ທີ່ຫວຽດນາມ ຕໍາຫຼວດໄດ້ປິດລ້ອມຖະໜົນຢູ່ອ້ອມແອ້ມສານປະຊາຊົນສູງສຸດຂອງຫວຽດນາມ ໃນວັນອັງຄານມື້ນີ້ ໃນລະຫວ່າງການຮັບຟັງຄໍາໃຫ້ການໃນ ຄະດີຂອງຜູ້ຄັດຄ້ານລັດຖະບານທີ່ມີຊື່ສຽງທີ່ສຸດຄົນນຶ່ງຂອງປະເທດນັ້ນ.
ນາຍ Cu Huy Ha Vu ໄດ້ໄປຍັງສານເພື່ອອຸທອນໂທດຈໍາຄຸກ 7 ປີ ທີ່ສານໄດ້ຕັດສິນໃນເດືອນເມສາຜ່ານມາ
ໃນຂໍ້ຫາເຜີຍແຜ່ການໂຄສະນາຊວນເຊື່ອ ຕໍ່ຕ້ານລັດ. ນາຍ Vu ແມ່ນໄດ້ຢືນຢັນວ່າຕົນບໍລິສຸດ ໂດຍໂຕ້ແຍ້ງວ່າ ຄໍາຮຽກຮ້ອງຂອງຕົນເພື່ອໃຫ້ມີລະບອບການເມືອງທີ່ມີຫຼາຍພັກຝ່າຍນັ້ນ ບໍ່ໄດ້ມີເຈດຕະນາທີ່ຈະບ່ອນທໍາລາຍ ລັດຖະບານແຕ່ຢ່າງໃດເລີຍ.
ກ່ອນໜ້ານີ້ ໃນການພິຈາລະນາຄະດີຂັ້ນຕົ້ນຂອງນາຍ Vu ຊຶ່ງມີຂຶ້ນພຽງມື້ດຽວນັ້ນ ທະນາຍຄວາມຄົນນຶ່ງຂອງຜູ້ກ່ຽວ ໄດ້ຖືກໄລ່ອອກຈາກສານ ແລະອີກ 3 ຄົນໄດ້ຍ່າງອອກໄປ ເພື່ອປະທ້ວງ ຫຼັງຈາກທີ່ທາງສານໄດ້ປະຕິເສດຕໍ່ຄໍາຮ້ອງຂໍເບິ່ງເອກກະສານທີ່ທາງສານອ້າງວ່າເປັນຫຼັກຖານ ຕໍ່ຕ້ານນາຍ Vu ນັ້ນ.
ກະຊວງການຕ່າງປະເທດສະຫະລັດໄດ້ກ່າວໃນເວລາຕໍ່ມາວ່າ ການຕັດສິນດັ່ງກ່າວນັ້ນໄດ້ພາໃຫ້ມີຄໍາຖາມ ກ່ຽວກັບຄວາມໝັ້ນໝາຍຂອງຫວຽດນາມ ຕໍ່ ການປົກຄອງດ້ວຍຕົວບົດກົດໝາຍແລະການປະຕິຮູບນັ້ນ ແລະໄດ້ຮຽກຮ້ອງໃຫ້ປ່ອຍຕົວ ນາຍ Vu ໂດຍທັນທີ.
