ເຈົ້າໜ້າທີ່ອິນໂດເນເຊຍ ກຳລັງສືບສວນກ່ຽວກັບລາຍງານການເສຍຊີວິດຢູ່ໃນອີຣັກຂອງເຈົ້າໜ້າທີ່ກຸ່ມລັດອິສລາມ ທີ່ມີຊື່ສຽງຄົນນຶ່ງ ຈາກອິນໂດເນເຊຍ ທີ່ໄດ້ເຂົ້າຮ່ວມການສູ້ລົບປ້ອງກັນທີ່ໝັ້ນຂອງພວກຫົວຮຸນແຮງ ທີ່ເມືອງ Mosul ໃນລະຫວ່າງການບຸກໂຈມຕີຂອງກອງກຳລັງທີ່ໄດ້ຮັບການໜຸນຫລັງຈາກສະຫະລັດ ເພື່ອເຂົ້າຍຶດເອົາເມືອງດັ່ງກ່າວ.
ໂຄສົກຂອງຕຳຫຼວດ ທີ່ນະຄອນຈາກາຕ້າ ກ່າວຕໍ່ພວກນັກຂ່າວ ໃນວັນພະຫັດວານນີ້ວ່າ ທ້າວ Salim Mobarok al-Tamimin ຊຶ່ງຮູ້ກັນ ໃນອີກຊື່ນຶ່ງວ່າ Abu Jandal al-Ye- meni al Indonesi ນັ້ນ ໄດ້ຮັບການຢືນຢັນວ່າເສຍຊີວິດໂດຍພັນລະຍາຂອງຜູ້ກ່ຽວ ຢູ່ໃນອີຣັກແລະພີ່ນ້ອງຂອງລາວທີ່ເມືອງ Pasuruan ໃນເຂດ Java ຕາເວັນອອກ. ທ້າວ Abu Jandal ທີ່ເຈົ້າໜ້າທີ່ເອີ້ນຜູ້ກ່ຽວນັ້ນ ແມ່ນພິຈາລະນາກັນວ່າ ເປັນຜູ້ເກັບເກນ ຄົນ ສຳຄັນໃຫ້ແກ່ກຸ່ມລັດອິສລາມໃນເຂດເອເຊຍຕາເວັນອອກສຽງໃຕ້.
ຜູ້ບັນຊາການຕຳຫຼວດ Boy Fafli Amar ກ່າວທີ່ນະຄອນຈາກາຕ້າວ່າ “ພວກເຮົາກຳລັງພະຍາຍາມຫາທາງທີ່ຈະນຳເອົາສົບຂອງຜູ້ກ່ຽວກັບຄືນປະເທດ.”
ອີງຕາມຂໍ້ມູນໃນຂັ້ນຕົ້ນ ທີ່ໄດ້ຮັບໂດຍເຈົ້າໜ້າທີ່ອິນໂດເນເຊຍນັ້ນ ທ້າວ Abu Jandal ຖືກຂ້າຕາຍທີ່ເມືອງ Mosul ໃນວັນເສົາແລ້ວ. ແຕ່ເຈົ້າໜ້າທີ່ຍັງບໍ່ທັນລົງຄວາມເຫັນກ່ຽວກັບສາເຫດທີ່ພາໃຫ້ຜູ້ກ່ຽວຕາຍ.
