ພາຍໃນບໍ່ເທົ່າໃດມື້ຂ້າງໜ້ານີ້ກໍຈະເປັນການເລີ້ມຕົ້ນຂອງລະດູລົມມໍລະສຸມແລ້ວ ສະພາບທີ່ເປັນອັນຕະລາຍ ແລະຂາດມາດຕະການ ດ້ານຄວາມປອດໄພ ຢູ່ຕາມບໍ່ຂຸດແກ້ວຢົກ ຂອງມຽນມາ ໄດ້ມີການເນັ້ນໜັກເວລາພວກຂຸດຄົ້ນແກ້ວຢົກສິບກວ່າຄົນໄດ້ເສຍຊີວິດໃນ ຂະນະທີ່ຂຸດຄົ້ນຫາແກ້ວຢົກຢູ່ທີ່ບໍ່ແຫ່ງນຶ່ງ.
ບໍລິເວນດັ່ງກ່າວແມ່ນຢູ່ໃນເຂດເມືອງ Hpakant ໃນລັດ Kachin ທາງພາກເໜືອຂອງ ມຽນມາຊຶ່ງເປັນດິນແດນທີ່ຖືກປະປ່ອຍໃຫ້ເຕັມໄປດ້ວຍຂຸມເລິກ ແລະເສດເຫລັກຂະໜາດໃຫຍ່ເປັນຈຳນວນຫລວງຫລາຍ ໂດຍບັນດາບໍລິສັດຂຸດບໍ່ ແຮ່ ທີ່ໃຊ້ເຄື່ອງຈັກຂະໜາດ ໜັກ ແລະດິນລະເບີດນັ້ນ.
ທ່ານ Khin Maung Myint ສະມາຊິກສະພາສູງຂອງພັກສັນນິບາດແຫ່ງຊາດເພື່ອ ປະຊາທິປະໄຕ ຫຼື NLD ຈາກເຂດເມືອງ Hpakant ກ່າວວ່າ ຝົນຕົກໜັກມັກຈະພາໃຫ້ ເກີດຄວາມບໍ່ທຸ່ນທ່ຽງຕື່ມຂຶ້ນຢູ່ໃນຂົງເຂດ ແລະໃນວັນຈັນທີ່ຜ່ານມາ ນີ້ ຝາຂຸມໄດ້ພັງທັບ ພວກເຮັດວຽກຫລາຍຄົນ.
ທ່ານກ່າວເພີ້ມວ່າ “ເຂົາເຈົ້າໄດ້ພົບເຫັນ 12 ສົບ ແລະໄດ້ສົ່ງອີກ 50 ຄົນໄປໂຮງໝໍ ທ່ານ ເຊື່ອວ່າ ຜູ້ຊາຍເກືອບຮອດ 100 ຄົນ ອາດຈະຕົກຄ້າງຢູ່ໃນຊາກຫັກພັງນັ້ນ. ເພາະເກີດ ຝົນຕົກໜັກ ສະນັ້ນເຂົາເຈົ້າຕ້ອງໄດ້ຢຸດເຊົາການຊອກຄົ້ນຫາ.”
ທ່ານກ່າວເພີ້ມວ່າ ພວກຜູ້ຊາຍເຫລົ່ານີ້ໄດ້ພາກັນເຂົ້າໄປຂຸມບໍ່ແຮ່ຂອງບໍລິສັດ ຢ່າງຜິດ ກົດໝາຍ ບ່ອນທີ່ການຂຸດຄົ້ນໄດ້ຢຸດເຊົາຊົ່ວຄາວນັ້ນ.
ອຸປະຕິເຫດຮ້າຍແຮງ ມັກຈະເກີດຂື້ນຢູ່ຕາມບໍ່ແຮ່ໃນເມືອງ Hpakant ບ່ອນທີ່ພວກອົບ ພະຍົບທີ່ທຸກຈົນ ມາຈາກທົ່ວມຽນມາ ພາກັນຊອກຄົ້ນຫາແກ້ວຢົກ ຢູ່ຕາມບໍ່ແຮ່ທີ່ຖືກປະປ່ອຍ.
ໃນວັນທີ 8 ເດືອນພຶດສະພາຜ່ານມານີ້ ມີ 13 ຄົນລາຍງານວ່າເສຍຊີວິດຍ້ອນດິນເຈື່ອນ. ອຸປະຕິເຫດທີ່ຮ້າຍແຮງຈຳນວນນຶ່ງ ທີ່ບໍ່ເສຍຊີວິດຫລາຍປານໃດນັ້ນໄດ້ເກີດຂຶ້ນໃນເດືອນທັນວາ ແລະເດືອນມັງກອນຜ່ານມານີ້. ຢູ່ໃນອຸບັດເຫດທີ່ຮ້າຍແຮງສຸດທີ່ເກີດຂຶ້ນຫວ່າງມໍ່ໆມານີ້ ມີຜູ້ຊາຍ 114 ຄົນ ພາກັນນອນຢູ່ໃນບໍ່ແຮ່ໄດ້ເສຍຊີວິດ ເວລາເຂົາເຈົ້າໄດ້ຖືກຖົມໂດຍກອງສິ່ງເສດເຫລືອໃນເດືອນພະຈິກແລ້ວນີ້.
