ເຈົ້າໜ້າທີ່ໃນລັດຄາລິຟໍເນຍ ທີ່ຕັ້ງຢູ່ພາກຕາເວັນຕົກຂອງ ສະຫະລັດ ກ່າວວ່າ ມີຜູ້ເສຍຊີວິດຢ່າງໜ້ອຍ 10 ຄົນຈາກເຫດການໄຟປ່າຄັ້ງໃຫຍ່ທີ່ໄດ້ເຜົາຜານຕົວເມືອງຂອງນະຄອນ ລອສ ແອນເຈີເລສ.
ເຈົ້າໜ້າທີ່ແພດສັນນະສູດສົບຂອງເຂດ ລອສ ແອນເຈີເລສ ໄດ້ອອກມາປະກາດຈໍານວນຜູ້ເສຍຊີວິດໃໝ່ ໃນຕອນແລງຂອງວັນພະຫັດວານນີ້, ເຊິ່ງເພີ້ມຂຶ້ນເປັນສອງເທົ່າຈາກບົດລາຍງານກ່ອນໜ້ານັ້ນ. ບັນດາເຈົ້າໜ້າທີ່ແຈ້ງເຕືອນວ່າ ຈຳນວນຜູ້ເສຍຊີວິດອາດເພີ້ມຂຶ້ນ ເມື່ອສາມາດຄວບຄຸມໄຟໄດ້ ແລະພະນັກງານທັງຫຼາຍສາມາດເຂົ້າໄປຄົ້ນຫາໃນຊາກຫັກພັງທັງຫຼາຍເຫຼົ່ານັ້ນ.
ຍັງຄົງມີການສືບຕໍ່ປະຕິບັດການດັບເພີງເຂົ້າໄປຍັງບ່ອນເກີດເຫດໃນຕອນກາງຄືນ, ເຊິ່ງນໍາໃຊ້ເຮລີຄັອບເຕີຫວ່ານນ້ໍາ ໂດຍສວຍໂອກາດໃນຂະນະທີ່ລົມແຮງຍຸຕິລົງຊົ່ວຄາວ.
ປະທານາທິບໍດີ ໂຈ ໄບເດັນ ກ່າວຕໍ່ກອງປະຊຸມຖະແຫຼງຂ່າວຂອງທຳນຽບຂາວໃນຕອນບ່າຍຂອງວັນພະຫັດວານນີ້ວ່າ ມີການນໍາໃຊ້ຊັບພະຍາກອນຂອງລັດຖະບານກາງ ແລະເງິນທຶນເພີ້ມເຕີມແກ່ລັດຄາລິຟໍເນຍ ເພື່ອຕໍ່ສູ້ກັບໄຟປ່າ ທີ່ທ່ານໄດ້ພັນລະນາວ່າ ເປັນ “ໄຟປ່າທີ່ເກີດຂຶ້ນໃນນະຄອນ ລອສ ແອນເຈີເລສທີ່ຮ້າຍແຮງທີ່ສຸດເທົ່າທີ່ເຄີຍມີມາ.”
ປະທານາທິບໍດີກ່າວວ່າ, ເງິນທັງໝົດ ຈະຖືກນຳໃຊ້ເຂົ້າສໍາລັບສະຖານທີ່ຫລົບໄພຊົ່ວຄາວເປັນເວລາ 180 ວັນ, ການກໍາຈັດອຸປະກອນທີ່ເປັນອັນຕະລາຍ, ເງິນເດືອນທຳອິດຂອງເຈົ້າໜ້າທີ່ກູ້ໄພ ແລະມາດຕະການປົກປ້ອງຊີວິດ.
ຮອງປະທານາທິບໍດີ ທ່ານນາງ ຄາມາລາ ແຮຣິສ, ອະດີດສະມາຊິກສະພາສູງສູງສະຫະລັດ ປະຈຳລັດຄາລິຟໍເນຍ, ກໍໄດ້ກ່າວ ໃນກອງປະຊຸມຖະແຫຼງຂ່າວດັ່ງກ່າວ ເຊັ່ນກັນ.
ທ່ານນາງ ໄດ້ອະທິບາຍເຖິງສະຖານະການໃນຄາລິຟໍເນຍວ່າ “ ເປັນໄພພິບັດຄັ້ງໃຫຍ່ (apocalyptic)” ແລະ “ບາງສິ່ງທີ່ຈະມີຜົນກະທົບໃນເວລາຫຼາຍເດືອນ ແລະຫຼາຍປີໃນຕໍ່ໜ້າ.”
ທ່ານຮອງປະທານາທິບໍດີ ມີເຮືອນຢູ່ໃນຂົງເຂດທີ່ມີການອົບພະຍົບ, ແຕ່ຍັງບໍ່ທັນຈະແຈ້ງວ່າ ເຮືອນຂອງທ່ານນາງ ໄດ້ຮັບຄວາມເສຍຫາຍໃດໆ ຫຼື ບໍ່.
ເຈົ້າໜ້າທີ່ກ່າວວ່າ ໄຟປ່າທີ່ກໍາລັງລຸກໄໝ້ຢູ່ໃນ ແລະອ້ອມແອ້ມຕົວເມືອງຂອງນະຄອນ ລອສ ແອນເຈີເລສ ສົ່ງຜົນເຮັດໃຫ້ຕ້ອງມີການອົບພະຍົບປະຊາຊົນປະມານ 180,000 ຄົນອອກໃນທັນທີ, ເຊິ່ງໄຟປ່າໄດ້ທຳລາຍບ້ານເຮືອນເປັນຈໍານວນຫຼາຍພັນຫຼັງ ແລະໄດ້ເຜົາໄໝ້ເນື້ອທີ່ກວມເອົາຫຼາຍສິບພັນເຮັກຕາ.
ທ່ານນາງ ຄາເຣັນ ບາສ (Karen Bass) ຜູ້ປົກຄອງນະຄອນ ລອສ ແອນເຈີເລສ ກ່າວວ່າ “ນີ້ແມ່ນພາຍຸໄຟຄັ້ງປະຫວັດສາດ ທີ່ບໍ່ເຄີຍເກີດຂຶ້ນມາກ່ອນ.”
ຟໍຣັມສະແດງຄວາມຄິດເຫັນ