ບັນດາຜູ້ລົງແຂ່ງຂັນເອົາຕຳແໜ່ງປະທານາທິບໍດີ ສະຫະລັດ ສັງກັດພັກເດໂມແຄຣັດ ໄດ້ແນເປົ້າໃສ່ຜູ້ມີຄະແນນນຳໜ້າທ່ານ ເບີນີ ແຊນເດີຣ໌ສ ໃນການໂຕ້ວາທີທີ່ມີສຽງດັງອຶກກະທຶກໃນຄືນວັນອັງຄານວານນີ້, ໂດຍໂຕ້ແຍ້ງວ່າ ຜູ້ທີ່ປະກາດຕົນເອງເປັນນັກສັງຄົມນິຍົມປະຊາທິປະໄຕນັ້ນ ຈະຜ່າຍແພ້ໃຫ້ປະທານາທິບໍດີ ດໍໂນລ ທຣຳ ສັງກັດພັກຣີພັບບລີກັນ ໃນການເດືອນເລືອກເດືອນພະຈິກນີ້ ຖ້າທ່ານຖືກເລືອກເປັນຕົວແທນຕາງໜ້າຂອງພັກ.
ອະດີດເຈົ້າຄອງນະຄອນ ນິວຢອກ ທ່ານ ໄມເກິລ ບລູມເບີກ ໄດ້ກ່າວໃນການໂຕ້ວາທີປະທານາທິບໍດີຄັ້ງທີ 10 ຂອງພັກເດໂມແຄຣັດ ຢູ່ເວທີໃນເມືອງ ຊາລສຕັນ, ລັດ ຄາໂຣໄລນາໃຕ້, ສີ່ວັນກ່ອນການເລືອກຕັ້ງຂັ້ນຕົ້ນປະທານາທິບໍດີ ຄັ້ງສຳຄັນ ໃນລັດທີ່ຕັ້ງຢູ່ພາກໃຕ້ໃນວັນເສົານີ້ວ່າ “ທ່ານ ເບີນີ ຈະເສຍໃຫ້ທ່ານ ດໍໂນລ ທຣຳ, ແລະ ສະພາຕ່ຳ ກັບ ສະພາສູງຈະກັບຄືນໄປເປັນຂອງພັກຣີພັບບລີກັນ.”
ທ່ານ ແຊນເດີສ໌ ໄດ້ໂຕ້ກັບວ່າ ການສຳຫຼວດທົ່ວປະເທດໄດ້ສະແດງໃຫ້ເຫັນວ່າ ໃນການແຂ່ງຂັນສົມມຸດຖານ 50 ຄັ້ງທີ່ຜ່ານມາກັບທ່ານ ທຣຳ ນັ້ນ, ທ່ານໄດ້ຊະນະທ່ານ ທຣຳ 47 ຄັ້ງ.
ແຕ່ທ່ານ ບລູມເບີກ ໄດ້ຕອບຄືນ, ດ້ວຍການແນມເບິ່ງທ່ານ ແຊນເດີສ໌ ໂດຍກົງນັ້ນວ່າ, “ພວກທ່ານຈິນຕະນາການ ສະມາຊິກຣີພັບບລີກັນຫົວປານກາງຈະລົງຄະແນນສຽງໃຫ້ລາວຢູ່ຫວາ?”
ຜູ້ລົງແຂ່ງຂັນອີກທ່ານນຶ່ງຄື, ສະມາຊິກສະພາສູງຈາກລັດ ແມສຊາຈູເຊັດສ໌ ທ່ານນາງ ເອລິຊາເບັດ ວໍເຣັນ, ເຊິ່ງແມ່ນພັນທະມິດຂອງທ່ານ ແຊນເດີຣ໌ສ ມາດົນນານນັ້ນ, ໄດ້ໂຕ້ແຍ້ງວ່າ, “ຂ້າພະເຈົ້າຈະເປັນປະທານາທິບໍດີທີ່ດີກວ່າທ່ານ ເບີນີ,” ໂດຍເວົ້າວ່າ ເພິ່ນສາມາດພັດທະນາເປົ້າໝາຍນະໂຍບາຍຫົວກ້າວໜ້າຕ່າງໆທີ່ເຂົາເຈົ້າແລກປ່ຽນກັນ ແລະ ທ່ານ ເບີນີ ຈະບໍ່ສາມາດເຮັດໄດ້.
