ຫຼາຍມື້ຫຼັງຈາກອົງ ດາໄລ ລາມະ ໄດ້ຍົກເລີກ ທຸກໆການປະກົດຕົວຂອງພະອົງ ໃນເດືອນຕຸລາ, ຜູ້ນຳສາສະໜາພຸດ ອາຍຸ 80 ປີອົງນີ້ໄດ້ເຂົ້າຮັບການປິ່ນປົວຢູ່ທີ່ໂຮງໜໍ Mayo ໃນເມືອງ Rochester ລັດ Minnesota.
ໂຄສົກໂຮງໝໍ Mayo ໄດ້ຢືນຢັນວ່າ ອົງ ດາໄລ ລາມະ ໄດ້ເຂົ້າໂຮງໝໍເພື່ອການປະເມີນຜົນດ້ານການແພດໃນວັນອາທິດທີ່ຜ່ານມາ. ແຕ່ບໍ່ມີຂໍ້ມູນອື່ນໆໄດ້ຖືກເປີດເຜີຍເພີ່ມເຕີມ.
ອົງ ດາໄລ ລາມະ ໄດ້ເຂົ້າໂຮງໝໍຢ່າງປົກກະຕິເພື່ອກວດກາສຸຂະ ພາບ. ໂຮງໝໍ Mayo ໃນສັບປະດາທີ່ຜ່ານມາໄດ້ຢືນຢັນວ່າ ການເຂົ້າໂຮງໝໍຄັ້ງຫຼ້າສຸດຂອງພະອົງກໍແມ່ນເພື່ອກວດ ກາສຸຂະພາບປະຈຳປີຂອງພະອົງ ແຕ່ບໍ່ໄດ້ເປີດເຜີຍຂໍ້ມູນເພີ່ມເຕີມ ໂດຍຖືເປັນກິດຈະວັດ ທີ່ມີຂຶ້ນເປັນປະຈຳນັ້ນ.
ໃນວັນສຸກທີ່ຜ່ານມາ, ຫ້ອງການຂອງອົງ ດາໄລລາມະໄດ້ກ່າວໃນຖະແຫຼງການ ຢູ່ໃນເວັບໄຊທ໌ ຂອງຕົນວ່າ ພະອົງໄດ້ຍົກເລີກແຜນການປະກົດຕົວໃນ ສະຫະລັດ ໃນສັບປະດາໜ້າ ຫຼັງຈາກທ່ານໝໍໄດ້ແນະ ນຳພະອົງໃຫ້ພັກຜ່ອນ ໃນສອງສາມອາທິດຕໍ່ໄປ. ຖະແຫຼງການດັ່ງ ກ່າວບໍ່ໄດ້ໃຫ້ຂໍ້ມູນເພີ່ມເຕີມນອກເໜືອຈາກອາການຂອງອົງ ດາໄລ ລາມະ ແລະ ວັນຈັນວານນີ້ກໍບໍ່ໄດ້ມີຂໍ້ມູນໃໝ່ໃດໆ.
ຫ້ອງການຂອງພະອົງໄດ້ກ່າວວ່າ “ພວກເຮົາເສຍໃຈຢ່າງຍິ່ງສຳລັບຄວາມບໍ່ສະດວກ ທີ່ເກີດຈາກການຕັດສິນໃຈດັ່ງກ່າວນີ້ ແລະ ຂໍອະໄພຕໍ່ປະຊາຊົນທຸກໆຄົນຜູ້ທີ່ໄດ້ເຮັດວຽກຢ່າງໜັກ ໃນການຈັດການຢ້ຽມ ຢາມ ເຊັ່ນດຽວກັນກັບຕໍ່ສາທາລະນະ.”
ອົງດາໄລ ລາມະ ຊົງພຳນັກ ແລະລີ້ໄພ ຢູ່ທີ່ປະເທດອິນເດຍ.
