ອົງການຂ່າວ AP ລາຍງານວ່າເຫດການນ້ຳຖ້ວມຄັ້ງໃຫຍ່ໃນບໍລິເວນພາກໃຕ້ຂອງ ໄທ ແລະ ມາເລເຊຍ ເຮັດໃຫ້ມີຜູ້ເສຍຊີວິດແລ້ວກວ່າ 30 ຄົນ ແລະ ບໍ່ມີທີ່ຢູ່ອາໄສອີກຫຼາຍສິບພັນຄົນ ຊຶ່ງເຈົ້າໜ້າທີ່ຂອງສອງປະເທດຕ່າງກໍພະຍາຍາມຫາທີ່ຫຼົບໄພ ແລະ ຈັດທຳແຜນອົບພະຍົບໃຫ້ແກ່ຜູ້ປະສົບໄພ ໃນຂະນະທີ່ຄາດວ່າຈະມີຝົນຕົກໜັກຮອບໃໝ່.
ນາຍົກລັດຖະມົນຕີ ມາເລເຊຍ ທ່ານ ອັນວາ ອີບຣາຮິມ ກ່າວວ່າຝົນທີ່ຕົກຢ່າງຕໍ່ເນື່ອງ 5 ວັນຕິດຕໍ່ກັນທາງຊາຍຝັ່ງຕາເວັນອອກຂອງປະເທດເມື່ອອາທິດແລ້ວ ນີ້ ມີປະລິມານທຽບເທົ່າກັບນ້ຳຝົນຕະຫຼອດ 6 ເດືອນທີ່ຜ່ານມາ. ສ້າງຄວາມເສຍຫາຍໃຫ້ກັບລັດ ກລັນຕັນ ແລະ ລັດຕຣັງການູ ທາງພາກຕາເວັນອອກສຽງເໜືອຂອງປະເທດ.
ເຈົ້າໜ້າທີ່ ມາເລເຊຍ ລະບຸວ່ານ້ຳຖ້ວມຄັ້ງນີ້ສ້າງຄວາມເສຍຫາຍໃຫ້ກັບນາເຂົ້າຈຳນວນຫຼາຍ ເກີດຄວາມສູນເສຍທາງເສດຖະກິດຫຼາຍລ້ານໂດລາຕໍ່ຊາວນາ ແລະ ຍັງທຳລາຍຖະໜົນ, ຂົວ ແລະ ໂຄງລ່າງພື້ນຖານຕ່າງໆໃນລັດ ກລັນຕັນ ແລະ ພື້ນທີ່ອື່ນໆ.
ນາຍົກ ອັນວາ ກ່າວຕໍ່ລັດຖະສະພາ ມາເລເຊຍ ໃນວັນອັງຄານວານນີ້ວ່າ ຈະຕ້ອງໃຊ້ງົບປະມານປະມານ 224 ລ້ານໂດລາໃນການສ້ອມແປງຄວາມເສຍຫາຍຈາກນ້ຳຖ້ວມ ລວມທັງກຳລັງພິຈາລະນາຈ່າຍເງິນຊົດເຊີຍໃຫ້ກັບຜູ້ທີ່ສູນເສຍຊັບສິນຈາກໄພພິບັດຄັ້ງນີ້ດ້ວຍ.
ຂໍ້ມູນຂອງສູນຈັດການໄພພິບັດແຫ່ງຊາດຂອງມາເລເຊຍ ຊີ້ໃຫ້ເຫັນວ່າມີປະຊາຊົນປະມານ 85,000 ຄົນໃນ 7 ລັດທີ່ຍັງຄົງຫຼົບໄພຢູ່ຕາມໂຮງຮຽນ, ສູນພັກອາໄສ ແລະ ອາຄານຂອງຊຸມຊົນ ໂດຍ 88 ເປີເຊັນຂອງຜູ້ປະສົບໄພເຫຼົ່ານີ້ມາຈາກລັດ ກລັນຕັນ ແລະ ລັດ ຕຣັງການູ ແລະ ມີຜູ້ເສຍຊີວິດແລ້ວຢ່າງໜ້ອຍ 6 ຄົນ.
ທາງດ້ານກົມປ້ອງກັນ ແລະ ບັນເທົາສາທາລະນະໄພຂອງ ໄທ ເປີດເຜີຍໃນວັນອັງຄານວານນີ້ວ່າ ມີຜູ້ເສຍຊີວິດ 25 ຄົນໃນພາກໃຕ້ ແລະ ມີປະຊາຊົນໄດ້ຮັບຜົນກະທົບກວ່າ 300,000 ຄົວເຮືອນ, ໂຮງຮຽນຫຼາຍແຫ່ງຖືກປິດ ແລະ ມີຜູ້ອົບພະຍົບຫຼາຍກວ່າ 34,000 ຄົນກະຈາຍຢູ່ຕາມສູນພັກອາໄສ 491 ແຫ່ງ.
ອົງການຂ່າວຣອຍເຕີ ລາຍງານວ່າ ປະຊາຊົນບາງສ່ວນຢູ່ເມືອງ ຕຸມປັດຂອງມາເລເຊຍ ໄດ້ເລີ່ມພາກັນເດີນທາງກັບໄປສູ່ບ້ານເຮືອນຂອງເຂົາເຈົ້າແລ້ວ ທ່າມກາງລະດັບນ້ຳທີ່ຍັງຄົງຖ້ວມສູງຢູ່ ແລະ ມີລາຍງານວ່າອາດຈະມີຝົນຕົກໜັກຕື່ມອີກໃນອີກບໍ່ເທົ່າໃດວັນຂ້າງໜ້າ.
ຟໍຣັມສະແດງຄວາມຄິດເຫັນ