ບັນດາຄູ່ແຂ່ງຂອງທ່ານ ແຊນເດີສ໌ ໄດ້ທຳການໂຈມຕີແລ້ວໂຈມຕີອີກໃສ່ສະມາຊິກສະພາສູງອາຍຸ 78 ປີນັ້ນ, ຕໍ່ວ່າທ່ານ ໃນການສະໜັບສະໜູນໂຄງການປະກັນສຸຂະພາບຂອງລັດຖະບານ ທີ່ອາດມີຄ່າໃຊ້ຈ່າຍ ຫົກສິບພັນຕື້ໂດລາໃນນຶ່ງທົດສະວັດ ແລະ ສິ້ນສຸດແຜນການປະກັນໄພເອກະຊົນທີ່ປະຊາຊົນ ອາເມຣິກັນ 160 ລ້ານຄົນໃຊ້ ເພື່ອຊ່ວຍຈ່າຍຄ່າປິ່ນປົວສຸຂະພາບຂອງເຂົາເຈົ້າ. ພວກເພິ່ນຍັງໄດ້ໂຈມຕີທ່ານ ແຊນເດີສ໌ ສຳລັບການຄັດຄ້ານຮ່າງກົດໝາຍຕ່າງໆໃນລັດຖະສະພາ ທີ່ຈະເຮັດໃຫ້ຜູ້ຜະລິດປືນເປັນຜູ້ຮັບຜິດຊອບ ສຳລັບຄວາມຮຸນແຮງຈາກປືນໃນ ສະຫະລັດ.
ທ່ານ ແຊນເດີສ໌ ໄດ້ກ່າວປ້ອງກັນແຜນການ “ປະກັນສຸຂະພາບສຳລັບທຸກຄົນ ຫຼື Medicare for All” ທີ່ເປັນສັນຍາລັກຂອງທ່ານວ່າ ມັນຈະຕັດຄ່າໃຊ້ຈ່າຍປະກັນສຸຂະພາບຂອງປະຊາຊົນ ອາເມຣິກັນ ຫຼາຍລ້ານຄົນລົງ. ທ່ານໄດ້ຍອມຮັບວ່າ ການລົງຄະແນນສຽງໃຫ້ກົດໝາຍ ກ່ຽວກັບ ປືນ “ແມ່ນການລົງຄະແນນສຽງທີ່ບໍ່ດີ.”
ທ່ານ ແຊນເດີຣ໌ສ, ເຊິ່ງແມ່ນສະມາຊິກສະພາສູງເປັນເວລາດົນນານຈາກລັດ ເວີມັອນ ທາງພາກຕາເວັນອອກສຽງເໜືອຂອງ ສະຫະລັດ ນັ້ນ, ໄດ້ກ້າວຂຶ້ນສູ່ລະດັບສູງສຸດຂອງການຢັ່ງຫາງສຽງແຫ່ງຊາດ ຂອງບັນດາຜູ້ປ່ອນບັດພັກເດໂມແຄຣັດ, ແຕ່ບັນດາຄູ່ແຂ່ງຂອງທ່ານສຳລັບການຖືກສະເໜີຊື່ຕາງໜ້າໃຫ້ພັກເດໂມແຄຣັດ ໄດ້ກ່າວວ່າ ທ່ານກ້າວບໍ່ທັນກັບບັນດາຜູ້ລົງຄະແນນສຽງ ອາເມຣິກັນ, ແລະ ຈະທຳລາຍຄວາມຄາດຫວັງຂອງພັກເດໂມແຄຣັດ ໃນການໄດ້ຊະນະບ່ອນນັ່ງຕ່າງໆ ໃນລັດຖະສະພາ ໃນເດືອນພະຈິກນີ້.
