ແປດມື້ຜ່ານພົ້ນໄປ ຫຼັງຈາກ ແຜ່ນດິນໄຫວ ທີ່ມີຄວາມແຮງ
7.8 ຣີກເຕີ້ໄດ້ທຳລາຍ ປະເທດເນປາລ ບັນດາເຈົ້າໜ້າທີ່
ກ່າວວ່າ ຄວາມຫວັງທີ່ຈະພົບຜູ້ລອດຊີວິດມາໄດ້ຕື່ມອີກນັ້ນ
ແມ່ນຈາງຫາຍໄປເລື້ອຍໆ.
ບັນດາເຈົ້າໜ້າທີ່ລັດຖະບານ ກ່າວໃນວັນອາທິດມື້ນີ້ ວ່າ
ໂຕເລກຂອງພວກທີ່ໄດ້ເສຍຊີວິດໄປ ຢູ່ໃນເນປາລນັ້ນ
ໄດ້ກາຍ 7,000 ຄົນແລ້ວ.
ຫຼາຍໆມື້ຜ່ານມາ ທີ່ບໍ່ມີຮ່ອງຮອຍ ຂອງຊີວິດໃດໆເລີຍ ທ່າມກາງ
ກອງພູຂອງຊາກຫັກພັງ ໃນທົ່ວນະຄອນຫຼວງ Kathmandu
ເຈົ້າໜ້າທີ່ ກະຊວງພາຍໃນ ທ່ານ Laxmi Dhakal ກ່າວວ່າ “ເວັ້ນເສຍແຕ່ວ່າ ພວກເຂົາ
ເຈົ້າຕົກຄ້າງຢູ່ໃນບ່ອນ ທີ່ມີອາກາດພຽງພໍແລ້ວ ກໍແມ່ນວ່າ ເປັນໄປໄດ້ສູງຫຼາຍ ທີ່
ພວກເຂົາເຈົ້າຈະບໍ່ລອດຊີວິດ.”
ຜູ້ລອດຊີວິດສອງຄົນ ຄື ເດັກຊາຍ ອາຍຸ 15 ປີ ແລະ ຜູ້ຍິງໄວ 20 ກວ່າປີ ຖືກຊ່ອຍເຫຼືອ
ອອກມາໄດ້ ຈາກກອງຊາກຫັກພັງ ໃນວັນພະຫັດ ທີ່ຜ່ານມາ.
ຫຼາຍພັນຄົນ ຍັງຄົງຫາຍສາບສູນຢູ່ ລວມທັງຊາວຢູໂຣບປະມານ 1,000 ຄົນ.
ບັນດາຜູ້ລອດຊີວິດ ຮຽກຮ້ອງໃຫ້ລັດຖະບານ ແລະ ກຸ່ມຊ່ອຍເຫຼືອຕ່າງໆ ເລັ່ງລັດຈັດສົ່ງ
ອາຫານ ນ້ຳ ແລະ ສິ່ງຂອງຊ່ອຍເຫຼື່ອຕ່າງໆ ໄປໃຫ້ຜູ້ ຄົນຈຳນວນຫຼວງຫຼາຍ ທີ່ອາໃສ່ຢູ່
ກາງແຈ້ງ ຫຼັງຈາກທີ່ໄດ້ສູນເສຍເຮືອນຊານ ຂອງພວກເຂົາເຈົ້າ.
ທ້າວ Abhishek Bhutoria ອາສາສະໝັກຊ່ອຍເຫຼືອຄົນນຶ່ງ ກ່າວວ່າ “ຄວາມທ້າທາຍ
ໂດຍພື້ນຖານແລ້ວ ກໍແມ່ນວ່າ ຈະເລືອກໄປຫາຄົນ ບ່ອນທີ່ບໍ່ສາມາດໄປຮອດ
ພວກເຮົາຕ້ອງການຂໍ້ມູນ ຕົວຢ່າງຢູ່ແຫ່ງນີ້ ພວກເຮົາບໍ່ຢາກເຂົ້າໄປ ຍ້ອນເປັນ
ບ່ອນທີ່ຄົນເຂົ້າໄປຮອດຄົນຢູ່ແລ້ວ. ພວກເຮົາຢາກເລືອກເຂົ້າໄປແຫ່ງຕ່າງໆ
ບ່ອນທີ່ພວກຄົນອື່ນໆ ຍັງເຂົ້າໄປບໍ່ທັນຮອດເທື່ອ. ອັນນັ້ນມັນຫຍຸ້ງຍາກໜ້ອຍນຶ່ງ
ເພາະວ່າ ຄົນທັງຫຼາຍ ລິເລີ້ມການຊ່ອຍເຫຼືອ ຢູ່ໃນບໍລິເວນ ຂອງພວກເຂົາເຈົ້າເອງ.
ກ່ອນໜ້ານີ້ ມື້ນຶ່ງ ຂ້ອຍອາສາສະໝັກ ຢູ່ໃນອີກກຸ່ມຊ່ອຍເຫຼືອນຶ່ງອີກ ແລະ ພວກເຮົາ
ອອກໄປບ່ອນນຶ່ງ ທີ່ແຕກຕ່າງ ແລະ ພວກເຮົາໄດ້ຮູ້ຈັກວ່າ ຢູ່ບ່ອນນັ້ນ ແມ່ນໄດ້ຮັບ
ການຊ່ອຍເຫຼືອແລ້ວ. ສະນັ້ນ ອັນທີ່ພວກເຮົາ ຈະຕ້ອງເຮັດກໍແມ່ນວ່າ ພວກເຮົາ
ຕ້ອງເລືອກເອົາສະຖານທີ່ອື່ນໆ ບ່ອນທີ່ຍັງບໍ່ທັນໄດ້ຮັບທຶນ ກໍໃຫ້ໄດ້ຮັບທຶນ ຫຼື
ທຶນສຳຫລັບໃຊ້ຊື້ເຄື່ອງບັນເທົາທຸກ.”
