ລິ້ງ ສຳຫລັບເຂົ້າຫາ

ວັນພະຫັດ, ໒໕ ເມສາ ໒໐໒໔

ມີຫຼາຍກວ່າ 6,000 ຄົນ ເຊື່ອວ່າ ເສຍຊີວິດ ໃນໄພນໍ້າຖ້ວມ ຢູ່ລີເບຍ, 10,000 ຄົນ ຫາຍສາບສູນ


ຄວາມເສຍຫາຍໄດ້ຖືກພົບເຫັນຢູ່ໃນເມືອງເດີນາ ຫຼັງຈາກພາຍຸທີ່ຮ້າຍແຮງ ແລະ ຝົນຕົກໜັກຖະຫຼົ່ມປະເທດ, ໃນລີເບຍ, ວັນທີ 13 ກັນຍາ 2023
ຄວາມເສຍຫາຍໄດ້ຖືກພົບເຫັນຢູ່ໃນເມືອງເດີນາ ຫຼັງຈາກພາຍຸທີ່ຮ້າຍແຮງ ແລະ ຝົນຕົກໜັກຖະຫຼົ່ມປະເທດ, ໃນລີເບຍ, ວັນທີ 13 ກັນຍາ 2023

ໄພນ້ຳ​ຖ້ວມ​ທີ່​ຮ້າຍແຮງ​ໃນ​ລີ​ເບຍ​ ໄດ້​ເຮັດ​ໃຫ້​ມີ​ຜູ້​ເສຍ​ຊີ​ວິດ​ຫລາຍ​ກວ່າ 6,000 ຄົນ ແລະ​ອີກ 10,000 ຄົນ​ຫາຍ​ສາບ​ສູນ ​ໂດຍ​ຖືກ​ຊຸ​ລົງ​ສູ່​ທະ​ເລເມດິເ​ຕີ​ເຣ​ນຽນ ຫລື​ຖືກ​ຝັງ​ຢູ່​ໃຕ້​ຊາກ​ຫັກ​ພັງ, ເຈົ້າ​ໜ້າ​ທີ່​ກ່າວ​ໃນ​ວັນ​ພຸດ​ວານ​ນີ້.

ໃນເວລາດຽວກັນ, ອົງການຈັດຕັ້ງສາກົນເພື່ອການຍ້າຍຖິ່ນຖານ ​ກ່າວ​ວ່າ, ໄພ​ນ້ຳ​ຖ້ວມ​ທີ່​ເກີດ​ຂຶ້ນ​ຢູ່​ພາກ​ຕາ​ເວັນ​ອອກ​ຂອງ​ລີ​ເບຍ​ໄດ້​ເຮັດ​ໃຫ້​ມີ​ຜູ້​ອົບ​ພະ​ຍົບຫຼາຍກວ່າ 30,000 ຄົນ.

ໜ່ວຍງານຂອງອົງການ​ສະຫະ​ປະຊາ​ຊາດ​ກ່າວ​ວ່າ ປະຊາຊົນຢ່າງ​ໜ້ອຍ 30,000 ຄົນ​ ​ຖືກ​ບັງຄັບ​ໃຫ້​ຍ້າຍ​ໄປອາ​ໄສ​ຢູ່​ໃນ​ເມືອງເດີນາ (Derna) ທີ່​ໄດ້​ຮັບ​ຄວາມ​ເສຍ​ຫາຍ, ​ໂດຍ​ມີ​ຫລາຍ​ພັນ​ຄົນ​ທີ່​ມາ​ຈາກ​ເຂດ​ອື່ນໆ ຮວມທັງ​ເມືອງເບັງກາຊີ (Benghazi). ເຂື່ອນສອງແຫ່ງຢູ່ເໜືອເມືອງເດີນາ (Derna) ແຕກ, ບວກໃສ່ກັບນ້ຳຖ້ວມຈາກຝົນຕົກໜັກຂອງພະຍຸດານຽລ (Daniel).

ຈຳນວນຜູ້ເສຍຊີວິດທີ່ແນ່ນອນແມ່ນຍາກທີ່ຈະຢືນຢັນຢູ່ໃນປະເທດທີ່ລັດຖະບານຄູ່ແຂ່ງ ໄດ້ແຂ່ງຂັນກັນເພື່ອກຳອຳນາດ ມາເປັນເວລານັບທົດສະວັດ. ເຈົ້າ​ໜ້າ​ທີ່​ບາງ​ຄົນ​ກ່າວ​ວ່າ ຈຳ​ນວນ​ຜູ້​ເສຍ​ຊີ​ວິດ​ອາດ​ຈະ​ເພີ່ມ​ຂຶ້ນ​ເປັນ​ສອງ​ເທົ່າ.

ທ່ານຮິເຊມ ອາບູ ຊກິອັທ (Hichem Abu Chkiouat), ລັດຖະມົນຕີການບິນພົນລະເຮືອນ ຝ່າຍບໍລິຫານຮັບຜິດຊອບລີເບຍຕາເວັນອອກ, ບອກກັບອົງການຂ່າວຣອຍເຕີ້ສ໌ ວ່າມີການນັບສົບແລ້ວຫຼາຍກວ່າ 5,300 ສົບ ໃນເມືອງເດີນາ. ເມືອງ​ນີ້​ໄດ້​ຮັບ​ຜົນ​ກະທົບ​ໜັກ​ທີ່​ສຸດ​ຈາກ​ໄພ​ນ້ຳ​ຖ້ວມ.

ອ່ານຂ່າວນີ້ເປັນພາສາອັງກິດ

XS
SM
MD
LG