ນາຍ Kraig Leatherman ນັກຕົບແຕ່ງເດີ່ນບ້ານ ກ່າວວ່າ ຊາວອະເມຣິກັນຫລາຍໆຄົນ
ບໍ່ຮູ້ເມື່ອໂຕວ່າ ພວກເຂົາເຈົ້າຕົກຢູ່ໃນສະພາບໃກ້ຈະລົ້ມລະລາຍທາງການເງິນຫລາຍສໍ່າໃດ ໂຮມທັງໂຕລາວເອງນໍາ. ແຕ່ນາຍ Leatherman ອະດີດຄົນຂາຍປະກັນໄພ ໄດ້ຮຽນຮູ້ຈາກປະສົບການທີ່ໜັກໜ່ວງ ພໍສົມຄວນ. ນາຍ Leatherman ກ່າວວ່າ:
“ອັນທີ່ຈິງແລ້ວ ຂ້ອຍເອງເຄີຍຖືກຟ້ອງລົ້ມລະລາຍມາແລ້ວຄັ້ງນຶ່ງ ແລະເຄີຍໄດ້ສູນເສຍບ້ານໄປຫລັງນຶ່ງ. ມັນເປັນເຫດການທີ່ເຈັບປວດຫລາຍ ຫລາຍທີ່ສຸດ ເປັນເຫດການທີ່ພາໃຫ້ອຸກອັ່ງ ທໍ້ໃຈເປັນທີ່ສຸດ. ແລະເວລາຍ້ອນເບິ່ງເຫດການຜ່ານມາ ຂ້ອຍກໍອາດສາມາດຕູ່ໃສ່ອັນນັ້ນອັນນີ້ໄດ້ວ່າ ເປັນຕົ້ນເຫດ ແຕ່ເວລາຫລຽວເບິ່ງຄືນຫລັງແທ້ໆແລ້ວ ຂ້ອຍແມ່ນຫລຽວເບິ່ງການຂາດຄວາມລອບຄອບດ້ານການເງິນສ່ວນຕົວຂອງຂ້ອຍເອງ. ນັ້ນແຫລະ ທີ່ເປັນສາເຫດແທ້ໆຂອງຄວາມເຈັບປວດນັ້ນ.”
ເວລານີ້ ຫລັງຈາກໄດ້ປ່ຽນອາຊີບນັ່ງໂຕະຂາຍປະກັນໄພ ມາໃສ່ເກີບບູດ ເຮັດວຽກຢູ່ຂ້າງນອກ ນາຍ Leatherman ແມ່ນຮັບຈ້າງຕັດຕົ້ນໄມ້ ກຽນງ່າໄມ້ ຫລົກຫຍ້າອອກຈາກສວນດອກໄມ້ ແລະກໍາຈັດພືດທີ່ເປັນພິດ ເຊ່ນເຄືອ poison ivy ຢູ່ຕາມບ້ານຄົນ ໂດຍມີລູກນ້ອງບໍ່ເທົ່າໃດຄົນທີ່ລາວໄດ້ວ່າຈ້າງ ມາຊ່ວຍທຸລະກິດທີ່ຍັງລົ້ມລຸກຄຸກຄານຂອງລາວນັ້ນ.
ຄລິກບ່ອນນີ້ເພື່ອເບິ່ງວີດີໂອພາສາລາວ ຫລືຄລິກບ່ອນ mp4 ຫລື wmv ຂ້າງເທິງ
ໃນມື້ອາກາດຮ້ອນເອົ້າຍາມລະດູຮ້ອນມື້ນຶ່ງ ທີ່ເມືອງ Glyndon ລັດແມຣີ ແລນດ໌ ການຖົກຖຽງກັນເລຶ່ອງເພດານໜີ້ສິນ ຫລືຂີດຈໍາກັດຂອງໜີ້ສິນຂອງລັດຖະບານໃນນະຄອນຫລວງວໍຊິງຕັນດີຊີ ທີ່ຢູ່ບໍ່ໄກນັ້ນ ເບິ່ງຄືວ່າເປັນເລຶ່ອງທີ່ໄກຈາກປະຊາຊົນທໍາມະດາສາມັນຫລາຍ ແຕ່ວ່າມັນຢູ່ໃນຈິດໃຈຂອງນາຍ Leatherman ຫລາຍຢູ່. ລາວເວົ້າວ່າ:
“ຂ້ອຍວ່າ ລັດຖະບານກາງແມ່ນເປັນໂຕແບບບົດບາດທີ່ໜ້າຢ້ານກົວທີ່ສຸດສໍາລັບຄອບຄົວອະເມຣິກັນທົ່ວໄປ.”
ນາຍ Leatherman ກ່າວຕໍ່ໄປວ່າ ນັ້ນກໍຍ້ອນວ່າ ລັດຖະບານກາງຫາເງິນມາໃຊ້ຈ່າຍໂດຍການກູ້ຢືມ ແລະໃຊ້ຈ່າຍເງິນໄປທັງໆທີ່ຕົນເອງບໍ່ມີເງິນ…ແບບດຽວກັບທີ່ລາວເຄີຍເຮັດ.
