ລັດຖະມົນຕີການຕ່າງປະເທດຍີ່ປຸ່ນ ທ່ານ Fumio Kishida ໄດ້ກ່າວໃນວັນ ອັງຄານມື້ນີ້ວ່າ “ທ່ານມີຄວາມຮູ້ສຶກເສົ້າສະຫຼົດໃຈເປັນທີ່ສຸດແລະໂກດແຄ້ນ ຢ່າງແຮງ” ໃນຂະນະທີ່ສົບຂອງຊາວຍີ່ປຸ່ນ 7 ຄົນ ທີ່ໄດ້ຖືກສັງຫານໃນການ ໂຈມຕີທີ່ຮ້ານອາຫານແຫ່ງນຶ່ງຢູ່ Bangladesh ໄດ້ຖືກສົ່ງກັບຄືນບ້ານເກີດ ເມືອງນອນ.
ພວກເຄາະຮ້າຍດັ່ງກ່າວແມ່ນຮວມຢູ່ໃນພວກຕົວປະກັນຈຳນວນ 20 ຄົນ ແລະຕຳຫຼວດອີກ 2 ຄົນ ທີ່ໄດ້ຖືກສັງຫານໃນວັນເສົາຜ່ານມານີ້ ທີ່ນະຄອນ Dhaka.
ທ່ານ Kishida ກ່າວວ່າ “ນີ້ແມ່ນຄວາມເຈັບປວດທີ່ຮ້າຍແຮງຂອງຂ້າພະເຈົ້າ ທີ່ວ່າຊີວິດອັນມີຄຸນຄ່າຂອງພວກເຂົາເຈົ້າໄດ້ດັບສູນລົງໂດຍຄວາມໂຫດຮ້າຍ ປ່າເຖື່ອນຂອງພວກກໍ່ການຮ້າຍ ທີ່ນຳໄປສູ່ການສິ້ນສຸດລົງດ້ວຍຄວາມເສົ້າໂສກ ເສຍໃຈນີ້.”
ທ່ານໄດ້ໃຫ້ຄຳໝັ້ນສັນຍາວ່າ ຍີ່ປຸ່ນ ຈະເຮັດວຽກຮ່ວມກັບກຸ່ມປະຊາຄົມນາໆຊາດ ເພື່ອຄ້ຳປະກັນວ່າ ການໂຈມຕີເຊັ່ນນີ້ ຈະບໍ່ໃຫ້ເກີດຂຶ້ນອີກໃນອະນາຄົດ.
ກອງກຳລັງຮັກສາຄວາມປອດໄພບັງກລາແດັສໄດ້ສັງຫານ ພວກໂຈມຕີ 6 ຄົນ ທີ່ໄດ້ບຸກເຂົ້າໄປໃນຮ້ານອາຫານທີ່ຄຸ້ມຄົນຮັ່ງມີ ແລະຈັບເປັນໄດ້ຄົນນຶ່ງ. ຕຳຫຼວດ ກ່າວວ່າ ນຶ່ງໃນພວກຕົວປະກັນ ອາດເປັນພະນັກງານເຮັດວຽກຢູ່ໃນຮ້ານອາຫານ ດັ່ງກ່າວນີ້. ພວກເຂົາເຈົ້າຍັງສາມາດຊ່ອຍຕົວປະກັນ 13 ຄົນອອກມາ ຊຶ່ງ 5 ຄົນ ຂອງຈຳນວນນີ້ຍັງຖືກຄວບຄຸມຕົວໄວ້ ເຖິງແມ່ນຍັງບໍ່ທັນແຈ້ງຂາວເທື່ອວ່າ ພວກ ເຂົາແມ່ນພວກຕ້ອງສົງໄສ ຫຼືວ່າ ແມ່ນພວກທີ່ໄປໃຫ້ການເທົ່ານັ້ນ ເພື່ອການເກັບ ກຳລາຍລະອຽດຂອງການໂຈມຕີຄັ້ງນີ້.
ຜູ້ບັນຊາການຕຳຫຼວດ Bangladesh ທ່ານ A.K.M. Shahidul Haque ໄດ້ກ່າວ ໃນວັນຈັນວານນີ້ວ່າ ຊາຍ 2 ຄົນ ຊຶ່ງຮວມທັງ ຜູ້ຕ້ອງສົງໄສວ່າເປັນພວກຫົວຮຸນ ແຮງກຳລັງຖືກ ສອບປາກຄຳຢູ່. ທ່ານໄດ້ປະຕິເສດທີ່ຈະເວົ້າວ່າ ຊາຍສອງຄົນນີ້ ແມ່ນຮວມຢູ່ໃນກຸ່ມທີ່ນັບວ່າເປັນຕົວປະກັນ ແຕ່ວ່າຮັບຮູ້ວ່າ ພວກເຂົາເຈົ້າກຳລັງ ໄດ້ຮັບການຮັກສາພະຍາບານຢູ່ທີ່ໂຮງໝໍ.
ກຸ່ມລັດອິສລາມ ໄດ້ອອກມາອ້າງເອົາຄວາມຮັບຜິດຊອບ ໃນການໂຈມຕີຄັ້ງນີ້ ແຕ່ຈົນເທົ່າເຖິງປະຈຸບັນ ຍັງບໍ່ທັນມີການຢືນຢັນເທື່ອວ່າ ມີການເຊື່ອມໂຍງໃດໆລະຫວ່າງກຸ່ມດັ່ງກ່າວແລະພວກໂຈມຕີ. ເຈົ້າໜ້າທີ່ລັດຖະບານ ປະຕິເສດວ່າ ບໍ່ມີການພົວພັນຂອງກຸ່ມລັດອິສລາມ.
ລັດຖະມົນຕີກະຊວງພາຍໃນ Bangladesh ທ່ານ Asaduzzaman Khan ໄດ້ກ່າວວ່າ ພວກຫົວຮຸນແຮງ ແມ່ນເປັນສະມາຊິກຂອງກຸ່ມກໍ່ການຮ້າຍທີ່ເກີດຢູ່ ພາຍໃນປະເທດ ເຊັ່ນກຸ່ມ Jumatul Mujahedeen Bangladesh ຫຼື JMB ຊຶ່ງໄດ້ຖືກເກືອດຫ້າມຢູ່ພາຍ ປະເທດ ມາໄດ້ນານກວ່າ ນຶ່ງທົດສະວັດແລ້ວ.