ ບັນຫານຶ່ງທີ່ສຳຄັນ ຕໍ່ອະນາຄົດຂອງຄວາມສຳພັນສອງຝ່າຍ ກໍຄືຄວາມ ປອດໄພທາງດ້ານອິນເຕີແນັດ. ນັບເປັນເວລາຫຼາຍໆເດືອນມາແລ້ວທີ່ປະເທດທັງສອງຕ່າງ ກໍກ່າວຫາຊຶ່ງກັນແລະກັນກັບໄປກັບມາວ່າເປັນແຫຼ່ງທີ່ມາຂອງການໂຈມຕີຊຶ່ງໄດ້ສ້າງຄວາມ ເສຍຫາຍຢ່າງໜັກຕໍ່ເສດຖະກິດແລະຄວາມໝັ້ນຄົງແຫ່ງຊາດ.

ຜູ້ນຳຂອງສະຫະລັດແລະຈີນ ບໍ່ໄດ້ມີກຳນົດທີ່ຈະພົບປະກັນຈົນກ່ວາທ້າຍປີນີ້ແລະພວກນັກ ວິເຄາະການເມືອງ ກ່າວວ່າ ຄວາມວິຕົກກັງວົນ ກ່ຽວກັບການໂຈມຕີທາງອິນເຕີແນັດ ແລະ ການຫັນຄວາມສົນໃຈກັບຄືນໄປສູ່ຂົງເຂດເອເຊຍປາຊີຟິກຄືນອີກຂອງສະຫະລັດແມ່ນເປັນ ເຫດຜົນທີ່ພາໃຫ້ພວກທ່ານພົບປະກັນໄວຂຶ້ນ.

ໃນກອງປະຊຸມຫາລືເລື່ອງຍຸດທະສາດແລະເສດຖະກິດໃນເດືອນໜ້ານີ້ ຊຶ່ງເປັນການເຈລະ ຈາປະຈຳປີໃນຂອບເຂດທີ່ກວ້າງຂວາງລະຫວ່າງປະເທດທັງສອງນັ້ນສະຫະລັດແລະຈີນຈະ ຈັດໃຫ້ມີການໂອ້ລົມກັນແບບພິເສດຂອງເຈົ້າໜ້າທີ່ກ່ຽວກັບຄວາມປອດໄພດ້ານອິນເຕີແນັດ.

ພວກນັກວິເຄາະເວົ້າວ່າ ສ່ວນນຶ່ງຂອງບັນຫາທ້າທາຍໃນການຮັບມືກັບບັນຫາໃນຂອບເຂດ ທີ່ກວ້າງຂວາງຕ່າງໆກໍຄືປະເທດທັງສອງຕ່າງກໍມີຜົນປະໂຫຍດແຫ່ງຊາດຂອງຕົນແລະການ ພະຍາຍາມຮັກສາເພື່ອໃຫ້ມີຄວາມກໍ້າເກິ່ງສົມດຸນກັນນັ້ນ ແມ່ນຂ້ອນຂ້າງຍາກ.

ຄວາມເຫັນບົດນຶ່ງ ທີ່ລົງພິມຢູ່ໃນໜັງສືພິມ Global Times ຂອງທາງການຈີນ ໃນມື້ວັນຈັນ ຜ່ານມານີ້ໂຕ້ແຍ້ງວ່າ ມັນບໍ່ຍຸຕິທຳທີ່ຈະຄິດວ່າ ຈີນບໍ່ຢາກແກ້ໄຂບັນຫາທີ່ສຳຄັນຕ່າງໆ ແຕ່ ກໍກ່າວຕື່ມວ່າ ຄວາມຮຽກຮ້ອງຕ້ອງການຂອງສະຫະລັດນັ້ນ ສ່ວນຫລາຍແລ້ວ ມັກຈະເປັນ ສິ່ງທີ່ຈະປະຕິບັດຕາມໄດ້ຍາກ.

ເບິ່ງວີດີໂອ ກ່ຽວຂ້ອງ:

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ

ທ່ານອາດຈະມັກເລື້ອງນີ້ຄືກັນ

XS
SM
MD
LG