ລິ້ງ ສຳຫລັບເຂົ້າຫາ

 
ເຮືອບິນໂດຍສານ ແດລຕ້າ ພິກປີ້ນຢູ່ທາງແລ່ນ ທີ່ເຕັມໄປດ້ວຍຫິມະ ໃນນະຄອນໂຕຣອນໂຕ ແລະຜູ້ໂດຍສານທັງໝົດ 80 ຄົນລອດຊີວິດ
ວັນເສົາ, ໐໕ ເມສາ ໒໐໒໕

ເຮືອບິນໂດຍສານ ແດລຕ້າ ພິກປີ້ນຢູ່ທາງແລ່ນ ທີ່ເຕັມໄປດ້ວຍຫິມະ ໃນນະຄອນໂຕຣອນໂຕ ແລະຜູ້ໂດຍສານທັງໝົດ 80 ຄົນລອດຊີວິດ


ເຈົ້າໜ້າທີ່ກູ້ໄພ ເຮັດວຽກຢູ່ທີ່ສະຖານທີ່ເກີດອຸບັດຕິເຫດຂອງສາຍການບິນ Delta Air ຢູຮສະໜາມບິນສາກົນ Toronto Pearson ໃນເມືອງ ມິສຊິສຊົວກາ (Mississauga), ນະຄອນອນນໂຕຣິໂອ, ວັນທີ 17 ກຸມພາ 2025.
ເຈົ້າໜ້າທີ່ກູ້ໄພ ເຮັດວຽກຢູ່ທີ່ສະຖານທີ່ເກີດອຸບັດຕິເຫດຂອງສາຍການບິນ Delta Air ຢູຮສະໜາມບິນສາກົນ Toronto Pearson ໃນເມືອງ ມິສຊິສຊົວກາ (Mississauga), ນະຄອນອນນໂຕຣິໂອ, ວັນທີ 17 ກຸມພາ 2025.

ເຮືອບິນໂດຍສານລຳນຶ່ງຂອງສາຍການບິນ Delta Air Lines ໄດ້ພິກປີ້ນຫງາຍທ້ອງຂຶ້ນ ໃນຂະນະທີ່ບິນແລ່ນລົງຈອດຢູ່ສະໜາມບິນ ເພຍສັນ (Pearson) ຂອງນະຄອນ ໂຕຣອນໂຕ (Toronto) ໃນວັນຈັນວານນີ້, ແຕ່ຜູ້ໂດຍສານທັງໝົດ 80 ຄົນທີ່ເດີນທາງມາກັບເຮືອບິນ ແມ່ນລອດຊີວິດ, ແລະມີຜູ້ໄດ້ຮັບບາດເຈັບພຽງເລັກນ້ອຍ, ຕາມການກ່າວຂອງຫົວໜ້າບໍລິຫານສະໜາມບິນ.

ໃນເວລານັ້ນ, ມີຫິມະ​ພັດມາດ້ວຍ​ລົມແຮງ​ 65 ກິ​ໂລ​ແມັດ​ຕໍ່​ຊົ່ວ​ໂມງ ​ເມື່ອຖ້ຽວ​ບິນ​ຈາກ​ນະຄອນ​ມິນ​ເນ​ອາ​ໂປ​ລິ​ສ ທີ່​ບັນທຸກ​ຜູ້​ໂດຍສານ 76 ຄົນ ​ແລະພະນັກງານ​ເຮືອບິນ 4 ຄົນ ​ພະຍາຍາມບິນ​ລົງ​ຈອດ​ ໃນ​ເວລາບ່າຍ 2 ໂມງ 15 ​ນາທີ. ການຕິດຕໍ່ສື່ສານລະຫວ່າງຫໍຄອຍ ແລະນັກບິນ ແມ່ນດໍາເນີນການຕາມປົກກະຕິ, ແລະຍັງບໍ່ທັນຈະແຈ້ງວ່າ ແມ່ນຫຍັງຄືສິ່ງທີ່ຜິດພາດຢ່າງຮຸນແຮງເມື່ອເຮືອບິນບິນລົງສູ່ພື້ນເດີ່ນບິນ.

ເຈົ້າ​ໜ້າ​ທີ່​ກາ​ນາ​ດາ​ ໄດ້​ຈັດກອງປະຊຸມ​ຖະ​ແຫຼງ​ຂ່າວ​ສັ້ນ 2 ຄັ້ງ, ແຕ່​ບໍ່​ໄດ້​ໃຫ້​ລາຍ​ລະ​ອຽດ​ກ່ຽວ​ກັບ​ອຸ​ປະ​ຕິ​ເຫດ​ທີ່ເກີດຂຶ້ນ. ມີພຽງວິດີໂອທີ່ໂພສລົງໃນສື່ສັງຄົມສະແດງໃຫ້ເຫັນເຫດການເຮືອບິນ Mitsubishi CRJ-900LR ພິກປີ້ນ, ລຳໂຕຂອງເຮືອບິນຍັງຢູ່ໃນສະພາບສົມບູນ ແລະເຈົ້າໜ້າທີ່ດັບເພີງກໍາລັງດັບໄຟທີ່ຫຼົງເຫຼືອຢູ່ ໃນຂະນະທີ່ຜູ້ໂດຍສານໄດ້ພາກັນປີນອອກມາ ແລະ ຍ່າງຜ່ານເດີ່ນຈອດເຮືອບິນໄປ.

ທ່ານນາງ ເດໂບຣາ ຟລິນທ໌ (Deborah Flint), CEO ຂອງ Greater Toronto Airports Authority ກ່າວຕໍ່ບັນດານັກຂ່າວວ່າ “ພວກເຮົາຮູ້ສຶກດີໃຈຫຼາຍທີ່ບໍ່ມີການສູນເສຍຊີວິດ ແລະມີຜູ້ໄດ້ຮັບບາດເຈັບພຽງເລັກນ້ອຍ.”

