ຕຳຫລວດຢູ່ພາກຕາເວັນອອກສຽງເໜືອຂອງອິນເດຍ ກ່າວ
ວ່າ ຈຳນວນຄົນຜູ້ເສຍຊີວິດ ຈາກການໂຈມຕີຫຼາຍໆບັ້ນແບບ
ປະສານງານກັນ ທີ່ສົງໄສວ່າເປັນການໂຈມຕີ ໂດຍພວກຊົນ
ເຜົ່າຫົວແບ່ງແຍກດິນແດນນັ້ນ ໄດ້ເພີ້ມຂຶ້ນເປັນ 72 ຄົນແລ້ວ.
ຫລາຍໆເຂດໃນລັດ Assam ຍັງຫ້າມບໍ່ໃຫ້ປະຊາຊົນອອກ
ເຮືອນ ໃນວັນພະຫັດມື້ນີ້ ຫຼັງຈາກທີ່ເກີດຄວາມຮຸນແຮງຂຶ້ນ ຢູ່
ທີ່ແຫ່ງນັ້ນ ເມື່ອຕອນເດິກຂອງວັນອັງຄານຜ່ານມານີ້ ຊຶ່ງນາຍົກ
ລັດຖະມົນຕີອິນເດຍ ທ່ານ Narenda Modi ເອີ້ນການໂຈມຕີ
ດັ່ງກ່າວວ່າ ເປັນ “ການກະທຳຂອງພວກຂີ້ຂາດຕາຂາວ.”
ປະທານາທິບໍດີອິນເດຍ ທ່ານ Pranab Mukherjee ໄດ້ກ່າວປະນາມການໂຈມຕີນັ້ນ
ຜ່ານທາງ twitter ຂອງທ່ານໃນວັນພຸດວານນີ້ ທີ່ກ່າວວ່າ “ການກະທຳຂອງການກໍ່
ຄວາມຢ້ານກົວ ແລະ ຄວາມຮຸນແຮງເຫຼົ່ານັ້ນ ຕ້ອງໄດ້ທັບມັນລົງດ້ວຍນ້ຳມືທີ່
ໜັກແໜ້ນ.”
ບັນດາເຈົ້າໜ້າທີ່ ໄດ້ຖິ້ມໂທດໃສ່ ກຸ່ມແນວໂຮມ ເພື່ອປະຊາທິປະໄຕແຫ່ງຊາດ ຂອງ
ໂບໂຣແລນ ທີ່ເອີ້ນຍໍ້ວ່າ NDFB ຊຶ່ງເປັນກຸ່ມທີ່ຖືກທາງການປະກາດຫ້າມເຄື່ອນໄຫວ.
ອິນເດຍ ໄດ້ລະບຸກຸ່ມດັ່ງກ່າວວ່າ ເປັນອົງການກໍ່ການຮ້າຍ ແລະເມື່ອບໍ່ນານມານີ້ ໄດ້
ເລີ້ມທຳການປາບປາມ ພວກເຂົາ.
ກຸ່ມ NDFB ຢາກສ້າງຕັ້ງລັດເອກະລາດ ສຳຫລັບຊົນເຜົ່າພື້ນເມືອງ ຊາວໂບໂຣ ຊຶ່ງພວກ
ເຂົາເຄີຍມີປະຫວັດ ຂອງການກໍ່ຄວາມຮຸນແຮງ ຕໍ່ຕ້ານພວກທີ່ບໍ່ແມ່ນຊົນເຜົ່າໂບໂຣ ຄືຕົນ
ຢູ່ໃນເຂດດັ່ງກ່າວ ນັບຕັ້ງແຕ່ໄດ້ມີການສ້າງຕັ້ງກຸ່ມຂຶ້ນມາ ໃນປີ 1998. ການກໍ່ຄວາມຮຸນແຮງທ້າຍ ສຸດແມ່ນມີຂຶ້ນໃນເດືອນພຶດສະພາຜ່ານມາ ທີ່ໄດ້ສັງຫານຊາວມຸສລິມ ຫຼາຍສິບຄົນ.