ນາງ Diana Nyad ຊາວອາເມຣິກັນ ລອຍນໍ້າໃກ້ຈະເຖິງໄລຍະເຄິ່ງທາງແລ້ວໃນວັນ ອາທິດມື້ນີ້ ໃນຄວາມພະຍາຍາມຄັ້ງທີ່ສາມຂອງນາງ ທີ່ຈະລອຍນໍ້າຈາກນະຄອນຫລວງ ຮາວານາ ປະເທດຄິວບາ ໄປຍັງເກາະ Florida Keys ລັດຟລໍຣິດາ ສະຫະລັດ.
ເມື່ອຕອນແລງວັນເສົາວານນີ້ ນາງ Nyad ໄດ້ເຊົາພັກເພື່ອຮັບການປິ່ນ ປົວຈາກພວກໝໍ ເທິງເຮືອລໍານຶ່ງທີ່ຕິດຕາມນາງໄປ ຫລັງຈາກນາງຖືກແມງກະພຸນກັດ.
ພວກທີມງານຕິດຕາມນາງກ່າວວ່າ ເວລານີ້ ນາງ Nyad ແມ່ນພະຍາຍາມຈະສ້າງສະຖິຕິ ໃນການລອຍນໍ້າໄປແບບຢຸດພັກໄປນໍາ ແທນທີ່ຈະແມ່ນລອຍແບບບໍ່ຢຸດເລີຍນັ້ນ.
ນາງ Nyad ຫວັງວ່າຈະລອຍໃຫ້ເຖິງໄລຍະທາງຄາດໝາຍ 166 ກິໂລແມັດໃຫ້ໄດ້ໃນ ຕອນເຊົ້າຂອງວັນຈັນ ຄືປະມານ 60 ຊົ່ວໂມງຫລັງຈາກເລິ່ມລອຍ. ຖ້າການລອຍນໍ້າຄັ້ງນີ້ ປະສົບຜົນສໍາເລັດ ນາງກໍຈະສ້າງສະຖິຕິໃໝ່ ໃນການລອຍຢູ່ກາງນໍ້າແບບເປີດກ້ວາງ ແທນທີ່ຈະແມ່ນການລອຍ ຢູ່ກະຊັງປ້ອງກັນປາສະຫລາມ.
ເວັບໄຊ້ຂອງນາງ Nyad ເວົ້າວ່າ ນາງໄດ້ຮັບການຄຸ້ມກັນຈາກປາສະຫລາມ ໂດຍນັກດໍານໍ້າ ສາມຄົນ ແລະກະແສໄຟຟ້າ.
ນາງ Nyad ອາຍຸ 62 ປີ ເລີ່ມການລອຍນໍ້າຂອງນາງຄັ້ງນີ້ໃນຕອນແລງ ວັນສຸກຜ່ານມາ ຈາກທ່ານໍ້າ Hemingway ທີ່ນະຄອນຫລວງ ຮາວານາ ຂອງຄິວບາ.
ມີຂະບວນເຮືອນ້ອຍໆແລ່ນຕິດຕາມນາງ Nyad ມາ ພ້ອມກັບທີມສະໜັບສະໜູນ ທີ່ເອົາ ອາຫານ ນໍ້າ ແລະຢຸກຢາໃຫ້ນາງ.
ນາງ Nyad ຢືນຢັນວ່າ ອາຍຸຂອງນາງບໍ່ສໍາຄັນ ແລະບໍ່ກ່ຽວກັບການລອຍທີ່ບໍ່ປະສົບຜົນ ສໍາເລັດເມື່ອເດືອນສິງຫາຜ່ານມາ ຊຶ່ງນາງເວົ້າວ່າໂຣກຫືດຂອງນາງໄດ້ບັງຄັບໃຫ້ນາງຕ້ອງ ຖອຍຄືນ.
ນາງ Nyad ເຄີຍພະຍາຍາມລອຍແບບດຽວກັນນີ້ເມື່ອປີ 1978 ຕອນ ອາຍຸໄດ້ 28 ປີ ແຕ່ກໍຕ້ອງເຊົາກາງທາງ ເນຶ່ອງຈາກລົມແຮງແລະທະເລ ປັ່ນປ່ວນ.
ນັກລອຍນໍ້າຊາວອອສເຕຣເລຍ ນາງ Susan Maroney ລອຍໄດ້ສໍາເລັດໃນປີ 1997 ໂດຍໄດ້ໃຊ້ກະຊັງປ້ອງກັນປາສະຫລາມຊ່ວຍ ຊຶ່ງເວລານັ້ນ ນາງ ຊູຊານ ມີອາຍຸໄດ້ 22 ປີ.