ຫົວໜ້າກົມດັບເພີງ Toronto Pearson, ທ່ານ ທັອດ ໄອທ໌ເຄັນ (Todd Aitken) ກ່າວວ່າ ຜູ້ໂດຍສານ 18 ຄົນໄດ້ຖືກນໍາໄປໂຮງໝໍ. ໃນຊ່ວງທໍາອິດຂອງເວລານັ້ນ, ລົດສຸກເສີນ ອໍເລັນຈ໌ (Ornge) ປະຈຳເດີ່ນບິນ ເປີດເຜີຍວ່າ ພວກເຂົາໄດ້ນໍາສົ່ງຄົນເຈັບທີ່ເປັນເດັກນ້ອຍຄົນນຶ່ງໄປຍັງໂຮງໝໍ SickKids ຂອງນະຄອນໂຕລອນໂຕ, ແລະຜູ້ໃຫຍ່ອີກສອງຄົນ ທີ່ໄດ້ຮັບບາດເຈັບໄປອີກໂຮງໝໍນຶ່ງຂອງເມືອງ.

ພະນັກງານສຸກເສີນ ເດີນທາງມາຮອດເຮືອບິນພາຍໃນບໍ່ເທົ່າໃດນາທີ, ແລະ ທ່ານ ໄອທ໌ເຄັນ ກ່າວວ່າ ການຮັບມືກັບສະຖານະການ “ດໍາເນີນໄປຕາມແຜນການ.” ແລະກ່າວຕື່ມວ່າ “ທາງແລ່ນຂອງເຮືອບິນມີສະພາບແຫ້ງ ແລະບໍ່ມີສະພາບຂອງລົມພັດເຂົ້າມາຂວາງທາງ.”

ເຫດການໃນຄັ້ງນີ້ ເປັນອຸບັດເຫດທາງເຮືອບິນຄັ້ງໃຫຍ່ ເທື່ອທີ່ສີ່ຂອງອາເມລິກາເໜືອ ໃນຮອບສາມອາທິດທີ່ຜ່ານມາ, ເຊິ່ງເຮືອບິນໂດຍສານ​ລຳ​ນຶ່ງ ​ແລະ ​ເຮືອບິນ​ເຮ​ລິ​ຄັອບ​ເຕີ​ຂອງກອງທັບ​ ​ຕຳ​ກັນ​ຢູ່​ໃກ້​ສະໜາມ​ບິນ​ແຫ່ງ​ຊາດ ເຣແກນ (Reagan) ​ໃນ​ນະຄອນຫຼວງ​ວໍ​ຊິງ​ຕັນ ເມື່ອວັນ​ທີ 29 ມັງກອນທີ່ຜ່ານມາ​ນີ້, ​ສົ່ງຜົນເຮັດ​ໃຫ້ມີຜູ້ເສຍຊີວິດ 67 ຄົນ​. ເຮືອບິນຂົນສົ່ງທາງການແພດລຳນຶ່ງຕົກຢູ່ນະຄອນຟິລາເດລເຟຍ ເມື່ອວັນທີ 31 ມັງກອນທີ່ຜ່ານມາ ເຮັດໃຫ້ຜູ້ໂດຍສານຢູ່ເທິງເຮືອບິນເສຍຊີວິດ 6 ຄົນ ແລະອີກຄົນນຶ່ງຢູ່ພາກພື້ນດິນ. ແລະ​ໃນ​ວັນ​ທີ 6 ກຸມພາ​, ມີ​ຜູ້​ເສຍ​ຊີວິດ 10 ຄົນ​ ຈາກ​ອຸບັດ​ຕິເຫດ​ເຮືອບິນ​ຕົກ​ໃນລັດ ​ອາ​ລາ​ສ​ກ້າ.

ອຸບັດເຫດທີ່ຮ້າຍແຮງຄັ້ງຫຼ້າສຸດຢູ່ເມືອງ ເພຍສັນ ເກີດຂຶ້ນໃນວັນທີ 2 ສິງຫາ ປີ 2005, ເມື່ອເຮືອບິນ Airbus A340 ຈາກນະຄອນຫຼວງປາຣີ ທີ່ກໍາບິນລົງຈອດ ໄດ້ເຈືອກອອກຈາກທາງແລ່ນ ແລະເກີດໄຟໄໝ້ ທ່າມກາງສະພາບອາກາດທີ່ມີພາຍຸ. ຜູ້​ໂດຍ​ສານທັງໝົດ ​ພ້ອມດ້ວຍພະນັກງານຂອງເຮືອບິນ 309 ຄົນ ​ຂອງສາຍການບິນ Air France, ຖ້ຽວ​ບິນ 358, ແມ່ນ​ລອດ​ຊີ​ວິດ​ຈາກ​ອຸ​ບັດຕິ​ເຫດ​ດັ່ງກ່າວ.

ໃນວັນຈັນວານນີ້, ເມືອງ ເພຍສັນ ປະສົບກັບຫິມະ ແລະລົມພັດແຮງຮອດ 51 ກິໂລແມັດຕໍ່ຊົ່ວໂມງ ໂດຍຄວາມແຮງຂອງລົມມີຮອດ 40 ຫາ 65 ກິໂລແມັດຕໍ່ຊົ່ວໂມງ, ອີງຕາມກົມອຸຕຸນິຍົມຂອງການາດາ. ໃນເວລານັ້ນ ອຸນຫະພູມຢູ່ປະມານ -8.61 ອົງສາເຊລຊຽສ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG