ລິ້ງ ສຳຫລັບເຂົ້າຫາ

ທະນາຄານ ທົ່ວປະເທດ Cyprus ເປີດບໍລິການ ຄືນແລ້ວ (ສະໄລດ໌/ວີດິໂອ)


ປະຊາຊົນພວມຢືນຕໍ່ເພື່ອເຂົ້າໄປຖອນເງິນໃນທະນາຄານ Laiki Bank ຊຶ່ງເປັນນຶ່ງໃນຫຼາຍທະນາຄານ ໃນປະເທດເກາະ Cyprus
ບັນດາ​ທະນາຄານ​ ທົ່ວ​ປະເທດ​ເກາະ Cyprus ​ໄດ້ເປີດ​ບໍລິການ​ຄືນ​ໃໝ່​ຕາມ​ທີ່​ໄດ້ກໍານົດ​ໄວ້​ ​ໃນວັນ​ພະຫັດ​ມື້ນີ້ ຊຶ່ງ​ເປັນ​ເວລາ​ເກືອບ​ສອງ​ອາທິດ ຫຼັງຈາກໄດ້ປິດ​ລົງ ທ່າມກາງ​ສະພາບເສດຖະກິດ​ເກືອບ​ພັງທະ​ລາຍ​ຂອງ​ປະ​ເທດ​ເກາະດັ່ງກ່າວ.

ພວກ​ຝາກ​ເງິນ​ທັງຫຼາຍ​ໄດ້​ຢືນ​ຕໍ່​ແຖວ​ກັນ​ຢູ່​ຕາມ​ທາງ​ຍ່າງ ​ແລະ​ຕາມ​ຖະ ໜົນຫົນທາງ​ຢູ່​ບໍ​ລິ​ເວນ​ນອກ​ທະນາຄານ​ເປັນ​ເວລາ​ດົນ​ນານ ​ກ່ອນ​ທະນາ ຄານ​ຈະ​ເປີດ​ປະຕູ​ໃນ​ຕອນ​ທ່ຽງ ຕາມ​ເວລາ​ທ້ອງ​ຖິ່ນ ດ້ວຍ​ຄວາມ​ກະວົນ ກະ​ວາຍ​ໃຈ​ເພື່ອ​ໄປ​ຖອນ​ເງິນ​ຂອງ​ພວກ​ຕົນ​ນັ້ນ.

ທະນາຄານ​ຈະ​ເປີດ​ບໍລິການ​ພຽງ​ຫົກ​ຊົ່ວ​ໂມງ ​ແລະ​ປະຊາຊົນ​ສາມາດ​ຖອນ​ເງິນ​ຈາກ​ບັນ ຊີ​ຂອງ​ພວກ​ຕົນ​ໄດ້ບໍ່​ໃຫ້​ເກີນ 383 ​ໂດ​ລາ​ຕໍ່​ມື້. ພວກ​ນັກ​ທ່ອງທ່ຽວ​ທີ່​ຈະ​ເດີນທາງ​ ອອກ​ຈາກໄຊ​ປຣັສ ​ທີ່​ຕັ້ງ​ຢູ່​ເ​ຂດທະ​ເລ Mediterranean ​ໄປ​ຍັງ​ປະ​ເທດ​ອື່ນ ສາມາດ​ຖອນ​ເງິນ​ເພື່ອ​ນໍາ​ຕິດ​ຕົວ​ໄປ​ບໍ່​ໃຫ້​ເກີນ 3,831 ​ໂດ​ລາ​. ຂໍ້​ຈໍາກັດ​ຮັດ​ແຄບ​ທີ່​ເຂັ້​ມງວດ​ດັ່ງກ່າວ​ນີ້ ​ໄດ້​ຖືກ​ບັງຄັບ​ໃຊ້ ​ເພື່ອ​ປ້ອງ​ກັນ​ບໍ່​ໃຫ້ມີ​ການ​ຖອນ​ເງິນ ​ເປັນຈໍ​ານວນຫຼວງຫຼາຍ ອອກ ຈາກ​ບັນຊີ​ ທີ່​ອາດກໍ່​ໃຫ້ເກີດ​ທະນາຄານ​ລົ້ມລະລາຍໄດ້​ນັ້ນ.


ການ​ຮັກສາ​ຄວາມ​ປອດ​ໄພ​ຢູ່​ຕາມ​ທະນາຄານ​ແຫ່ງ​ຕ່າງ​ໆ ​ແມ່ນ​ໄດ້​ມີຢ່າງເຄັ່ງຄັດ​ໃນ​ຕອນ​ແລງ​ວັນ​ພຸດ​ວານ​ນີ້ ​ເວລາ​ລົດຫຸ້ມ​ເກາະ​ນໍາ​ສົ່ງ​ເງິນສົດ​ຈໍາ ນວນຫຼາຍພັນຢູ​ໂຣ​ໄປ​ຍັງ​ທະນາຄານ ​ຂະນະ​ທີ່ພະນັກງານ​ທະນາຄານເລີ້ມກັບ​ຄືນເຂົ້າ​ໄປ​ເຮັດ​ວຽກ.

ທະນາຄານ​ຕ່າງໆ​ຂອງ​ປະ​ເທດ Cyprus ​ໄດ້​ປິດລົງ​ ນັບ​ຕັ້ງ​ແຕ່​ວັນ​ທີ 16 ​ເດືອນ​ມີນາ​ນີ້ ​ໃນຂະນະ​ທີ່​ລັດຖະບານເຈລະຈາ​ ຂໍ​ກູ້​ຢືມ​ເງິນ​ບັນ​ເທົາ​ໜີ້ສິນຈໍານວນ 13 ພັນ​ລ້ານ​ໂດລ່າ
​ຈາກ​ປະ​ເທດ​ເພື່ອນ​ບ້ານ​ຢູ​ໂຣບ ຈາກ​ທະນາຄານກາງຢູ​ໂຣບ ​ແລະ​ກອງ​ທຶນ​ສາກົນ ຫຼື IMF. ​
ໃນ​ພາກສ່ວນ​ຂອງ​ຂໍ້​ຕົກລົງ​ກັນນັ້ນ Cyprus ​ເຫັນ​ພ້ອມ​ທີ່​ຈະ​ຍຶດ​ເອົາ 40 ​ເປີ​ເຊັນ ຫຼື ຫຼາຍ
ກວ່າ​ນັ້ນ ຈາກ​ບັນຊີ​ເງິນ​ທີ່​ໃຫຍ່​ທີ່​ສຸດ ​ແລະ​ບໍ່​ມີ​ການ​ຄໍ້າປະກັນ ຄື​ບັນຊີ​ທີ່​ມີ​ເງິນ​ເກີນ 130,000 ​ໂດ​ລາ​ຂຶ້ນ​ໄປ ​ເພື່ອ​ຊ່ວຍ​ຈ່າຍ​ຄ່າ​ກອບ​ກູ້​ທະນາຄານ​ເຫຼົ່ານີ້​ໄວ້.

XS
SM
MD
LG