ລິ້ງ ສຳຫລັບເຂົ້າຫາ

ວັດຖຸ ທີ່ພົບເຫັນ ຢູ່ອອສເຕຣເລຍ ບໍ່ພົວພັນ ກັບເຮືອບິນ ມາເລເຊຍ ທີ່ຫາຍໄປ (ວີດີໂອ)


ແມ່ຍິງຄົນນຶ່ງ ຍ່າງຜ່ານຮູບແຕ້ມໃສ່ກຳແພງ ຖ້ຽວບິນ MH370 ທີ່ນະຄອນກົວລາລຳເປີ (15 ເມສາ 2014)
ບັນດາ​ເຈົ້າ​ໜ້າ​ທີ່​ອອສ​ເຕຣ​ເລຍກ່າວ​ວ່າ ວັດຖຸ​ທີ່​ນ້ຳ​ພັດ​ເຂົ້າ​ມາ
ສູ່​ຝັ່ງ​ທະ​ເລ ໃນ​ພາກ​ຕາ​ເວັນ​ຕົກ​ຂອງ​ປະ​ເທດ​ນັ້ນ ບໍ່​ພົວພັນ​ກັບ​
ເຮືອບິນ​ອາຍ​ພົ່ນ​ຂອງ​ສາຍ​ການບິນ​ມາ​ເລ​ເຊຍ​ທີ່​ຫາຍ​ສາບ​ສູນ
​ໄປ​ນັ້ນ.

ວັດຖຸ​ດັ່ງກ່າວ ​ໄດ້​ຖືກ​ພົບ​ເຫັນຢູ່​ໃກ້ໆ​ກັບ​ເມືອງ​ແຄມ​ທະ​ເລ Au-
gusta ທາງ​ທິດຕາ​ເວັນ​ອອກສຽງ​ໃຕ້​ ຂອງບ່ອນ​ທີ່ ພວມມີການ​
ຊອກ​ຄົ້ນ​ຂອງ​ຫລາຍ​ປະ​ເທດ​ຮ່ວມ​ກັນຫາ​ເຮືອບິນ​ລຳ​ທີ່​ຫາຍ​ໄປ​
ນີ້.

ອົງການ​ທີ່​ປະສານ​ງານ​ການ​ຊອກ​ຄົ້ນ​ຫາ​ເຮືອບິນ​ລຳ​ດັ່ງກ່າວ ​ເວົ້າ​ວ່າ ການພິສູດ​ເບິ່ງ​ຢ່າງ​ລະອຽດຂອງ​ຮູບ​ພາບ​ຕ່າງໆ ສະ​ແດງ​ໃຫ້​ເຫັນ​ວ່າ ຊິ້ນ​ສ່ວນວັດຖຸ​ທີ່​ພົບ​ເຫັນນີ້ ບໍ່​ມີ​ສ່ວນ​ພົວພັນ​ໃດໆ​ ກັບ​ເຮືອບິນທີ່ຫາຍສາບສູນໄປ.

ໃນ​ຂະນະ​ດຽວ​ກັນ ​ອົງກາ​ນດັ່ງກ່າວ​ເວົ້າ​ວ່າ ຝົນຕົກ​ໜັກ ລົມ​ພັດ​ແຮງ ແລະ​ຄື້ນຟອງ​ທະ​ເລໃຫຍ່ ຍຶ່ງຂຶ້ນອີກ ​ເປັນ​ອຸບປະສັກ​ຕໍ່​ການ​ຊອກ​ຄົ້ນ​ຫາ​ເຮືອບິນ​ລຳ​ດັ່ງກ່າວ​ໃນ​ວັນ​ພະຫັດ​ມື້​ນີ້.

ລົມ​ບ້າໝູ ​ຫຼື cyclone Jack ຊຶ່ງ​ກຳລັງ​ເຄື່ອນ​ໄຫ​ວໄປ​ທາງ​ທິດ​ໃຕ້​ຜ່ານ​ຂົງ​ເຂດ​ຊອກ​ຄົ້ນຫາ ​ໄດ້​ບັງຄັບ​ໃຫ້ການ​ຊອກ​ຄົ້ນ​ທາງ​ອາກາດ​ງົດ​ໄປຊົ່ວ​ຄາວ 2 ເທື່ອ​ໃນ​ສັບປະດາ​ນີ້.

ຢູ່​ໃຕ້​ນ້ຳ​ນັ້ນ ​ຍານດຳ​ນ້ຳອັດຕະໂນມັດໃກ້​ຈະ​ເສັດ​ສິ້ນ​ການ​ປະຕິບັດ​ງານ​ໃນ​ຂັ້ນ​ທຳ​ອິດ​ຂອງ​ຕົນ​ແລ້ວ ຊຶ່ງ​ມາຮອດ​ປັຈຸ​ບັນ​ນີ້ ຍັງບໍ່​ໄດ້​ຮັບ​ຄວາມ​ສຳ​ເລັດ​ໃນ​ການ​ຊອກ​ຫາ​ໃນ​ທ້ອງ​ມະຫາ​ສະ ມຸດ​ອິນ​ເດຍນັ້ນ.

ອົງການ​ປະສານ​ງານ​ໃນ​ການ​ຊອກ​ຄົ້ນ ກ່າວ​ໃນ​ວັນ​ພະຫັດ​ມື້​ນີ້​ວ່າ ຍານດຳ​ນ້ຳ​ Bluefin-21 ​ໄດ້​ຊອກ​ຫາໃນ​ຂົງ​ເຂດ​ພື້ນ​ທະ​ເລ​ ໃນ​ເນື້ອ​ທີ່ 90 ເປີ​ເຊັນ​ແລ້ວ ​ແຕ່​ບໍ່​ໄດ້​ພົບເຫັນ​ສິ່ງໃດໆ​ທີ່​ໜ້າ​ສົນ​ໃຈເທື່ອ.
XS
SM
MD
LG