ຝົນທີ່ຕົກລົງມາ ເຮັດໃຫ້ນາຍ Leatherman ຕ້ອງພັກວຽກຊົ່ວຄາວ ລາວກໍເລີຍມີໂອກາດ
ມານັ່ງລົມສູ່ພວກເຮົາຟັງວ່າ ລາວກອບກູ້ສະຖານນະການດ້ານການເງິນຂອງລາວຄືນມາໄດ້ ແນວໃດ.
“ສິ່ງທີ່ຂອ້ຍເຮັດໃນແຕ່ລະອາທິດໄປນັ້ນ ກໍຄືທຸກໆອາທິດ ຂ້ອຍຈະຈົດຄ່າໃຊ້ຈ່າຍທັງໝົດສໍາລັບທຸລະກິດຂອງຂ້ອຍລົງໄປ ພ້ອມກັບລາຍໄດ້ທີ່ເຂົ້າມາ ແລະຂ້ອຍກໍລວມ
ຈໍານວນທັງໝົດລົງໄວ້ ເພື່ອຈະຮູ້ວ່າຂ້ອຍຢູ່ຈຸດໃດ ເພາະວ່າ ບໍລິສັດທີ່ບໍ່ຮູ້ວ່າຕົນຢູ່ຈຸດ
ໃດໃນດ້ານການເງິນນັ້ນ ກໍຈະບໍ່ຮູ້ຫຍັງເລີຍແຫລະວ່າ ຈະໄປໃຫ້ຮອດບ່ອນທີ່ຕົນຢາກ
ຈະໄປໃຫ້ເຖິງນັ້ນ ໄດ້ຢ່າງໃດ.”
ພວກນັກເສດຖະສາດເອີ້ນການກະທໍາເຊ່ນນັ້ນວ່າ ເປັນການຈັດງົບປະມານຂັ້ນພື້ນຖານ
ແລະມັນກໍໄດ້ຊ່ວຍນາຍ Leatherman ໃຫ້ພົ້ນຈາກສະພາບລົ້ມລະລາຍທາງການເງິນ
ຊຶ່ງນອກຈາກການຈັດງົບປະມານແລ້ວ ລາວຍັງໃຊ້ຍຸທະວິທີອື່ນໆ ເຊັ່ນການເຮັດວຽກ
ແລກປ່ຽນເອົາເຄຶ່ອງອຸບປະກອນໃໝ່. ສໍາລັບເຄຶ່ອງມືເຫລົ່ານີ້ ແມ່ນລາວໄດ້ມາດ້ວຍຢາດ
ເຫື່ອແຮງຂອງລາວເອງ.
ເບິ່ງວີດີໂອ ພາສາອັງກິດ:
ໂດຍການເຮັດໄປເທື່ອລະເລັກລະນ້ອຍ ນາຍ Leatherman ກໍສາມາດເອົາຕົວໃຫ້ພົ້ນຈາກ
ໜີ້ສິນໄດ້. ແລະໃນຂະນະນີ້ ລາວກໍກໍາລັງຊ່ວຍເຫລືອຄົນຜູ້ອື່ນນໍາເຊັ່ນກັນ ໂດຍການວ່າຈ້າງ
ພວກເຂົາເຈົ້ານັ້ນ.
ນາຍ Leatherman ກ່າວຕື່ມວ່າ ມັນເປັນການລ້າງບາບ ເປັນການເລີ່ມຕົ້ນຊີວິດໃໝ່ແລະ
ພໍຮອດເວລາເລີກງານຂອງມື້ນັ້ນແລ້ວ ລາວຮູ້ສຶກສະງົບແລະໂລ່ງໃຈ ເປັນເທື່ອທໍາອິດໃນ
ຮອບຫລາຍປີ. ລາວກ່າວວ່າ:
“ເວລາຂ້ອຍລົ້ມຫົວລົງນອນ ແລະຂ້ອຍບໍ່ມີໜີ້ສິນອີກແລ້ວ ມັນໃຫ້ພະລັງຄວາມເຂັ້ມ
ແຂງແກ່ຂ້ອຍໜ້ອຍນຶ່ງສໍາລັບມື້ຕໍ່ໄປ. ຂ້ອຍສາມາດຫລິງເຫັນຊ່ອງທາງໄປສູ່ຄວາມ
ຈະເຣີນຮຸ່ງເຮືອງ ແລະອຸດົມສົມບູນ.”
ແລະນາຍ Leatherman ພ້ອມທີ່ຈະບອກທຸກຄົນທີ່ຈະຮັບຟັງ ແລະແມ່ນແຕ່ຜູ້ບໍ່ຢາກຟັງ
ກໍຕາມວ່າ ທ່ານກໍຈະສາມາດໄປເຖິງຈຸດນັ້ນໄດ້ເຊັ່ນກັນ.
ປະທານາທິບໍດີໂອບາມາຮຽກຮ້ອງໃຫ້ ປານີປານອມກັນເລື້ອງໜີ້ສິນຂອງຊາດ:
