ລິ້ງ ສຳຫລັບເຂົ້າຫາ

​ສະຫະລັດ​ມີ​ຄວາມ​ເປັນ​ຫ່ວງຫຼາຍທີ່​ສຸດ​ຕໍ່​ເຫດການ​ຄວາມ​ຮຸນ​ແຮງ​ທີ່​ກໍາລັງ​ດໍາ​ເນີນ​ໄປຢູ່​ໃນ​ລັດ​ກະ​ຈິນຂອງ​ມຽນມາ ບ່ອນ​ທີ່​ການສູ້​ລົບ​ຍັງດຳ​ເນີນ​ຕໍ່​ໄປ​ຢ່າງ​ບໍ່​ລົດ​ລະ​ ລະຫວ່າງ ກອງທັບ ແລະ​ກຸ່ມ​ກະບົດ ທັງໆ​ທີ່​ມີ​ສັນຍາ​ຢຸດ​ຍິງກັນ​ແລ້ວກໍ​ຕາມ.

ຖະ​ແຫຼງການ​ສະບັບ​ນຶ່ງ​ຈາກ​ສະຖານທູດ​ສະຫະລັດ​ທີ່​ນະຄອນ​ຢາງກຸ້ງ​ເມື່ອ ວັນ​ພະຫັດ​ມື້​ນີ້ ​ເວົ້າ​ວ່າ ກອງທັບ​ລັດຖະບານ​ມຽນມາ ກໍາລັງ​ສືບ​ຕໍ່ບຸກ​ໂຈມ ຕີຢູ່​ໃນ​ລັດ​ທາງ​ພາກ​ຕາ​ເວັນ​ອອກສຽງເໜືອ​ຂອງ​ປະ​ເທດ. ຖະ​ແຫຼງການ​ໄດ້ ອ້າງ​ລາຍ​ງານ​ສື່​ມວນ​ຊົນ ​ແລະ​ອົງການ​ທີ່​ບໍ່​ຂຶ້ນກັບ​ລັດຖະບານ ​ແລະ​ເວົ້າ​ຕື່ມ​ວ່າ ການ​ບຸກ​ໂຈມ​ຕີ​ດັ່ງກ່າວ ​ຍັງ​ຜົນ​ໃຫ້​ພົນລະ​ເຮືອນ​ບາດ​ເຈັບ​ລົ້ມ​ຕາຍ ​ແລະ​ບ່ອນ​ທຳລາຍຕໍ່ການ​ດຳ​ເນີນຄວາມ​ພະຍາຍາມ​ເພື່ອ​ໃຫ້ບັນລຸ​ການ​ສ້າງ ຄວາມ​ຖືກຕ້ອງ​ປອງ​ດອງ​ຊາດ.

ປະທານາທິບໍດີ ທຽນ ​ເຊ​ນ ​ໄດ້​ປະກາດ​ການ​ຢຸດ​ຍິງ​ຝ່າຍ​ດຽວ​ໃຫ້​ມີ​ຜົນ​ບັງ ຄັບ​ໃຊ້​ຕັ້ງ​ແຕ່​ວັນ​ເສົາ​ນີ້​ເປັນ​ຕົ້ນ​ໄປ ​ແຕ່​ການ​ສູ້​ລົບ​ກັນ​ເປັນ​ຄັ້ງ​ຄາວ​ນັ້ນ​ກໍ​ຍັງມີ​ຢູ່​ຕໍ່​ໄປ. ພວກ​ເຫັນ​ເຫດການ ​ແລະ​ທາງ​ການ​ກຸ່ມ​ກະບົດ​ບອກ​ວີ​ໂອ ​ເອວ່າ ທະຫານ​ມຽນມາ​ໄດ້​ໃຊ້​ວິທີ​ການ​ຢຸດ​ຍິງ​ເປັນ​ເວລາ​ສັ້ນໆເພື່ອ​ບຸກຄືບ​ໜ້າ​ໄປຍັງ​ທີ່​ໝັ້ນ​ຂອງ​ກຸ່ມ​ກະບົດ.

​ໃນ​ຄໍາ​ປາໄສ​ບັ້ນ​ນຶ່ງ​ທີ່​ນະຄອນ​ຢາງ​ກຸ້ງ​ເມື່ອ​ວັນ​ອາທິດ​ຜ່ານ​ມາ​ນີ້ ທ່ານ ທຽນ ​ເຊ​ນ ​ເວົ້າ​ວ່າ ທະຫານ​ລັດຖະບານ ​ແມ່ນ​ຢູ່ໃນ​ບໍລິ​ເວ​ນໃກ້ໆ​ຄ້າຍ​ກອງທັບ​ເອກ​ກະລາດ​ກະ​ຈິນ ທີ່​ເມືອງ Laiza ຕິດ​ກັບ​ຊາຍ​ແດນ​ຈີນ.

ທ່ານ ທຽນ ​ເຊ​ນ ​ເວົ້າ​ອີກ​ວ່າ ທ່ານ​ໄດ້​ສັ່ງ​ໃຫ້​ທະຫານ​ຢຸດ​ໂຈມ​ຕີ​ຄ້າຍຂອງ​ກຸ່ມ​ກະບົດ ດັ່ງກ່າວ ​ເພື່ອສະ​ແດງ​ເຖິງ​ໄມຕີຈິດ​ມິດຕະພາບ​ອັນ​ດີ ​ແລະ​ທ່ານ​ໄດ້​ຮຽກຮ້ອງ​ໃຫ້​ກອງທັບ​ເອກ​ກະລາດ​ກະ​ຈິນ ຫຼື KIA ຈົ່ງ​ກັບ​ຄືນເຂົ້າຮ່ວມ​ເຈລະຈາ​ກັນ ​ໄວ​ທີ່​ສຸດ​ເທົ່າ​ທີ່​ຈະ​ໄວ​ໄດ້.

ຖະ​ແຫຼງການ​ສະບັບ​ດັ່ງກ່າວ​ຂອງ​ສະຖານທູດ​ສະຫະລັດ​ເມື່ອ​ວັນ​ພະຫັດ​ມື້​ນີ້ ​ໄດ້​ຮຽກຮ້ອງ​ໃຫ້ທັງ​ສອງ​ຝ່າຍ ຈົ່ງ​ເອົາ​ທຸກ​ບາດກ້າວ​ທີ່​ຈໍາ​ເປັນ ​ເພື່ອ​ສ້າງ​ບັນຍາກາດສຳລັບການ​ໂອ້ລົມເຈລະຈາ​ກັນ. ນອກ​ນີ້​ຖະ​ແຫຼງການຍັງ​ໄດ້​ຮຽກຮ້ອງ​ໃຫ້​ມຽນມາ​ ເປີດ​ໂອກາດ​ໃຫ້​ພວກ​ປະ ຊາຊົນ​ທີ່​ຕ້ອງການ ການ​ຊ່ວຍ​ເຫຼືອທີ່​ສຸດ ​ໃຫ້​ໄດ້​ຮັບ​ການ​ຊ່ວຍ​ເຫຼືອ​ຈາກ​ສະຫະ​ປະຊາ​ຊາດ ​ແລະ​ບັນດາອົງການຊ່ວຍເຫຼືອຂອງ​ລະຫວ່າງຊາດ​ນັ້ນ​ໄດ້.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG