ເກົາຫຼີເໜືອ ໄດ້ເປີດດຳເນີນການບໍລິການຮ້ານອາຫານ ຫຼາຍກວ່າ 50 ຮ້ານ ທີ່ມີພົນລະເມືອງຂອງຕົນເຮັດວຽກຢູ່ທີ່ນັ້ນ ໃນເມືອງຕ່າງໆຂອງຈີນ ຫຼາຍກວ່າ 10 ຕົວເມືອງ ເຊິ່ງຖືເປັນການລະເມີດມາດຕະການລົງໂທດຂອງອົງການສະຫະປະຊາຊາດ, ອີງຕາມແຫຼ່ງຂ່າວທາງການທູດ.
ລະບອບການປົກຄອງຂອງເກົາຫຼີເໜືອ ຕັດເອົາເງິນຄ່າຈ້າງສ່ວນຫຼາຍທີ່ຄົນງານຂອງຕົນໄດ້ຮັບຢູ່ໃນຕ່າງປະເທດ ເພື່ອສະໜອງທຶນໃຫ້ໂຄງການນິວເຄລຍ ແລະລູກສອນໄຟຂີປະນາວຸດ.
ແຫຼ່ງຂ່າວ ເຊິ່ງບໍ່ປະສົງອອກຊື່ ເນື່ອງຈາກບໍ່ໄດ້ຮັບອະນຸຍາດໃຫ້ເວົ້າກັບສື່ມວນຊົນ ໄດ້ບອກຊື່ຮ້ານອາຫານ ເປັນພາສາເກົາຫຼີ ແລະ ຈີນ ແລະ ທີ່ຢູ່ໃນຈີນ ໃຫ້ກັບ ວີໂອເອພະແນກພາສາເກົາຫຼີ.
ຄະນະຜູ້ຊ່ຽວຊານຂອງສະຫະປະຊາຊາດ ທີ່ຕິດຕາມເບິ່ງການບັງຄັບໃຊ້ມາດຕະການລົງໂທດຕໍ່ເກົາຫລີເໜືອ ຄາດວ່າ ຈະຮວບຮວມລາຍຊື່ດັ່ງກ່າວໄວ້ໃນລາຍງານ ທີ່ມີກຳນົດຈະພິມອອກເຜີຍແຜ່ໃນອີກບໍ່ເທົ່າໃດອາທິດຂ້າງໜ້າ, ແຫຼ່ງຂ່າວກ່າວ.
ສະຫະລັດ ໄດ້ຮຽກຮ້ອງໃຫ້ບັນດາປະເທດສະມາຊິກຂອງສະຫະປະຊາຊາດທັງໝົດ ບັງຄັບໃຊ້ມາດຕະການລົງໂທດຕໍ່ເກົາຫລີເໜືອ ເມື່ອຖືກຖາມກ່ຽວກັບການຄົ້ນພົບຂອງວີໂອເອພະແຍກພາສາເກົາຫລີນັ້ນ.
ໂຄສົກຂອງກະຊວງການຕ່າງປະເທດສະຫະລັດກ່າວວ່າ "ພາຍໃຕ້ມະຕິຂອງສະພາຄວາມໝັ້ນຄົງ ເລກທີ 2397, ທຸກໆປະເທດສະມາຊິກຂອງ ສປຊ ມີພັນທະທີ່ຈະຕ້ອງສົ່ງພົນລະເມືອງຂອງ ສປປ ເກົາຫຼີ ທີ່ມີລາຍຮັບໃນເຂດປົກຄອງຂອງຕົນກັບປະເທດ ພາຍໃຕ້ຂໍ້ຍົກເວັ້ນບາງປະການ."
"ລາຍຮັບທີ່ມາຈາກການອອກແຮງງານ ສປປ ເກົາຫຼີ ຢູ່ຕ່າງປະເທດ ຈະຖືກນຳໃຊ້ເພື່ອສະໜອງທຶນໃຫ້ແກ່ໂຄງການ ອາວຸດທຳລາຍລ້າງ ຫຼື WMD (weapon of mass distruction) ແລະລູກສອນໄຟຂີປະນາວຸດຂອງ ສປປ ເກົາຫຼີ", ໂຄສົກຂອງກະຊວງການຕ່າງປະເທດສະຫະລັດ ບອກກັບວີໂອເອຜ່ານທາງອີເມລ ຕື່ມ ໃນວັນອັງຄານທີ່ຜ່ານມາ.
ສະພາຄວາມໝັ້ນຄົງສະຫະປະຊາຊາດ ໄດ້ຜ່ານມະຕິ ເລກທີ 2397 ໃນປີ 2017 ທີ່ກຳນົດໃຫ້ ປະເທດສະມາຊິກທັງໝົດ ສົ່ງແຮງງານເກົາຫຼີເໜືອ ກັບຄືນປະເທດ ກ່ອນເດືອນທັນວາ 2019.
ຟໍຣັມສະແດງຄວາມຄິດເຫັນ